ସତ୍ୟାଚାର୍ୟସ୍ୟ ଗମନେ କଦାଚିନ୍ମୁକ୍ତି ଦାୟକମ୍ ।
କାଶୀକ୍ଶେତ୍ରଂ ପ୍ରତି ସହ ଗୌର୍ୟା ମାର୍ଗେ ତୁ ଶଂକରମ୍ ॥ (ଅନୁଷ୍ଟୁପ୍)
ଅଂତ୍ୟଵେଷଧରଂ ଦୃଷ୍ଟ୍ଵା ଗଚ୍ଛ ଗଚ୍ଛେତି ଚାବ୍ରଵୀତ୍ ।
ଶଂକରଃସୋଽପି ଚାଂଡଲସ୍ତଂ ପୁନଃ ପ୍ରାହ ଶଂକରମ୍ ॥ (ଅନୁଷ୍ଟୁପ୍)
ଅନ୍ନମୟାଦନ୍ନମୟମଥଵା ଚୈତନ୍ୟମେଵ ଚୈତନ୍ୟାତ୍ ।
ୟତିଵର ଦୂରୀକର୍ତୁଂ ଵାଂଛସି କିଂ ବ୍ରୂହି ଗଚ୍ଛ ଗଚ୍ଛେତି ॥ (ଆର୍ୟା ଵୃତ୍ତ)
ପ୍ରତ୍ୟଗ୍ଵସ୍ତୁନି ନିସ୍ତରଂଗସହଜାନଂଦାଵବୋଧାଂବୁଧୌ
ଵିପ୍ରୋଽୟଂ ଶ୍ଵପଚୋଽୟମିତ୍ୟପି ମହାନ୍କୋଽୟଂ ଵିଭେଦଭ୍ରମଃ ।
କିଂ ଗଂଗାଂବୁନି ବିଂବିତେଽଂବରମଣୌ ଚାଂଡାଲଵୀଥୀପୟଃ
ପୂରେ ଵାଽଂତରମସ୍ତି କାଂଚନଘଟୀମୃତ୍କୁଂଭୟୋର୍ଵାଽଂବରେ ॥ (ଶାର୍ଦୂଲ ଵିକ୍ରୀଡିତ)
ଜାଗ୍ରତ୍ସ୍ଵପ୍ନସୁଷୁପ୍ତିଷୁ ସ୍ଫୁଟତରା ୟା ସଂଵିଦୁଜ୍ଜୃଂଭତେ
ୟା ବ୍ରହ୍ମାଦିପିପୀଲିକାଂତତନୁଷୁ ପ୍ରୋତା ଜଗତ୍ସାକ୍ଷିଣୀ ।
ସୈଵାହଂ ନ ଚ ଦୃଶ୍ୟଵସ୍ତ୍ଵିତି ଦୃଢପ୍ରଜ୍ଞାପି ୟସ୍ୟାସ୍ତି ଚେ-
ଚ୍ଚାଂଡାଲୋଽସ୍ତୁ ସ ତୁ ଦ୍ଵିଜୋଽସ୍ତୁ ଗୁରୁରିତ୍ୟେଷା ମନୀଷା ମମ ॥ 1॥
ବ୍ରହ୍ମୈଵାହମିଦଂ ଜଗଚ୍ଚ ସକଲଂ ଚିନ୍ମାତ୍ରଵିସ୍ତାରିତଂ
ସର୍ଵଂ ଚୈତଦଵିଦ୍ୟୟା ତ୍ରିଗୁଣୟାଽଶେଷଂ ମୟା କଲ୍ପିତମ୍ ।
ଇତ୍ଥଂ ୟସ୍ୟ ଦୃଢା ମତିଃ ସୁଖତରେ ନିତ୍ୟେ ପରେ ନିର୍ମଲେ
ଚାଂଡାଲୋଽସ୍ତୁ ସ ତୁ ଦ୍ଵିଜୋଽସ୍ତୁ ଗୁରୁରିତ୍ୟେଷା ମନୀଷା ମମ ॥ 2॥
ଶଶ୍ଵନ୍ନଶ୍ଵରମେଵ ଵିଶ୍ଵମଖିଲଂ ନିଶ୍ଚିତ୍ୟ ଵାଚା ଗୁରୋ-
ର୍ନିତ୍ୟଂ ବ୍ରହ୍ମ ନିରଂତରଂ ଵିମୃଶତା ନିର୍ଵ୍ୟାଜଶାଂତାତ୍ମନା ।
ଭୂତଂ ଭାଵି ଚ ଦୁଷ୍କୃତଂ ପ୍ରଦହତା ସଂଵିନ୍ମୟେ ପାଵକେ
ପ୍ରାରବ୍ଧାୟ ସମର୍ପିତଂ ସ୍ଵଵପୁରିତ୍ୟେଷା ମନୀଷା ମମ ॥ 3॥
ୟା ତିର୍ୟଙ୍ନରଦେଵତାଭିରହମିତ୍ୟଂତଃ ସ୍ଫୁଟା ଗୃହ୍ୟତେ
ୟଦ୍ଭାସା ହୃଦୟାକ୍ଷଦେହଵିଷୟା ଭାଂତି ସ୍ଵତୋଽଚେତନାଃ ।
ତାଂ ଭାସ୍ୟୈଃ ପିହିତାର୍କମଂଡଲନିଭାଂ ସ୍ଫୂର୍ତିଂ ସଦା ଭାଵୟ-
ନ୍ୟୋଗୀ ନିର୍ଵୃତମାନସୋ ହି ଗୁରୁରିତ୍ୟେଷା ମନୀଷା ମମ ॥ 4॥
ୟତ୍ସୌଖ୍ୟାଂବୁଧିଲେଶଲେଶତ ଇମେ ଶକ୍ରାଦୟୋ ନିର୍ଵୃତା
ୟଚ୍ଚିତ୍ତେ ନିତରାଂ ପ୍ରଶାଂତକଲନେ ଲବ୍ଧ୍ଵା ମୁନିର୍ନିର୍ଵୃତଃ ।
ୟସ୍ମିନ୍ନିତ୍ୟସୁଖାଂବୁଧୌ ଗଲିତଧୀର୍ବ୍ରହ୍ମୈଵ ନ ବ୍ରହ୍ମଵିଦ୍
ୟଃ କଶ୍ଚିତ୍ସ ସୁରେଂଦ୍ରଵଂଦିତପଦୋ ନୂନଂ ମନୀଷା ମମ ॥ 5॥
ଦାସସ୍ତେଽହଂ ଦେହଦୃଷ୍ଟ୍ୟାଽସ୍ମି ଶଂଭୋ
ଜାତସ୍ତେଂଽଶୋ ଜୀଵଦୃଷ୍ଟ୍ୟା ତ୍ରିଦୃଷ୍ଟେ ।
ସର୍ଵସ୍ୟାଽଽତ୍ମନ୍ନାତ୍ମଦୃଷ୍ଟ୍ୟା ତ୍ଵମେଵେ-
ତ୍ୟେଵଂ ମେ ଧୀର୍ନିଶ୍ଚିତା ସର୍ଵଶାସ୍ତ୍ରୈଃ ॥
॥ ଇତି ଶ୍ରୀମଚ୍ଛଂକରଭଗଵତଃ କୃତୌ ମନୀଷାପଂଚକଂ ସଂପୂର୍ଣମ୍ ॥