ත්යාචාර්යස්ය ගමනේ කදාචින්මුක්ති දායකම් ।
කාශීක්ශේත්රං ප්රති සහ ගෞර්යා මාර්ගේ තු ශංකරම් ॥ (අනුෂ්ටුප්)
අංත්යවේෂධරං දෘෂ්ට්වා ගච්ඡ ගච්ඡේති චාබ්රවීත් ।
ශංකරඃසෝऽපි චාංඩලස්තං පුනඃ ප්රාහ ශංකරම් ॥ (අනුෂ්ටුප්)
අන්නමයාදන්නමයමථවා චෛතන්යමේව චෛතන්යාත් ।
යතිවර දූරීකර්තුං වාංඡසි කිං බ්රූහි ගච්ඡ ගච්ඡේති ॥ (ආර්යා වෘත්ත)
ප්රත්යග්වස්තුනි නිස්තරංගසහජානංදාවබෝධාංබුධෞ
විප්රෝऽයං ශ්වපචෝऽයමිත්යපි මහාන්කෝऽයං විභේදභ්රමඃ ।
කිං ගංගාංබුනි බිංබිතේऽංබරමණෞ චාංඩාලවීථීපයඃ
පූරේ වාऽංතරමස්ති කාංචනඝටීමෘත්කුංභයෝර්වාऽංබරේ ॥ (ශාර්දූල වික්රීඩිත)
ජාග්රත්ස්වප්නසුෂුප්තිෂු ස්ඵුටතරා යා සංවිදුජ්ජෘංභතේ
යා බ්රහ්මාදිපිපීලිකාංතතනුෂු ප්රෝතා ජගත්සාක්ෂිණී ।
සෛවාහං න ච දෘශ්යවස්ත්විති දෘඪප්රජ්ඤාපි යස්යාස්ති චේ-
ච්චාංඩාලෝऽස්තු ස තු ද්විජෝऽස්තු ගුරුරිත්යේෂා මනීෂා මම ॥ 1॥
බ්රහ්මෛවාහමිදං ජගච්ච සකලං චින්මාත්රවිස්තාරිතං
සර්වං චෛතදවිද්යයා ත්රිගුණයාऽශේෂං මයා කල්පිතම් ।
ඉත්ථං යස්ය දෘඪා මතිඃ සුඛතරේ නිත්යේ පරේ නිර්මලේ
චාංඩාලෝऽස්තු ස තු ද්විජෝऽස්තු ගුරුරිත්යේෂා මනීෂා මම ॥ 2॥
ශශ්වන්නශ්වරමේව විශ්වමඛිලං නිශ්චිත්ය වාචා ගුරෝ-
ර්නිත්යං බ්රහ්ම නිරංතරං විමෘශතා නිර්ව්යාජශාංතාත්මනා ।
භූතං භාවි ච දුෂ්කෘතං ප්රදහතා සංවින්මයේ පාවකේ
ප්රාරබ්ධාය සමර්පිතං ස්වවපුරිත්යේෂා මනීෂා මම ॥ 3॥
යා තිර්යඞ්නරදේවතාභිරහමිත්යංතඃ ස්ඵුටා ගෘහ්යතේ
යද්භාසා හෘදයාක්ෂදේහවිෂයා භාංති ස්වතෝऽචේතනාඃ ।
තාං භාස්යෛඃ පිහිතාර්කමංඩලනිභාං ස්ඵූර්තිං සදා භාවය-
න්යෝගී නිර්වෘතමානසෝ හි ගුරුරිත්යේෂා මනීෂා මම ॥ 4॥
යත්සෞඛ්යාංබුධිලේශලේශත ඉමේ ශක්රාදයෝ නිර්වෘතා
යච්චිත්තේ නිතරාං ප්රශාංතකලනේ ලබ්ධ්වා මුනිර්නිර්වෘතඃ ।
යස්මින්නිත්යසුඛාංබුධෞ ගලිතධීර්බ්රහ්මෛව න බ්රහ්මවිද්
යඃ කශ්චිත්ස සුරේංද්රවංදිතපදෝ නූනං මනීෂා මම ॥ 5॥
දාසස්තේऽහං දේහදෘෂ්ට්යාऽස්මි ශංභෝ
ජාතස්තේංऽශෝ ජීවදෘෂ්ට්යා ත්රිදෘෂ්ටේ ।
සර්වස්යාऽऽත්මන්නාත්මදෘෂ්ට්යා ත්වමේවේ-
ත්යේවං මේ ධීර්නිශ්චිතා සර්වශාස්ත්රෛඃ ॥
॥ ඉති ශ්රීමච්ඡංකරභගවතඃ කෘතෞ මනීෂාපංචකං සංපූර්ණම් ॥