(ശ്രീമഹാഭാരതേ ഭീഷ്മപര്വണി പംചഷഷ്ടിതമോഽധ്യായേ ശ്ലോ: 47)
വിശ്വാവസുര്വിശ്വമൂര്തിര്വിശ്വേശോ
വിഷ്വക്സേനോ വിശ്വകര്മാ വശീ ച ।
വിശ്വേശ്വരോ വാസുദേവോഽസി തസ്മാ-
-ദ്യോഗാത്മാനം ദൈവതം ത്വാമുപൈമി ॥ 47 ॥
ജയ വിശ്വ മഹാദേവ ജയ ലോകഹിതേരത ।
ജയ യോഗീശ്വര വിഭോ ജയ യോഗപരാവര ॥ 48 ॥
പദ്മഗര്ഭ വിശാലാക്ഷ ജയ ലോകേശ്വരേശ്വര ।
ഭൂതഭവ്യഭവന്നാഥ ജയ സൌമ്യാത്മജാത്മജ ॥ 49 ॥
അസംഖ്യേയഗുണാധാര ജയ സര്വപരായണ ।
നാരായണ സുദുഷ്പാര ജയ ശാര്ങ്ഗധനുര്ധര ॥ 50 ॥
ജയ സര്വഗുണോപേത വിശ്വമൂര്തേ നിരാമയ ।
വിശ്വേശ്വര മഹാബാഹോ ജയ ലോകാര്ഥതത്പര ॥ 51 ॥
മഹോരഗവരാഹാദ്യ ഹരികേശ വിഭോ ജയ ।
ഹരിവാസ ദിശാമീശ വിശ്വാവാസാമിതാവ്യയ ॥ 52 ॥
വ്യക്താവ്യക്താമിതസ്ഥാന നിയതേംദ്രിയ സത്ക്രിയ ।
അസംഖ്യേയാത്മഭാവജ്ഞ ജയ ഗംഭീരകാമദ ॥ 53 ॥
അനംതവിദിത ബ്രഹ്മന് നിത്യഭൂതവിഭാവന ।
കൃതകാര്യ കൃതപ്രജ്ഞ ധര്മജ്ഞ വിജയാവഹ ॥ 54 ॥
ഗുഹ്യാത്മന് സര്വയോഗാത്മന് സ്ഫുട സംഭൂത സംഭവ ।
ഭൂതാദ്യ ലോകതത്ത്വേശ ജയ ഭൂതവിഭാവന ॥ 55 ॥
ആത്മയോനേ മഹാഭാഗ കല്പസംക്ഷേപതത്പര ।
ഉദ്ഭാവനമനോഭാവ ജയ ബ്രഹ്മജനപ്രിയ ॥ 56 ॥
നിസര്ഗസര്ഗനിരത കാമേശ പരമേശ്വര ।
അമൃതോദ്ഭവ സദ്ഭാവ മുക്താത്മന് വിജയപ്രദ ॥ 57 ॥
പ്രജാപതിപതേ ദേവ പദ്മനാഭ മഹാബല ।
ആത്മഭൂത മഹാഭൂത സത്വാത്മന് ജയ സര്വദാ ॥ 58 ॥
പാദൌ തവ ധരാ ദേവീ ദിശോ ബാഹു ദിവം ശിരഃ ।
മൂര്തിസ്തേഽഹം സുരാഃ കായശ്ചംദ്രാദിത്യൌ ച ചക്ഷുഷീ ॥ 59 ॥
ബലം തപശ്ച സത്യം ച കര്മ ധര്മാത്മജം തവ ।
തേജോഽഗ്നിഃ പവനഃ ശ്വാസ ആപസ്തേ സ്വേദസംഭവാഃ ॥ 60 ॥
അശ്വിനൌ ശ്രവണൌ നിത്യം ദേവീ ജിഹ്വാ സരസ്വതീ ।
വേദാഃ സംസ്കാരനിഷ്ഠാ ഹി ത്വയീദം ജഗദാശ്രിതമ് ॥ 61 ॥
ന സംഖ്യാ ന പരീമാണം ന തേജോ ന പരാക്രമമ് ।
ന ബലം യോഗയോഗീശ ജാനീമസ്തേ ന സംഭവമ് ॥ 62 ॥
ത്വദ്ഭക്തിനിരതാ ദേവ നിയമൈസ്ത്വാം സമാശ്രിതാഃ ।
അര്ചയാമഃ സദാ വിഷ്ണോ പരമേശം മഹേശ്വരമ് ॥ 63 ॥
ഋഷയോ ദേവഗംധര്വാ യക്ഷരാക്ഷസപന്നഗാഃ ।
പിശാചാ മാനുഷാശ്ചൈവ മൃഗപക്ഷിസരീസൃപാഃ ॥ 64 ॥
ഏവമാദി മയാ സൃഷ്ടം പൃഥിവ്യാം ത്വത്പ്രസാദജമ് ।
പദ്മനാഭ വിശാലാക്ഷ കൃഷ്ണ ദുഃഖപ്രണാശന ॥ 65 ॥
ത്വം ഗതിഃ സര്വഭൂതാനാം ത്വം നേതാ ത്വം ജഗദ്ഗുരുഃ ।
ത്വത്പ്രസാദേന ദേവേശ സുഖിനോ വിബുധാഃ സദാ ॥ 66 ॥
പൃഥിവീ നിര്ഭയാ ദേവ ത്വത്പ്രസാദാത്സദാഽഭവത് ।
തസ്മാദ്ഭവ വിശാലാക്ഷ യദുവംശവിവര്ധനഃ ॥ 67 ॥
ധര്മസംസ്ഥാപനാര്ഥായ ദൈത്യാനാം ച വധായ ച ।
ജഗതോ ധാരണാര്ഥായ വിജ്ഞാപ്യം കുരു മേ പ്രഭോ ॥ 68 ॥
യത്തത്പരമകം ഗുഹ്യം ത്വത്പ്രസാദാദിദം വിഭോ ।
വാസുദേവ തദേതത്തേ മയോദ്ഗീതം യഥാതഥമ് ॥ 69 ॥
സൃഷ്ട്വാ സംകര്ഷണം ദേവം സ്വയമാത്മാനമാത്മനാ ।
കൃഷ്ണ ത്വമാത്മനോ സാക്ഷീ പ്രദ്യുമ്നം ചാത്മസംഭവമ് ॥ 70 ॥
പ്രദ്യുമ്നാദനിരുദ്ധം ത്വം യം വിദുര്വിഷ്ണുമവ്യയമ് ।
അനിരുദ്ധോഽസൃജന്മാം വൈ ബ്രഹ്മാണം ലോകധാരിണമ് ॥ 71 ॥
വാസുദേവമയഃ സോഽഹം ത്വയൈവാസ്മി വിനിര്മിതഃ ।
[തസ്മാദ്യാചാമി ലോകേശ ചതുരാത്മാനമാത്മനാ।]
വിഭജ്യ ഭാഗശോഽഽത്മാനം വ്രജ മാനുഷതാം വിഭോ ॥ 72 ॥
തത്രാസുരവധം കൃത്വാ സര്വലോകസുഖായ വൈ ।
ധര്മം പ്രാപ്യ യശഃ പ്രാപ്യ യോഗം പ്രാപ്സ്യസി തത്ത്വതഃ ॥ 73 ॥
ത്വാം ഹി ബ്രഹ്മര്ഷയോ ലോകേ ദേവാശ്ചാമിതവിക്രമ ।
തൈസ്തൈര്ഹി നാമഭിര്യുക്താ ഗായംതി പരമാത്മകമ് ॥ 74 ॥
സ്ഥിതാശ്ച സര്വേ ത്വയി ഭൂതസംഘാഃ
കൃത്വാശ്രയം ത്വാം വരദം സുബാഹോ ।
അനാദിമധ്യാംതമപാരയോഗം
ലോകസ്യ സേതും പ്രവദംതി വിപ്രാഃ ॥ 75 ॥
ഇതി ശ്രീമഹാഭാരതേ ഭീഷ്മപര്വണി പംചഷഷ്ടിതമോഽധ്യായേ വാസുദേവ സ്തോത്രമ് ।