janaka uvācha ॥
ahō nirañjanaḥ śāntō bōdhō’haṃ prakṛtēḥ paraḥ ।
ētāvantamahaṃ kālaṃ mōhēnaiva viḍambitaḥ ॥ 2-1॥
yathā prakāśayāmyēkō dēhamēnaṃ tathā jagat ।
atō mama jagatsarvamathavā na cha kiñchana ॥ 2-2॥
sa śarīramahō viśvaṃ parityajya mayādhunā ।
kutaśchit kauśalād ēva paramātmā vilōkyatē ॥ 2-3॥
yathā na tōyatō bhinnāstaraṅgāḥ phēnabudbudāḥ ।
ātmanō na tathā bhinnaṃ viśvamātmavinirgatam ॥ 2-4॥
tantumātrō bhavēd ēva paṭō yadvad vichāritaḥ ।
ātmatanmātramēvēdaṃ tadvad viśvaṃ vichāritam ॥ 2-5॥
yathaivēkṣurasē klṛptā tēna vyāptaiva śarkarā ।
tathā viśvaṃ mayi klṛptaṃ mayā vyāptaṃ nirantaram ॥ 2-6॥
ātmājñānājjagadbhāti ātmajñānānna bhāsatē ।
rajjvajñānādahirbhāti tajjñānād bhāsatē na hi ॥ 2-7॥
prakāśō mē nijaṃ rūpaṃ nātiriktō’smyahaṃ tataḥ ।
yadā prakāśatē viśvaṃ tadāhaṃ bhāsa ēva hi ॥ 2-8॥
ahō vikalpitaṃ viśvamajñānānmayi bhāsatē ।
rūpyaṃ śuktau phaṇī rajjau vāri sūryakarē yathā ॥ 2-9॥
mattō vinirgataṃ viśvaṃ mayyēva layamēṣyati ।
mṛdi kumbhō jalē vīchiḥ kanakē kaṭakaṃ yathā ॥ 2-10॥
ahō ahaṃ namō mahyaṃ vināśō yasya nāsti mē ।
brahmādistambaparyantaṃ jagannāśō’pi tiṣṭhataḥ ॥ 2-11॥
ahō ahaṃ namō mahyamēkō’haṃ dēhavānapi ।
kvachinna gantā nāgantā vyāpya viśvamavasthitaḥ ॥ 2-12॥
ahō ahaṃ namō mahyaṃ dakṣō nāstīha matsamaḥ ।
asaṃspṛśya śarīrēṇa yēna viśvaṃ chiraṃ dhṛtam ॥ 2-13॥
ahō ahaṃ namō mahyaṃ yasya mē nāsti kiñchana ।
athavā yasya mē sarvaṃ yad vāṅmanasagōcharam ॥ 2-14॥
jñānaṃ jñēyaṃ tathā jñātā tritayaṃ nāsti vāstavam ।
ajñānād bhāti yatrēdaṃ sō’hamasmi nirañjanaḥ ॥ 2-15॥
dvaitamūlamahō duḥkhaṃ nānyattasyā’sti bhēṣajam ।
dṛśyamētan mṛṣā sarvamēkō’haṃ chidrasōmalaḥ ॥ 2-16॥
bōdhamātrō’hamajñānād upādhiḥ kalpitō mayā ।
ēvaṃ vimṛśatō nityaṃ nirvikalpē sthitirmama ॥ 2-17॥
na mē bandhō’sti mōkṣō vā bhrāntiḥ śāntā nirāśrayā ।
ahō mayi sthitaṃ viśvaṃ vastutō na mayi sthitam ॥ 2-18॥
saśarīramidaṃ viśvaṃ na kiñchiditi niśchitam ।
śuddhachinmātra ātmā cha tatkasmin kalpanādhunā ॥ 2-19॥
śarīraṃ svarganarakau bandhamōkṣau bhayaṃ tathā ।
kalpanāmātramēvaitat kiṃ mē kāryaṃ chidātmanaḥ ॥ 2-20॥
ahō janasamūhē’pi na dvaitaṃ paśyatō mama ।
araṇyamiva saṃvṛttaṃ kva ratiṃ karavāṇyaham ॥ 2-21॥
nāhaṃ dēhō na mē dēhō jīvō nāhamahaṃ hi chit ।
ayamēva hi mē bandha āsīdyā jīvitē spṛhā ॥ 2-22॥
ahō bhuvanakallōlairvichitrairdrāk samutthitam ।
mayyanantamahāmbhōdhau chittavātē samudyatē ॥ 2-23॥
mayyanantamahāmbhōdhau chittavātē praśāmyati ।
abhāgyājjīvavaṇijō jagatpōtō vinaśvaraḥ ॥ 2-24॥
mayyanantamahāmbhōdhāvāścharyaṃ jīvavīchayaḥ ।
udyanti ghnanti khēlanti praviśanti svabhāvataḥ ॥ 2-25॥