ಕುಚೇಲನಾಮಾ ಭವತಃ ಸತೀರ್ಥ್ಯತಾಂ ಗತಃ ಸ ಸಾಂದೀಪನಿಮಂದಿರೇ ದ್ವಿಜಃ ।
ತ್ವದೇಕರಾಗೇಣ ಧನಾದಿನಿಸ್ಸ್ಪೃಹೋ ದಿನಾನಿ ನಿನ್ಯೇ ಪ್ರಶಮೀ ಗೃಹಾಶ್ರಮೀ ॥1॥
ಸಮಾನಶೀಲಾಽಪಿ ತದೀಯವಲ್ಲಭಾ ತಥೈವ ನೋ ಚಿತ್ತಜಯಂ ಸಮೇಯುಷೀ ।
ಕದಾಚಿದೂಚೇ ಬತ ವೃತ್ತಿಲಬ್ಧಯೇ ರಮಾಪತಿಃ ಕಿಂ ನ ಸಖಾ ನಿಷೇವ್ಯತೇ ॥2॥
ಇತೀರಿತೋಽಯಂ ಪ್ರಿಯಯಾ ಕ್ಷುಧಾರ್ತಯಾ ಜುಗುಪ್ಸಮಾನೋಽಪಿ ಧನೇ ಮದಾವಹೇ ।
ತದಾ ತ್ವದಾಲೋಕನಕೌತುಕಾದ್ಯಯೌ ವಹನ್ ಪಟಾಂತೇ ಪೃಥುಕಾನುಪಾಯನಮ್ ॥3॥
ಗತೋಽಯಮಾಶ್ಚರ್ಯಮಯೀಂ ಭವತ್ಪುರೀಂ ಗೃಹೇಷು ಶೈಬ್ಯಾಭವನಂ ಸಮೇಯಿವಾನ್ ।
ಪ್ರವಿಶ್ಯ ವೈಕುಂಠಮಿವಾಪ ನಿರ್ವೃತಿಂ ತವಾತಿಸಂಭಾವನಯಾ ತು ಕಿಂ ಪುನಃ ॥4॥
ಪ್ರಪೂಜಿತಂ ತಂ ಪ್ರಿಯಯಾ ಚ ವೀಜಿತಂ ಕರೇ ಗೃಹೀತ್ವಾಽಕಥಯಃ ಪುರಾಕೃತಮ್ ।
ಯದಿಂಧನಾರ್ಥಂ ಗುರುದಾರಚೋದಿತೈರಪರ್ತುವರ್ಷ ತದಮರ್ಷಿ ಕಾನನೇ ॥5॥
ತ್ರಪಾಜುಷೋಽಸ್ಮಾತ್ ಪೃಥುಕಂ ಬಲಾದಥ ಪ್ರಗೃಹ್ಯ ಮುಷ್ಟೌ ಸಕೃದಾಶಿತೇ ತ್ವಯಾ ।
ಕೃತಂ ಕೃತಂ ನನ್ವಿಯತೇತಿ ಸಂಭ್ರಮಾದ್ರಮಾ ಕಿಲೋಪೇತ್ಯ ಕರಂ ರುರೋಧ ತೇ ॥6॥
ಭಕ್ತೇಷು ಭಕ್ತೇನ ಸ ಮಾನಿತಸ್ತ್ವಯಾ ಪುರೀಂ ವಸನ್ನೇಕನಿಶಾಂ ಮಹಾಸುಖಮ್ ।
ಬತಾಪರೇದ್ಯುರ್ದ್ರವಿಣಂ ವಿನಾ ಯಯೌ ವಿಚಿತ್ರರೂಪಸ್ತವ ಖಲ್ವನುಗ್ರಹಃ ॥7॥
ಯದಿ ಹ್ಯಯಾಚಿಷ್ಯಮದಾಸ್ಯದಚ್ಯುತೋ ವದಾಮಿ ಭಾರ್ಯಾಂ ಕಿಮಿತಿ ವ್ರಜನ್ನಸೌ ।
ತ್ವದುಕ್ತಿಲೀಲಾಸ್ಮಿತಮಗ್ನಧೀಃ ಪುನಃ ಕ್ರಮಾದಪಶ್ಯನ್ಮಣಿದೀಪ್ರಮಾಲಯಮ್ ॥8॥
ಕಿಂ ಮಾರ್ಗವಿಭ್ರಂಶ ಇತಿ ಭ್ರಂಮನ್ ಕ್ಷಣಂ ಗೃಹಂ ಪ್ರವಿಷ್ಟಃ ಸ ದದರ್ಶ ವಲ್ಲಭಾಮ್ ।
ಸಖೀಪರೀತಾಂ ಮಣಿಹೇಮಭೂಷಿತಾಂ ಬುಬೋಧ ಚ ತ್ವತ್ಕರುಣಾಂ ಮಹಾದ್ಭುತಾಮ್ ॥9॥
ಸ ರತ್ನಶಾಲಾಸು ವಸನ್ನಪಿ ಸ್ವಯಂ ಸಮುನ್ನಮದ್ಭಕ್ತಿಭರೋಽಮೃತಂ ಯಯೌ ।
ತ್ವಮೇವಮಾಪೂರಿತಭಕ್ತವಾಂಛಿತೋ ಮರುತ್ಪುರಾಧೀಶ ಹರಸ್ವ ಮೇ ಗದಾನ್ ॥10॥