ಯಸ್ಮಿನ್ನೇತದ್ವಿಭಾತಂ ಯತ ಇದಮಭವದ್ಯೇನ ಚೇದಂ ಯ ಏತ-
ದ್ಯೋಽಸ್ಮಾದುತ್ತೀರ್ಣರೂಪಃ ಖಲು ಸಕಲಮಿದಂ ಭಾಸಿತಂ ಯಸ್ಯ ಭಾಸಾ ।
ಯೋ ವಾಚಾಂ ದೂರದೂರೇ ಪುನರಪಿ ಮನಸಾಂ ಯಸ್ಯ ದೇವಾ ಮುನೀಂದ್ರಾಃ
ನೋ ವಿದ್ಯುಸ್ತತ್ತ್ವರೂಪಂ ಕಿಮು ಪುನರಪರೇ ಕೃಷ್ಣ ತಸ್ಮೈ ನಮಸ್ತೇ ॥1॥
ಜನ್ಮಾಥೋ ಕರ್ಮ ನಾಮ ಸ್ಫುಟಮಿಹ ಗುಣದೋಷಾದಿಕಂ ವಾ ನ ಯಸ್ಮಿನ್
ಲೋಕಾನಾಮೂತಯೇ ಯಃ ಸ್ವಯಮನುಭಜತೇ ತಾನಿ ಮಾಯಾನುಸಾರೀ ।
ವಿಭ್ರಚ್ಛಕ್ತೀರರೂಪೋಽಪಿ ಚ ಬಹುತರರೂಪೋಽವಭಾತ್ಯದ್ಭುತಾತ್ಮಾ
ತಸ್ಮೈ ಕೈವಲ್ಯಧಾಮ್ನೇ ಪರರಸಪರಿಪೂರ್ಣಾಯ ವಿಷ್ಣೋ ನಮಸ್ತೇ ॥2॥
ನೋ ತಿರ್ಯಂಚನ್ನ ಮರ್ತ್ಯಂ ನ ಚ ಸುರಮಸುರಂ ನ ಸ್ತ್ರಿಯಂ ನೋ ಪುಂಮಾಂಸಂ
ನ ದ್ರವ್ಯಂ ಕರ್ಮ ಜಾತಿಂ ಗುಣಮಪಿ ಸದಸದ್ವಾಪಿ ತೇ ರೂಪಮಾಹುಃ ।
ಶಿಷ್ಟಂ ಯತ್ ಸ್ಯಾನ್ನಿಷೇಧೇ ಸತಿ ನಿಗಮಶತೈರ್ಲಕ್ಷಣಾವೃತ್ತಿತಸ್ತತ್
ಕೃಚ್ಛ್ರೇಣಾವೇದ್ಯಮಾನಂ ಪರಮಸುಖಮಯಂ ಭಾತಿ ತಸ್ಮೈ ನಮಸ್ತೇ ॥3॥
ಮಾಯಾಯಾಂ ಬಿಂಬಿತಸ್ತ್ವಂ ಸೃಜಸಿ ಮಹದಹಂಕಾರತನ್ಮಾತ್ರಭೇದೈ-
ರ್ಭೂತಗ್ರಾಮೇಂದ್ರಿಯಾದ್ಯೈರಪಿ ಸಕಲಜಗತ್ಸ್ವಪ್ನಸಂಕಲ್ಪಕಲ್ಪಮ್ ।
ಭೂಯಃ ಸಂಹೃತ್ಯ ಸರ್ವಂ ಕಮಠ ಇವ ಪದಾನ್ಯಾತ್ಮನಾ ಕಾಲಶಕ್ತ್ಯಾ
ಗಂಭೀರೇ ಜಾಯಮಾನೇ ತಮಸಿ ವಿತಿಮಿರೋ ಭಾಸಿ ತಸ್ಮೈ ನಮಸ್ತೇ ॥4॥
ಶಬ್ದಬ್ರಹ್ಮೇತಿ ಕರ್ಮೇತ್ಯಣುರಿತಿ ಭಗವನ್ ಕಾಲ ಇತ್ಯಾಲಪಂತಿ
ತ್ವಾಮೇಕಂ ವಿಶ್ವಹೇತುಂ ಸಕಲಮಯತಯಾ ಸರ್ವಥಾ ಕಲ್ಪ್ಯಮಾನಮ್ ।
ವೇದಾಂತೈರ್ಯತ್ತು ಗೀತಂ ಪುರುಷಪರಚಿದಾತ್ಮಾಭಿಧಂ ತತ್ತು ತತ್ತ್ವಂ
ಪ್ರೇಕ್ಷಾಮಾತ್ರೇಣ ಮೂಲಪ್ರಕೃತಿವಿಕೃತಿಕೃತ್ ಕೃಷ್ಣ ತಸ್ಮೈ ನಮಸ್ತೇ ॥5॥
ಸತ್ತ್ವೇನಾಸತ್ತಯಾ ವಾ ನ ಚ ಖಲು ಸದಸತ್ತ್ವೇನ ನಿರ್ವಾಚ್ಯರೂಪಾ
ಧತ್ತೇ ಯಾಸಾವವಿದ್ಯಾ ಗುಣಫಣಿಮತಿವದ್ವಿಶ್ವದೃಶ್ಯಾವಭಾಸಮ್ ।
ವಿದ್ಯಾತ್ವಂ ಸೈವ ಯಾತಾ ಶ್ರುತಿವಚನಲವೈರ್ಯತ್ಕೃಪಾಸ್ಯಂದಲಾಭೇ
ಸಂಸಾರಾರಣ್ಯಸದ್ಯಸ್ತ್ರುಟನಪರಶುತಾಮೇತಿ ತಸ್ಮೈ ನಮಸ್ತೇ ॥6॥
ಭೂಷಾಸು ಸ್ವರ್ಣವದ್ವಾ ಜಗತಿ ಘಟಶರಾವಾದಿಕೇ ಮೃತ್ತಿಕಾವ-
ತ್ತತ್ತ್ವೇ ಸಂಚಿಂತ್ಯಮಾನೇ ಸ್ಫುರತಿ ತದಧುನಾಪ್ಯದ್ವಿತೀಯಂ ವಪುಸ್ತೇ ।
ಸ್ವಪ್ನದ್ರಷ್ಟುಃ ಪ್ರಬೋಧೇ ತಿಮಿರಲಯವಿಧೌ ಜೀರ್ಣರಜ್ಜೋಶ್ಚ ಯದ್ವ-
ದ್ವಿದ್ಯಾಲಾಭೇ ತಥೈವ ಸ್ಫುಟಮಪಿ ವಿಕಸೇತ್ ಕೃಷ್ಣ ತಸ್ಮೈ ನಮಸ್ತೇ ॥7॥
ಯದ್ಭೀತ್ಯೋದೇತಿ ಸೂರ್ಯೋ ದಹತಿ ಚ ದಹನೋ ವಾತಿ ವಾಯುಸ್ತಥಾನ್ಯೇ
ಯದ್ಭೀತಾಃ ಪದ್ಮಜಾದ್ಯಾಃ ಪುನರುಚಿತಬಲೀನಾಹರಂತೇಽನುಕಾಲಮ್ ।
ಯೇನೈವಾರೋಪಿತಾಃ ಪ್ರಾಙ್ನಿಜಪದಮಪಿ ತೇ ಚ್ಯಾವಿತಾರಶ್ಚ ಪಶ್ಚಾತ್
ತಸ್ಮೈ ವಿಶ್ವಂ ನಿಯಂತ್ರೇ ವಯಮಪಿ ಭವತೇ ಕೃಷ್ಣ ಕುರ್ಮಃ ಪ್ರಣಾಮಮ್ ॥8॥
ತ್ರೈಲೋಕ್ಯಂ ಭಾವಯಂತಂ ತ್ರಿಗುಣಮಯಮಿದಂ ತ್ರ್ಯಕ್ಷರಸ್ಯೈಕವಾಚ್ಯಂ
ತ್ರೀಶಾನಾಮೈಕ್ಯರೂಪಂ ತ್ರಿಭಿರಪಿ ನಿಗಮೈರ್ಗೀಯಮಾನಸ್ವರೂಪಮ್ ।
ತಿಸ್ರೋವಸ್ಥಾ ವಿದಂತಂ ತ್ರಿಯುಗಜನಿಜುಷಂ ತ್ರಿಕ್ರಮಾಕ್ರಾಂತವಿಶ್ವಂ
ತ್ರೈಕಾಲ್ಯೇ ಭೇದಹೀನಂ ತ್ರಿಭಿರಹಮನಿಶಂ ಯೋಗಭೇದೈರ್ಭಜೇ ತ್ವಾಮ್ ॥9॥
ಸತ್ಯಂ ಶುದ್ಧಂ ವಿಬುದ್ಧಂ ಜಯತಿ ತವ ವಪುರ್ನಿತ್ಯಮುಕ್ತಂ ನಿರೀಹಂ
ನಿರ್ದ್ವಂದ್ವಂ ನಿರ್ವಿಕಾರಂ ನಿಖಿಲಗುಣಗಣವ್ಯಂಜನಾಧಾರಭೂತಮ್ ।
ನಿರ್ಮೂಲಂ ನಿರ್ಮಲಂ ತನ್ನಿರವಧಿಮಹಿಮೋಲ್ಲಾಸಿ ನಿರ್ಲೀನಮಂತ-
ರ್ನಿಸ್ಸಂಗಾನಾಂ ಮುನೀನಾಂ ನಿರುಪಮಪರಮಾನಂದಸಾಂದ್ರಪ್ರಕಾಶಮ್ ॥10॥
ದುರ್ವಾರಂ ದ್ವಾದಶಾರಂ ತ್ರಿಶತಪರಿಮಿಲತ್ಷಷ್ಟಿಪರ್ವಾಭಿವೀತಂ
ಸಂಭ್ರಾಮ್ಯತ್ ಕ್ರೂರವೇಗಂ ಕ್ಷಣಮನು ಜಗದಾಚ್ಛಿದ್ಯ ಸಂಧಾವಮಾನಮ್ ।
ಚಕ್ರಂ ತೇ ಕಾಲರೂಪಂ ವ್ಯಥಯತು ನ ತು ಮಾಂ ತ್ವತ್ಪದೈಕಾವಲಂಬಂ
ವಿಷ್ಣೋ ಕಾರುಣ್ಯಸಿಂಧೋ ಪವನಪುರಪತೇ ಪಾಹಿ ಸರ್ವಾಮಯೌಘಾತ್ ॥11॥