സത്യാചാര്യസ്യ ഗമനേ കദാചിന്മുക്തി ദായകമ് ।
കാശീക്ശേത്രം പ്രതി സഹ ഗൌര്യാ മാര്ഗേ തു ശംകരമ് ॥ (അനുഷ്ടുപ്)
അംത്യവേഷധരം ദൃഷ്ട്വാ ഗച്ഛ ഗച്ഛേതി ചാബ്രവീത് ।
ശംകരഃസോഽപി ചാംഡലസ്തം പുനഃ പ്രാഹ ശംകരമ് ॥ (അനുഷ്ടുപ്)
അന്നമയാദന്നമയമഥവാ ചൈതന്യമേവ ചൈതന്യാത് ।
യതിവര ദൂരീകര്തും വാംഛസി കിം ബ്രൂഹി ഗച്ഛ ഗച്ഛേതി ॥ (ആര്യാ വൃത്ത)
പ്രത്യഗ്വസ്തുനി നിസ്തരംഗസഹജാനംദാവബോധാംബുധൌ
വിപ്രോഽയം ശ്വപചോഽയമിത്യപി മഹാന്കോഽയം വിഭേദഭ്രമഃ ।
കിം ഗംഗാംബുനി ബിംബിതേഽംബരമണൌ ചാംഡാലവീഥീപയഃ
പൂരേ വാഽംതരമസ്തി കാംചനഘടീമൃത്കുംഭയോര്വാഽംബരേ ॥ (ശാര്ദൂല വിക്രീഡിത)
ജാഗ്രത്സ്വപ്നസുഷുപ്തിഷു സ്ഫുടതരാ യാ സംവിദുജ്ജൃംഭതേ
യാ ബ്രഹ്മാദിപിപീലികാംതതനുഷു പ്രോതാ ജഗത്സാക്ഷിണീ ।
സൈവാഹം ന ച ദൃശ്യവസ്ത്വിതി ദൃഢപ്രജ്ഞാപി യസ്യാസ്തി ചേ-
ച്ചാംഡാലോഽസ്തു സ തു ദ്വിജോഽസ്തു ഗുരുരിത്യേഷാ മനീഷാ മമ ॥ 1॥
ബ്രഹ്മൈവാഹമിദം ജഗച്ച സകലം ചിന്മാത്രവിസ്താരിതം
സര്വം ചൈതദവിദ്യയാ ത്രിഗുണയാഽശേഷം മയാ കല്പിതമ് ।
ഇത്ഥം യസ്യ ദൃഢാ മതിഃ സുഖതരേ നിത്യേ പരേ നിര്മലേ
ചാംഡാലോഽസ്തു സ തു ദ്വിജോഽസ്തു ഗുരുരിത്യേഷാ മനീഷാ മമ ॥ 2॥
ശശ്വന്നശ്വരമേവ വിശ്വമഖിലം നിശ്ചിത്യ വാചാ ഗുരോ-
ര്നിത്യം ബ്രഹ്മ നിരംതരം വിമൃശതാ നിര്വ്യാജശാംതാത്മനാ ।
ഭൂതം ഭാവി ച ദുഷ്കൃതം പ്രദഹതാ സംവിന്മയേ പാവകേ
പ്രാരബ്ധായ സമര്പിതം സ്വവപുരിത്യേഷാ മനീഷാ മമ ॥ 3॥
യാ തിര്യങ്നരദേവതാഭിരഹമിത്യംതഃ സ്ഫുടാ ഗൃഹ്യതേ
യദ്ഭാസാ ഹൃദയാക്ഷദേഹവിഷയാ ഭാംതി സ്വതോഽചേതനാഃ ।
താം ഭാസ്യൈഃ പിഹിതാര്കമംഡലനിഭാം സ്ഫൂര്തിം സദാ ഭാവയ-
ന്യോഗീ നിര്വൃതമാനസോ ഹി ഗുരുരിത്യേഷാ മനീഷാ മമ ॥ 4॥
യത്സൌഖ്യാംബുധിലേശലേശത ഇമേ ശക്രാദയോ നിര്വൃതാ
യച്ചിത്തേ നിതരാം പ്രശാംതകലനേ ലബ്ധ്വാ മുനിര്നിര്വൃതഃ ।
യസ്മിന്നിത്യസുഖാംബുധൌ ഗലിതധീര്ബ്രഹ്മൈവ ന ബ്രഹ്മവിദ്
യഃ കശ്ചിത്സ സുരേംദ്രവംദിതപദോ നൂനം മനീഷാ മമ ॥ 5॥
ദാസസ്തേഽഹം ദേഹദൃഷ്ട്യാഽസ്മി ശംഭോ
ജാതസ്തേംഽശോ ജീവദൃഷ്ട്യാ ത്രിദൃഷ്ടേ ।
സര്വസ്യാഽഽത്മന്നാത്മദൃഷ്ട്യാ ത്വമേവേ-
ത്യേവം മേ ധീര്നിശ്ചിതാ സര്വശാസ്ത്രൈഃ ॥
॥ ഇതി ശ്രീമച്ഛംകരഭഗവതഃ കൃതൌ മനീഷാപംചകം സംപൂര്ണമ് ॥