ୟସ୍ମିନ୍ନେତଦ୍ଵିଭାତଂ ୟତ ଇଦମଭଵଦ୍ୟେନ ଚେଦଂ ୟ ଏତ-
ଦ୍ୟୋଽସ୍ମାଦୁତ୍ତୀର୍ଣରୂପଃ ଖଲୁ ସକଲମିଦଂ ଭାସିତଂ ୟସ୍ୟ ଭାସା ।
ୟୋ ଵାଚାଂ ଦୂରଦୂରେ ପୁନରପି ମନସାଂ ୟସ୍ୟ ଦେଵା ମୁନୀଂଦ୍ରାଃ
ନୋ ଵିଦ୍ୟୁସ୍ତତ୍ତ୍ଵରୂପଂ କିମୁ ପୁନରପରେ କୃଷ୍ଣ ତସ୍ମୈ ନମସ୍ତେ ॥1॥
ଜନ୍ମାଥୋ କର୍ମ ନାମ ସ୍ଫୁଟମିହ ଗୁଣଦୋଷାଦିକଂ ଵା ନ ୟସ୍ମିନ୍
ଲୋକାନାମୂତୟେ ୟଃ ସ୍ଵୟମନୁଭଜତେ ତାନି ମାୟାନୁସାରୀ ।
ଵିଭ୍ରଚ୍ଛକ୍ତୀରରୂପୋଽପି ଚ ବହୁତରରୂପୋଽଵଭାତ୍ୟଦ୍ଭୁତାତ୍ମା
ତସ୍ମୈ କୈଵଲ୍ୟଧାମ୍ନେ ପରରସପରିପୂର୍ଣାୟ ଵିଷ୍ଣୋ ନମସ୍ତେ ॥2॥
ନୋ ତିର୍ୟଂଚନ୍ନ ମର୍ତ୍ୟଂ ନ ଚ ସୁରମସୁରଂ ନ ସ୍ତ୍ରିୟଂ ନୋ ପୁଂମାଂସଂ
ନ ଦ୍ରଵ୍ୟଂ କର୍ମ ଜାତିଂ ଗୁଣମପି ସଦସଦ୍ଵାପି ତେ ରୂପମାହୁଃ ।
ଶିଷ୍ଟଂ ୟତ୍ ସ୍ୟାନ୍ନିଷେଧେ ସତି ନିଗମଶତୈର୍ଲକ୍ଷଣାଵୃତ୍ତିତସ୍ତତ୍
କୃଚ୍ଛ୍ରେଣାଵେଦ୍ୟମାନଂ ପରମସୁଖମୟଂ ଭାତି ତସ୍ମୈ ନମସ୍ତେ ॥3॥
ମାୟାୟାଂ ବିଂବିତସ୍ତ୍ଵଂ ସୃଜସି ମହଦହଂକାରତନ୍ମାତ୍ରଭେଦୈ-
ର୍ଭୂତଗ୍ରାମେଂଦ୍ରିୟାଦ୍ୟୈରପି ସକଲଜଗତ୍ସ୍ଵପ୍ନସଂକଲ୍ପକଲ୍ପମ୍ ।
ଭୂୟଃ ସଂହୃତ୍ୟ ସର୍ଵଂ କମଠ ଇଵ ପଦାନ୍ୟାତ୍ମନା କାଲଶକ୍ତ୍ୟା
ଗଂଭୀରେ ଜାୟମାନେ ତମସି ଵିତିମିରୋ ଭାସି ତସ୍ମୈ ନମସ୍ତେ ॥4॥
ଶବ୍ଦବ୍ରହ୍ମେତି କର୍ମେତ୍ୟଣୁରିତି ଭଗଵନ୍ କାଲ ଇତ୍ୟାଲପଂତି
ତ୍ଵାମେକଂ ଵିଶ୍ଵହେତୁଂ ସକଲମୟତୟା ସର୍ଵଥା କଲ୍ପ୍ୟମାନମ୍ ।
ଵେଦାଂତୈର୍ୟତ୍ତୁ ଗୀତଂ ପୁରୁଷପରଚିଦାତ୍ମାଭିଧଂ ତତ୍ତୁ ତତ୍ତ୍ଵଂ
ପ୍ରେକ୍ଷାମାତ୍ରେଣ ମୂଲପ୍ରକୃତିଵିକୃତିକୃତ୍ କୃଷ୍ଣ ତସ୍ମୈ ନମସ୍ତେ ॥5॥
ସତ୍ତ୍ଵେନାସତ୍ତୟା ଵା ନ ଚ ଖଲୁ ସଦସତ୍ତ୍ଵେନ ନିର୍ଵାଚ୍ୟରୂପା
ଧତ୍ତେ ୟାସାଵଵିଦ୍ୟା ଗୁଣଫଣିମତିଵଦ୍ଵିଶ୍ଵଦୃଶ୍ୟାଵଭାସମ୍ ।
ଵିଦ୍ୟାତ୍ଵଂ ସୈଵ ୟାତା ଶ୍ରୁତିଵଚନଲଵୈର୍ୟତ୍କୃପାସ୍ୟଂଦଲାଭେ
ସଂସାରାରଣ୍ୟସଦ୍ୟସ୍ତ୍ରୁଟନପରଶୁତାମେତି ତସ୍ମୈ ନମସ୍ତେ ॥6॥
ଭୂଷାସୁ ସ୍ଵର୍ଣଵଦ୍ଵା ଜଗତି ଘଟଶରାଵାଦିକେ ମୃତ୍ତିକାଵ-
ତ୍ତତ୍ତ୍ଵେ ସଂଚିଂତ୍ୟମାନେ ସ୍ଫୁରତି ତଦଧୁନାପ୍ୟଦ୍ଵିତୀୟଂ ଵପୁସ୍ତେ ।
ସ୍ଵପ୍ନଦ୍ରଷ୍ଟୁଃ ପ୍ରବୋଧେ ତିମିରଲୟଵିଧୌ ଜୀର୍ଣରଜ୍ଜୋଶ୍ଚ ୟଦ୍ଵ-
ଦ୍ଵିଦ୍ୟାଲାଭେ ତଥୈଵ ସ୍ଫୁଟମପି ଵିକସେତ୍ କୃଷ୍ଣ ତସ୍ମୈ ନମସ୍ତେ ॥7॥
ୟଦ୍ଭୀତ୍ୟୋଦେତି ସୂର୍ୟୋ ଦହତି ଚ ଦହନୋ ଵାତି ଵାୟୁସ୍ତଥାନ୍ୟେ
ୟଦ୍ଭୀତାଃ ପଦ୍ମଜାଦ୍ୟାଃ ପୁନରୁଚିତବଲୀନାହରଂତେଽନୁକାଲମ୍ ।
ୟେନୈଵାରୋପିତାଃ ପ୍ରାଙ୍ନିଜପଦମପି ତେ ଚ୍ୟାଵିତାରଶ୍ଚ ପଶ୍ଚାତ୍
ତସ୍ମୈ ଵିଶ୍ଵଂ ନିୟଂତ୍ରେ ଵୟମପି ଭଵତେ କୃଷ୍ଣ କୁର୍ମଃ ପ୍ରଣାମମ୍ ॥8॥
ତ୍ରୈଲୋକ୍ୟଂ ଭାଵୟଂତଂ ତ୍ରିଗୁଣମୟମିଦଂ ତ୍ର୍ୟକ୍ଷରସ୍ୟୈକଵାଚ୍ୟଂ
ତ୍ରୀଶାନାମୈକ୍ୟରୂପଂ ତ୍ରିଭିରପି ନିଗମୈର୍ଗୀୟମାନସ୍ଵରୂପମ୍ ।
ତିସ୍ରୋଵସ୍ଥା ଵିଦଂତଂ ତ୍ରିୟୁଗଜନିଜୁଷଂ ତ୍ରିକ୍ରମାକ୍ରାଂତଵିଶ୍ଵଂ
ତ୍ରୈକାଲ୍ୟେ ଭେଦହୀନଂ ତ୍ରିଭିରହମନିଶଂ ୟୋଗଭେଦୈର୍ଭଜେ ତ୍ଵାମ୍ ॥9॥
ସତ୍ୟଂ ଶୁଦ୍ଧଂ ଵିବୁଦ୍ଧଂ ଜୟତି ତଵ ଵପୁର୍ନିତ୍ୟମୁକ୍ତଂ ନିରୀହଂ
ନିର୍ଦ୍ଵଂଦ୍ଵଂ ନିର୍ଵିକାରଂ ନିଖିଲଗୁଣଗଣଵ୍ୟଂଜନାଧାରଭୂତମ୍ ।
ନିର୍ମୂଲଂ ନିର୍ମଲଂ ତନ୍ନିରଵଧିମହିମୋଲ୍ଲାସି ନିର୍ଲୀନମଂତ-
ର୍ନିସ୍ସଂଗାନାଂ ମୁନୀନାଂ ନିରୁପମପରମାନଂଦସାଂଦ୍ରପ୍ରକାଶମ୍ ॥10॥
ଦୁର୍ଵାରଂ ଦ୍ଵାଦଶାରଂ ତ୍ରିଶତପରିମିଲତ୍ଷଷ୍ଟିପର୍ଵାଭିଵୀତଂ
ସଂଭ୍ରାମ୍ୟତ୍ କ୍ରୂରଵେଗଂ କ୍ଷଣମନୁ ଜଗଦାଚ୍ଛିଦ୍ୟ ସଂଧାଵମାନମ୍ ।
ଚକ୍ରଂ ତେ କାଲରୂପଂ ଵ୍ୟଥୟତୁ ନ ତୁ ମାଂ ତ୍ଵତ୍ପଦୈକାଵଲଂବଂ
ଵିଷ୍ଣୋ କାରୁଣ୍ୟସିଂଧୋ ପଵନପୁରପତେ ପାହି ସର୍ଵାମୟୌଘାତ୍ ॥11॥