(ଶ୍ରୀମହାଭାରତେ ଭୀଷ୍ମପର୍ଵଣି ପଂଚଷଷ୍ଟିତମୋଽଧ୍ୟାୟେ ଶ୍ଲୋ: 47)
ଵିଶ୍ଵାଵସୁର୍ଵିଶ୍ଵମୂର୍ତିର୍ଵିଶ୍ଵେଶୋ
ଵିଷ୍ଵକ୍ସେନୋ ଵିଶ୍ଵକର୍ମା ଵଶୀ ଚ ।
ଵିଶ୍ଵେଶ୍ଵରୋ ଵାସୁଦେଵୋଽସି ତସ୍ମା-
-ଦ୍ୟୋଗାତ୍ମାନଂ ଦୈଵତଂ ତ୍ଵାମୁପୈମି ॥ 47 ॥
ଜୟ ଵିଶ୍ଵ ମହାଦେଵ ଜୟ ଲୋକହିତେରତ ।
ଜୟ ୟୋଗୀଶ୍ଵର ଵିଭୋ ଜୟ ୟୋଗପରାଵର ॥ 48 ॥
ପଦ୍ମଗର୍ଭ ଵିଶାଲାକ୍ଷ ଜୟ ଲୋକେଶ୍ଵରେଶ୍ଵର ।
ଭୂତଭଵ୍ୟଭଵନ୍ନାଥ ଜୟ ସୌମ୍ୟାତ୍ମଜାତ୍ମଜ ॥ 49 ॥
ଅସଂଖ୍ୟେୟଗୁଣାଧାର ଜୟ ସର୍ଵପରାୟଣ ।
ନାରାୟଣ ସୁଦୁଷ୍ପାର ଜୟ ଶାର୍ଙ୍ଗଧନୁର୍ଧର ॥ 50 ॥
ଜୟ ସର୍ଵଗୁଣୋପେତ ଵିଶ୍ଵମୂର୍ତେ ନିରାମୟ ।
ଵିଶ୍ଵେଶ୍ଵର ମହାବାହୋ ଜୟ ଲୋକାର୍ଥତତ୍ପର ॥ 51 ॥
ମହୋରଗଵରାହାଦ୍ୟ ହରିକେଶ ଵିଭୋ ଜୟ ।
ହରିଵାସ ଦିଶାମୀଶ ଵିଶ୍ଵାଵାସାମିତାଵ୍ୟୟ ॥ 52 ॥
ଵ୍ୟକ୍ତାଵ୍ୟକ୍ତାମିତସ୍ଥାନ ନିୟତେଂଦ୍ରିୟ ସତ୍କ୍ରିୟ ।
ଅସଂଖ୍ୟେୟାତ୍ମଭାଵଜ୍ଞ ଜୟ ଗଂଭୀରକାମଦ ॥ 53 ॥
ଅନଂତଵିଦିତ ବ୍ରହ୍ମନ୍ ନିତ୍ୟଭୂତଵିଭାଵନ ।
କୃତକାର୍ୟ କୃତପ୍ରଜ୍ଞ ଧର୍ମଜ୍ଞ ଵିଜୟାଵହ ॥ 54 ॥
ଗୁହ୍ୟାତ୍ମନ୍ ସର୍ଵୟୋଗାତ୍ମନ୍ ସ୍ଫୁଟ ସଂଭୂତ ସଂଭଵ ।
ଭୂତାଦ୍ୟ ଲୋକତତ୍ତ୍ଵେଶ ଜୟ ଭୂତଵିଭାଵନ ॥ 55 ॥
ଆତ୍ମୟୋନେ ମହାଭାଗ କଲ୍ପସଂକ୍ଷେପତତ୍ପର ।
ଉଦ୍ଭାଵନମନୋଭାଵ ଜୟ ବ୍ରହ୍ମଜନପ୍ରିୟ ॥ 56 ॥
ନିସର୍ଗସର୍ଗନିରତ କାମେଶ ପରମେଶ୍ଵର ।
ଅମୃତୋଦ୍ଭଵ ସଦ୍ଭାଵ ମୁକ୍ତାତ୍ମନ୍ ଵିଜୟପ୍ରଦ ॥ 57 ॥
ପ୍ରଜାପତିପତେ ଦେଵ ପଦ୍ମନାଭ ମହାବଲ ।
ଆତ୍ମଭୂତ ମହାଭୂତ ସତ୍ଵାତ୍ମନ୍ ଜୟ ସର୍ଵଦା ॥ 58 ॥
ପାଦୌ ତଵ ଧରା ଦେଵୀ ଦିଶୋ ବାହୁ ଦିଵଂ ଶିରଃ ।
ମୂର୍ତିସ୍ତେଽହଂ ସୁରାଃ କାୟଶ୍ଚଂଦ୍ରାଦିତ୍ୟୌ ଚ ଚକ୍ଷୁଷୀ ॥ 59 ॥
ବଲଂ ତପଶ୍ଚ ସତ୍ୟଂ ଚ କର୍ମ ଧର୍ମାତ୍ମଜଂ ତଵ ।
ତେଜୋଽଗ୍ନିଃ ପଵନଃ ଶ୍ଵାସ ଆପସ୍ତେ ସ୍ଵେଦସଂଭଵାଃ ॥ 60 ॥
ଅଶ୍ଵିନୌ ଶ୍ରଵଣୌ ନିତ୍ୟଂ ଦେଵୀ ଜିହ୍ଵା ସରସ୍ଵତୀ ।
ଵେଦାଃ ସଂସ୍କାରନିଷ୍ଠା ହି ତ୍ଵୟୀଦଂ ଜଗଦାଶ୍ରିତମ୍ ॥ 61 ॥
ନ ସଂଖ୍ୟା ନ ପରୀମାଣଂ ନ ତେଜୋ ନ ପରାକ୍ରମମ୍ ।
ନ ବଲଂ ୟୋଗୟୋଗୀଶ ଜାନୀମସ୍ତେ ନ ସଂଭଵମ୍ ॥ 62 ॥
ତ୍ଵଦ୍ଭକ୍ତିନିରତା ଦେଵ ନିୟମୈସ୍ତ୍ଵାଂ ସମାଶ୍ରିତାଃ ।
ଅର୍ଚୟାମଃ ସଦା ଵିଷ୍ଣୋ ପରମେଶଂ ମହେଶ୍ଵରମ୍ ॥ 63 ॥
ଋଷୟୋ ଦେଵଗଂଧର୍ଵା ୟକ୍ଷରାକ୍ଷସପନ୍ନଗାଃ ।
ପିଶାଚା ମାନୁଷାଶ୍ଚୈଵ ମୃଗପକ୍ଷିସରୀସୃପାଃ ॥ 64 ॥
ଏଵମାଦି ମୟା ସୃଷ୍ଟଂ ପୃଥିଵ୍ୟାଂ ତ୍ଵତ୍ପ୍ରସାଦଜମ୍ ।
ପଦ୍ମନାଭ ଵିଶାଲାକ୍ଷ କୃଷ୍ଣ ଦୁଃଖପ୍ରଣାଶନ ॥ 65 ॥
ତ୍ଵଂ ଗତିଃ ସର୍ଵଭୂତାନାଂ ତ୍ଵଂ ନେତା ତ୍ଵଂ ଜଗଦ୍ଗୁରୁଃ ।
ତ୍ଵତ୍ପ୍ରସାଦେନ ଦେଵେଶ ସୁଖିନୋ ଵିବୁଧାଃ ସଦା ॥ 66 ॥
ପୃଥିଵୀ ନିର୍ଭୟା ଦେଵ ତ୍ଵତ୍ପ୍ରସାଦାତ୍ସଦାଽଭଵତ୍ ।
ତସ୍ମାଦ୍ଭଵ ଵିଶାଲାକ୍ଷ ୟଦୁଵଂଶଵିଵର୍ଧନଃ ॥ 67 ॥
ଧର୍ମସଂସ୍ଥାପନାର୍ଥାୟ ଦୈତ୍ୟାନାଂ ଚ ଵଧାୟ ଚ ।
ଜଗତୋ ଧାରଣାର୍ଥାୟ ଵିଜ୍ଞାପ୍ୟଂ କୁରୁ ମେ ପ୍ରଭୋ ॥ 68 ॥
ୟତ୍ତତ୍ପରମକଂ ଗୁହ୍ୟଂ ତ୍ଵତ୍ପ୍ରସାଦାଦିଦଂ ଵିଭୋ ।
ଵାସୁଦେଵ ତଦେତତ୍ତେ ମୟୋଦ୍ଗୀତଂ ୟଥାତଥମ୍ ॥ 69 ॥
ସୃଷ୍ଟ୍ଵା ସଂକର୍ଷଣଂ ଦେଵଂ ସ୍ଵୟମାତ୍ମାନମାତ୍ମନା ।
କୃଷ୍ଣ ତ୍ଵମାତ୍ମନୋ ସାକ୍ଷୀ ପ୍ରଦ୍ୟୁମ୍ନଂ ଚାତ୍ମସଂଭଵମ୍ ॥ 70 ॥
ପ୍ରଦ୍ୟୁମ୍ନାଦନିରୁଦ୍ଧଂ ତ୍ଵଂ ୟଂ ଵିଦୁର୍ଵିଷ୍ଣୁମଵ୍ୟୟମ୍ ।
ଅନିରୁଦ୍ଧୋଽସୃଜନ୍ମାଂ ଵୈ ବ୍ରହ୍ମାଣଂ ଲୋକଧାରିଣମ୍ ॥ 71 ॥
ଵାସୁଦେଵମୟଃ ସୋଽହଂ ତ୍ଵୟୈଵାସ୍ମି ଵିନିର୍ମିତଃ ।
[ତସ୍ମାଦ୍ୟାଚାମି ଲୋକେଶ ଚତୁରାତ୍ମାନମାତ୍ମନା।]
ଵିଭଜ୍ୟ ଭାଗଶୋଽଽତ୍ମାନଂ ଵ୍ରଜ ମାନୁଷତାଂ ଵିଭୋ ॥ 72 ॥
ତତ୍ରାସୁରଵଧଂ କୃତ୍ଵା ସର୍ଵଲୋକସୁଖାୟ ଵୈ ।
ଧର୍ମଂ ପ୍ରାପ୍ୟ ୟଶଃ ପ୍ରାପ୍ୟ ୟୋଗଂ ପ୍ରାପ୍ସ୍ୟସି ତତ୍ତ୍ଵତଃ ॥ 73 ॥
ତ୍ଵାଂ ହି ବ୍ରହ୍ମର୍ଷୟୋ ଲୋକେ ଦେଵାଶ୍ଚାମିତଵିକ୍ରମ ।
ତୈସ୍ତୈର୍ହି ନାମଭିର୍ୟୁକ୍ତା ଗାୟଂତି ପରମାତ୍ମକମ୍ ॥ 74 ॥
ସ୍ଥିତାଶ୍ଚ ସର୍ଵେ ତ୍ଵୟି ଭୂତସଂଘାଃ
କୃତ୍ଵାଶ୍ରୟଂ ତ୍ଵାଂ ଵରଦଂ ସୁବାହୋ ।
ଅନାଦିମଧ୍ୟାଂତମପାରୟୋଗଂ
ଲୋକସ୍ୟ ସେତୁଂ ପ୍ରଵଦଂତି ଵିପ୍ରାଃ ॥ 75 ॥
ଇତି ଶ୍ରୀମହାଭାରତେ ଭୀଷ୍ମପର୍ଵଣି ପଂଚଷଷ୍ଟିତମୋଽଧ୍ୟାୟେ ଵାସୁଦେଵ ସ୍ତୋତ୍ରମ୍ ।