॥ ஶ்ரீ ॥

அத² ஶ்ரீமத³ஷ்டாவக்ரகீ³தா ப்ராரப்⁴யதே ॥

ஜனக உவாச ॥

கத²ம் ஜ்ஞானமவாப்னோதி கத²ம் முக்திர்ப⁴விஷ்யதி ।
வைராக்³யம் ச கத²ம் ப்ராப்தமேதத்³ ப்³ரூஹி மம ப்ரபோ⁴ ॥ 1-1॥

அஷ்டாவக்ர உவாச ॥

முக்திமிச்ச²ஸி சேத்தாத விஷயான் விஷவத்த்யஜ ।
க்ஷமார்ஜவத³யாதோஷஸத்யம் பீயூஷவத்³ பஜ⁴ ॥ 1-2॥

ந ப்ருத்²வீ ந ஜலம் நாக்³னிர்ன வாயுர்த்³யௌர்ன வா ப⁴வான் ।
ஏஷாம் ஸாக்ஷிணமாத்மானம் சித்³ரூபம் வித்³தி⁴ முக்தயே ॥ 1-3॥

யதி³ தே³ஹம் ப்ருத²க் க்ருத்ய சிதி விஶ்ராம்ய திஷ்ட²ஸி ।
அது⁴னைவ ஸுகீ² ஶான்தோ ப³ன்த⁴முக்தோ ப⁴விஷ்யஸி ॥ 1-4॥

ந த்வம் விப்ராதி³கோ வர்ணோ நாஶ்ரமீ நாக்ஷகோ³சர: ।
அஸங்கோ³ஸி நிராகாரோ விஶ்வஸாக்ஷீ ஸுகீ² ப⁴வ ॥ 1-5॥

த⁴ர்மாத⁴ர்மௌ ஸுக²ம் து³:க²ம் மானஸானி ந தே விபோ⁴ ।
ந கர்தாஸி ந போ⁴க்தாஸி முக்த ஏவாஸி ஸர்வதா³ ॥ 1-6॥

ஏகோ த்³ரஷ்டாஸி ஸர்வஸ்ய முக்தப்ராயோஸி ஸர்வதா³ ।
அயமேவ ஹி தே ப³ன்தோ⁴ த்³ரஷ்டாரம் பஶ்யஸீதரம் ॥ 1-7॥

அஹம் கர்தேத்யஹம்மானமஹாக்ருஷ்ணாஹித³ம்ஶித: ।
நாஹம் கர்தேதி விஶ்வாஸாம்ருதம் பீத்வா ஸுக²ம் சர ॥ 1-8॥

ஏகோ விஶுத்³த⁴போ³தோ⁴ஹமிதி நிஶ்சயவஹ்னினா ।
ப்ரஜ்வால்யாஜ்ஞானக³ஹனம் வீதஶோக: ஸுகீ² ப⁴வ ॥ 1-9॥

யத்ர விஶ்வமித³ம் பா⁴தி கல்பிதம் ரஜ்ஜுஸர்பவத் ।
ஆனந்த³பரமானந்த:³ ஸ போ³த⁴ஸ்த்வம் ஸுக²ம் ப⁴வ ॥ 1-1௦॥

முக்தாபி⁴மானீ முக்தோ ஹி ப³த்³தோ⁴ ப³த்³தா⁴பி⁴மான்யபி ।
கிம்வத³ன்தீஹ ஸத்யேயம் யா மதி: ஸா க³திர்ப⁴வேத் ॥ 1-11॥

ஆத்மா ஸாக்ஷீ விபு⁴: பூர்ண ஏகோ முக்தஶ்சித³க்ரிய: ।
அஸங்கோ³ நி:ஸ்ப்ருஹ: ஶான்தோ ப்⁴ரமாத்ஸம்ஸாரவானிவ ॥ 1-12॥

கூடஸ்த²ம் போ³த⁴மத்³வைதமாத்மானம் பரிபா⁴வய ।
ஆபா⁴ஸோஹம் ப்⁴ரமம் முக்த்வா பா⁴வம் பா³ஹ்யமதா²ன்தரம் ॥ 1-13॥

தே³ஹாபி⁴மானபாஶேன சிரம் ப³த்³தோ⁴ஸி புத்ரக ।
போ³தோ⁴ஹம் ஜ்ஞானக²ட்³கே³ன தன்னிக்ருத்ய ஸுகீ² ப⁴வ ॥ 1-14॥

நி:ஸங்கோ³ நிஷ்க்ரியோஸி த்வம் ஸ்வப்ரகாஶோ நிரஞ்ஜன: ।
அயமேவ ஹி தே ப³ன்த:⁴ ஸமாதி⁴மனுதிஷ்ட²ஸி ॥ 1-15॥

த்வயா வ்யாப்தமித³ம் விஶ்வம் த்வயி ப்ரோதம் யதா²ர்த²த: ।
ஶுத்³த⁴பு³த்³த⁴ஸ்வரூபஸ்த்வம் மா க³ம: க்ஷுத்³ரசித்ததாம் ॥ 1-16॥

நிரபேக்ஷோ நிர்விகாரோ நிர்ப⁴ர: ஶீதலாஶய: ।
அகா³த⁴பு³த்³தி⁴ரக்ஷுப்³தோ⁴ ப⁴வ சின்மாத்ரவாஸன: ॥ 1-17॥

ஸாகாரமன்ருதம் வித்³தி⁴ நிராகாரம் து நிஶ்சலம் ।
ஏதத்தத்த்வோபதே³ஶேன ந புனர்ப⁴வஸம்ப⁴வ: ॥ 1-18॥

யதை²வாத³ர்ஶமத்⁴யஸ்தே² ரூபேன்த: பரிதஸ்து ஸ: ।
ததை²வாஸ்மின் ஶரீரேன்த: பரித: பரமேஶ்வர: ॥ 1-19॥

ஏகம் ஸர்வக³தம் வ்யோம ப³ஹிரன்தர்யதா² க⁴டே ।
நித்யம் நிரன்தரம் ப்³ரஹ்ம ஸர்வபூ⁴தக³ணே ததா² ॥ 1-2௦॥