ଜନକ ଉଵାଚ ॥
ହଂତାତ୍ମଜ୍ଞାନସ୍ୟ ଧୀରସ୍ୟ ଖେଲତୋ ଭୋଗଲୀଲୟା ।
ନ ହି ସଂସାରଵାହୀକୈର୍ମୂଢୈଃ ସହ ସମାନତା ॥ 4-1॥
ୟତ୍ ପଦଂ ପ୍ରେପ୍ସଵୋ ଦୀନାଃ ଶକ୍ରାଦ୍ୟାଃ ସର୍ଵଦେଵତାଃ ।
ଅହୋ ତତ୍ର ସ୍ଥିତୋ ୟୋଗୀ ନ ହର୍ଷମୁପଗଚ୍ଛତି ॥ 4-2॥
ତଜ୍ଜ୍ଞସ୍ୟ ପୁଣ୍ୟପାପାଭ୍ୟାଂ ସ୍ପର୍ଶୋ ହ୍ୟଂତର୍ନ ଜାୟତେ ।
ନ ହ୍ୟାକାଶସ୍ୟ ଧୂମେନ ଦୃଶ୍ୟମାନାପି ସଂଗତିଃ ॥ 4-3॥
ଆତ୍ମୈଵେଦଂ ଜଗତ୍ସର୍ଵଂ ଜ୍ଞାତଂ ୟେନ ମହାତ୍ମନା ।
ୟଦୃଚ୍ଛୟା ଵର୍ତମାନଂ ତଂ ନିଷେଦ୍ଧୁଂ କ୍ଷମେତ କଃ ॥ 4-4॥
ଆବ୍ରହ୍ମସ୍ତଂବପର୍ୟଂତେ ଭୂତଗ୍ରାମେ ଚତୁର୍ଵିଧେ ।
ଵିଜ୍ଞସ୍ୟୈଵ ହି ସାମର୍ଥ୍ୟମିଚ୍ଛାନିଚ୍ଛାଵିଵର୍ଜନେ ॥ 4-5॥
ଆତ୍ମାନମଦ୍ଵୟଂ କଶ୍ଚିଜ୍ଜାନାତି ଜଗଦୀଶ୍ଵରମ୍ ।
ୟଦ୍ ଵେତ୍ତି ତତ୍ସ କୁରୁତେ ନ ଭୟଂ ତସ୍ୟ କୁତ୍ରଚିତ୍ ॥ 4-6॥