අථ ශ්රී ශිවමහිම්නස්තෝත්රම් ॥
මහිම්නඃ පාරං තේ පරමවිදුෂෝ යද්යසදෘශී
ස්තුතිර්බ්රහ්මාදීනාමපි තදවසන්නාස්ත්වයි ගිරඃ ।
අථාऽවාච්යඃ සර්වඃ ස්වමතිපරිණාමාවධි ගෘණන්
මමාප්යේෂ ස්තෝත්රේ හර නිරපවාදඃ පරිකරඃ ॥ 1 ॥
අතීතඃ පංථානං තව ච මහිමා වාඞ්මනසයෝඃ
අතද්ව්යාවෘත්ත්යා යං චකිතමභිධත්තේ ශ්රුතිරපි ।
ස කස්ය ස්තෝතව්යඃ කතිවිධගුණඃ කස්ය විෂයඃ
පදේ ත්වර්වාචීනේ පතති න මනඃ කස්ය න වචඃ ॥ 2 ॥
මධුස්ඵීතා වාචඃ පරමමමෘතං නිර්මිතවතඃ
තව බ්රහ්මන් කිං වාගපි සුරගුරෝර්විස්මයපදම් ।
මම ත්වේතාං වාණීං ගුණකථනපුණ්යේන භවතඃ
පුනාමීත්යර්ථේऽස්මින් පුරමථන බුද්ධිර්ව්යවසිතා ॥ 3 ॥
තවෛශ්වර්යං යත්තජ්ජගදුදයරක්ෂාප්රලයකෘත්
ත්රයීවස්තු ව්යස්තං තිස්රුෂු ගුණභින්නාසු තනුෂු ।
අභව්යානාමස්මින් වරද රමණීයාමරමණීං
විහංතුං ව්යාක්රෝශීං විදධත ඉහෛකේ ජඩධියඃ ॥ 4 ॥
කිමීහඃ කිංකායඃ ස ඛලු කිමුපායස්ත්රිභුවනං
කිමාධාරෝ ධාතා සෘජති කිමුපාදාන ඉති ච ।
අතර්ක්යෛශ්වර්යේ ත්වය්යනවසර දුඃස්ථෝ හතධියඃ
කුතර්කෝऽයං කාංශ්චිත් මුඛරයති මෝහාය ජගතඃ ॥ 5 ॥
අජන්මානෝ ලෝකාඃ කිමවයවවංතෝऽපි ජගතාං
අධිෂ්ඨාතාරං කිං භවවිධිරනාදෘත්ය භවති ।
අනීශෝ වා කුර්යාද් භුවනජනනේ කඃ පරිකරෝ
යතෝ මංදාස්ත්වාං ප්රත්යමරවර සංශේරත ඉමේ ॥ 6 ॥
ත්රයී සාංඛ්යං යෝගඃ පශුපතිමතං වෛෂ්ණවමිති
ප්රභින්නේ ප්රස්ථානේ පරමිදමදඃ පථ්යමිති ච ।
රුචීනාං වෛචිත්ර්යාදෘජුකුටිල නානාපථජුෂාං
නෘණාමේකෝ ගම්යස්ත්වමසි පයසාමර්ණව ඉව ॥ 7 ॥
මහෝක්ෂඃ ඛට්වාංගං පරශුරජිනං භස්ම ඵණිනඃ
කපාලං චේතීයත්තව වරද තංත්රෝපකරණම් ।
සුරාස්තාං තාමෘද්ධිං දධති තු භවද්භූප්රණිහිතාං
න හි ස්වාත්මාරාමං විෂයමෘගතෘෂ්ණා භ්රමයති ॥ 8 ॥
ධ්රුවං කශ්චිත් සර්වං සකලමපරස්ත්වධ්රුවමිදං
පරෝ ධ්රෞව්යාऽධ්රෞව්යේ ජගති ගදති ව්යස්තවිෂයේ ।
සමස්තේऽප්යේතස්මින් පුරමථන තෛර්විස්මිත ඉව
ස්තුවන් ජිහ්රේමි ත්වාං න ඛලු නනු ධෘෂ්ටා මුඛරතා ॥ 9 ॥
තවෛශ්වර්යං යත්නාද් යදුපරි විරිංචිර්හරිරධඃ
පරිච්ඡේතුං යාතාවනලමනලස්කංධවපුෂඃ ।
තතෝ භක්තිශ්රද්ධා-භරගුරු-ගෘණද්භ්යාං ගිරිශ යත්
ස්වයං තස්ථේ තාභ්යාං තව කිමනුවෘත්තිර්න ඵලති ॥ 10 ॥
අයත්නාදාසාද්ය ත්රිභුවනමවෛරව්යතිකරං
දශාස්යෝ යද්බාහූනභෘත රණකංඩූ-පරවශාන් ।
ශිරඃපද්මශ්රේණී-රචිතචරණාංභෝරුහ-බලේඃ
ස්ථිරායාස්ත්වද්භක්තේස්ත්රිපුරහර විස්ඵූර්ජිතමිදම් ॥ 11 ॥
අමුෂ්ය ත්වත්සේවා-සමධිගතසාරං භුජවනං
බලාත් කෛලාසේऽපි ත්වදධිවසතෞ වික්රමයතඃ ।
අලභ්යා පාතාලේऽප්යලසචලිතාංගුෂ්ඨශිරසි
ප්රතිෂ්ඨා ත්වය්යාසීද් ධ්රුවමුපචිතෝ මුහ්යති ඛලඃ ॥ 12 ॥
යදෘද්ධිං සුත්රාම්ණෝ වරද පරමෝච්චෛරපි සතීං
අධශ්චක්රේ බාණඃ පරිජනවිධේයත්රිභුවනඃ ।
න තච්චිත්රං තස්මින් වරිවසිතරි ත්වච්චරණයෝඃ
න කස්යාප්යුන්නත්යෛ භවති ශිරසස්ත්වය්යවනතිඃ ॥ 13 ॥
අකාංඩ-බ්රහ්මාංඩ-ක්ෂයචකිත-දේවාසුරකෘපා
විධේයස්යාऽऽසීද් යස්ත්රිනයන විෂං සංහෘතවතඃ ।
ස කල්මාෂඃ කංඨේ තව න කුරුතේ න ශ්රියමහෝ
විකාරෝऽපි ශ්ලාඝ්යෝ භුවන-භය- භංග- ව්යසනිනඃ ॥ 14 ॥
අසිද්ධාර්ථා නෛව ක්වචිදපි සදේවාසුරනරේ
නිවර්තංතේ නිත්යං ජගති ජයිනෝ යස්ය විශිඛාඃ ।
ස පශ්යන්නීශ ත්වාමිතරසුරසාධාරණමභූත්
ස්මරඃ ස්මර්තව්යාත්මා න හි වශිෂු පථ්යඃ පරිභවඃ ॥ 15 ॥
මහී පාදාඝාතාද් ව්රජති සහසා සංශයපදං
පදං විෂ්ණෝර්භ්රාම්යද් භුජ-පරිඝ-රුග්ණ-ග්රහ- ගණම් ।
මුහුර්ද්යෞර්දෞස්ථ්යං යාත්යනිභෘත-ජටා-තාඩිත-තටා
ජගද්රක්ෂායෛ ත්වං නටසි නනු වාමෛව විභුතා ॥ 16 ॥
වියද්ව්යාපී තාරා-ගණ-ගුණිත-ඵේනෝද්ගම-රුචිඃ
ප්රවාහෝ වාරාං යඃ පෘෂතලඝුදෘෂ්ටඃ ශිරසි තේ ।
ජගද්ද්වීපාකාරං ජලධිවලයං තේන කෘතමිති
අනේනෛවෝන්නේයං ධෘතමහිම දිව්යං තව වපුඃ ॥ 17 ॥
රථඃ ක්ෂෝණී යංතා ශතධෘතිරගේංද්රෝ ධනුරථෝ
රථාංගේ චංද්රාර්කෞ රථ-චරණ-පාණිඃ ශර ඉති ।
දිධක්ෂෝස්තේ කෝऽයං ත්රිපුරතෘණමාඩංබර-විධිඃ
විධේයෛඃ ක්රීඩංත්යෝ න ඛලු පරතංත්රාඃ ප්රභුධියඃ ॥ 18 ॥
හරිස්තේ සාහස්රං කමල බලිමාධාය පදයෝඃ
යදේකෝනේ තස්මින් නිජමුදහරන්නේත්රකමලම් ।
ගතෝ භක්ත්යුද්රේකඃ පරිණතිමසෞ චක්රවපුෂඃ
ත්රයාණාං රක්ෂායෛ ත්රිපුරහර ජාගර්ති ජගතාම් ॥ 19 ॥
ක්රතෞ සුප්තේ ජාග්රත් ත්වමසි ඵලයෝගේ ක්රතුමතාං
ක්ව කර්ම ප්රධ්වස්තං ඵලති පුරුෂාරාධනමෘතේ ।
අතස්ත්වාං සංප්රේක්ෂ්ය ක්රතුෂු ඵලදාන-ප්රතිභුවං
ශ්රුතෞ ශ්රද්ධාං බධ්වා දෘඪපරිකරඃ කර්මසු ජනඃ ॥ 20 ॥
ක්රියාදක්ෂෝ දක්ෂඃ ක්රතුපතිරධීශස්තනුභෘතාං
ඍෂීණාමාර්ත්විජ්යං ශරණද සදස්යාඃ සුර-ගණාඃ ।
ක්රතුභ්රංශස්ත්වත්තඃ ක්රතුඵල-විධාන-ව්යසනිනඃ
ධ්රුවං කර්තුඃ ශ්රද්ධා-විධුරමභිචාරාය හි මඛාඃ ॥ 21 ॥
ප්රජානාථං නාථ ප්රසභමභිකං ස්වාං දුහිතරං
ගතං රෝහිද් භූතාං රිරමයිෂුමෘෂ්යස්ය වපුෂා ।
ධනුෂ්පාණේර්යාතං දිවමපි සපත්රාකෘතමමුං
ත්රසංතං තේऽද්යාපි ත්යජති න මෘගව්යාධරභසඃ ॥ 22 ॥
ස්වලාවණ්යාශංසා ධෘතධනුෂමහ්නාය තෘණවත්
පුරඃ ප්ලුෂ්ටං දෘෂ්ට්වා පුරමථන පුෂ්පායුධමපි ।
යදි ස්ත්රෛණං දේවී යමනිරත-දේහාර්ධ-ඝටනාත්
අවෛති ත්වාමද්ධා බත වරද මුග්ධා යුවතයඃ ॥ 23 ॥
ශ්මශානේෂ්වාක්රීඩා ස්මරහර පිශාචාඃ සහචරාඃ
චිතා-භස්මාලේපඃ ස්රගපි නෘකරෝටී-පරිකරඃ ।
අමංගල්යං ශීලං තව භවතු නාමෛවමඛිලං
තථාපි ස්මර්තॄණාං වරද පරමං මංගලමසි ॥ 24 ॥
මනඃ ප්රත්යක්චිත්තේ සවිධමවිධායාත්ත-මරුතඃ
ප්රහෘෂ්යද්රෝමාණඃ ප්රමද-සලිලෝත්සංගති-දෘශඃ ।
යදාලෝක්යාහ්ලාදං හ්රද ඉව නිමජ්යාමෘතමයේ
දධත්යංතස්තත්ත්වං කිමපි යමිනස්තත් කිල භවාන් ॥ 25 ॥
ත්වමර්කස්ත්වං සෝමස්ත්වමසි පවනස්ත්වං හුතවහඃ
ත්වමාපස්ත්වං ව්යෝම ත්වමු ධරණිරාත්මා ත්වමිති ච ।
පරිච්ඡින්නාමේවං ත්වයි පරිණතා බිභ්රති ගිරං
න විද්මස්තත්තත්ත්වං වයමිහ තු යත් ත්වං න භවසි ॥ 26 ॥
ත්රයීං තිස්රෝ වෘත්තීස්ත්රිභුවනමථෝ ත්රීනපි සුරාන්
අකාරාද්යෛර්වර්ණෛස්ත්රිභිරභිදධත් තීර්ණවිකෘති ।
තුරීයං තේ ධාම ධ්වනිභිරවරුංධානමණුභිඃ
සමස්තං ව්යස්තං ත්වාං ශරණද ගෘණාත්යෝමිති පදම් ॥ 27 ॥
භවඃ ශර්වෝ රුද්රඃ පශුපතිරථෝග්රඃ සහමහාන්
තථා භීමේශානාවිති යදභිධානාෂ්ටකමිදම් ।
අමුෂ්මින් ප්රත්යේකං ප්රවිචරති දේව ශ්රුතිරපි
ප්රියායාස්මෛධාම්නේ ප්රණිහිත-නමස්යෝऽස්මි භවතේ ॥ 28 ॥
නමෝ නේදිෂ්ඨාය ප්රියදව දවිෂ්ඨාය ච නමඃ
නමඃ ක්ෂෝදිෂ්ඨාය ස්මරහර මහිෂ්ඨාය ච නමඃ ।
නමෝ වර්ෂිෂ්ඨාය ත්රිනයන යවිෂ්ඨාය ච නමඃ
නමඃ සර්වස්මෛ තේ තදිදමතිසර්වාය ච නමඃ ॥ 29 ॥
බහුල-රජසේ විශ්වෝත්පත්තෞ භවාය නමෝ නමඃ
ප්රබල-තමසේ තත් සංහාරේ හරාය නමෝ නමඃ ।
ජන-සුඛකෘතේ සත්ත්වෝද්රික්තෞ මෘඩාය නමෝ නමඃ
ප්රමහසි පදේ නිස්ත්රෛගුණ්යේ ශිවාය නමෝ නමඃ ॥ 30 ॥
කෘශ-පරිණති-චේතඃ ක්ලේශවශ්යං ක්ව චේදං ක්ව ච තව ගුණ-සීමෝල්ලංඝිනී ශශ්වදෘද්ධිඃ ।
ඉති චකිතමමංදීකෘත්ය මාං භක්තිරාධාද් වරද චරණයෝස්තේ වාක්ය-පුෂ්පෝපහාරම් ॥ 31 ॥
අසිත-ගිරි-සමං ස්යාත් කජ්ජලං සිංධු-පාත්රේ සුර-තරුවර-ශාඛා ලේඛනී පත්රමුර්වී ।
ලිඛති යදි ගෘහීත්වා ශාරදා සර්වකාලං තදපි තව ගුණානාමීශ පාරං න යාති ॥ 32 ॥
අසුර-සුර-මුනීංද්රෛරර්චිතස්යේංදු-මෞලේඃ ග්රථිත-ගුණමහිම්නෝ නිර්ගුණස්යේශ්වරස්ය ।
සකල-ගණ-වරිෂ්ඨඃ පුෂ්පදංතාභිධානඃ රුචිරමලඝුවෘත්තෛඃ ස්තෝත්රමේතච්චකාර ॥ 33 ॥
අහරහරනවද්යං ධූර්ජටේඃ ස්තෝත්රමේතත් පඨති පරමභක්ත්යා ශුද්ධ-චිත්තඃ පුමාන් යඃ ।
ස භවති ශිවලෝකේ රුද්රතුල්යස්තථාऽත්ර ප්රචුරතර-ධනායුඃ පුත්රවාන් කීර්තිමාංශ්ච ॥ 34 ॥
මහේශාන්නාපරෝ දේවෝ මහිම්නෝ නාපරා ස්තුතිඃ ।
අඝෝරාන්නාපරෝ මංත්රෝ නාස්ති තත්ත්වං ගුරෝඃ පරම් ॥ 35 ॥
දීක්ෂා දානං තපස්තීර්ථං ජ්ඤානං යාගාදිකාඃ ක්රියාඃ ।
මහිම්නස්තව පාඨස්ය කලාං නාර්හංති ෂෝඩශීම් ॥ 36 ॥
කුසුමදශන-නාමා සර්ව-ගංධර්ව-රාජඃ
ශශිධරවර-මෞලේර්දේවදේවස්ය දාසඃ ।
ස ඛලු නිජ-මහිම්නෝ භ්රෂ්ට ඒවාස්ය රෝෂාත්
ස්තවනමිදමකාර්ෂීද් දිව්ය-දිව්යං මහිම්නඃ ॥ 37 ॥
සුරගුරුමභිපූජ්ය ස්වර්ග-මෝක්ෂෛක-හේතුං
පඨති යදි මනුෂ්යඃ ප්රාංජලිර්නාන්ය-චේතාඃ ।
ව්රජති ශිව-සමීපං කින්නරෛඃ ස්තූයමානඃ
ස්තවනමිදමමෝඝං පුෂ්පදංතප්රණීතම් ॥ 38 ॥
ශ්රී පුෂ්පදංත-මුඛ-පංකජ-නිර්ගතේන
ස්තෝත්රේණ කිල්බිෂ-හරේණ හර-ප්රියේණ ।
කංඨස්ථිතේන පඨිතේන සමාහිතේන
සුප්රීණිතෝ භවති භූතපතිර්මහේශඃ ॥ 43 ॥
ආසමාප්තමිදං ස්තෝත්රං පුණ්යං ගංධර්ව-භාෂිතම් ।
අනෞපම්යං මනෝහාරි සර්වමීශ්වරවර්ණනම් ॥ 39 ॥
තව තත්ත්වං න ජානාමි කීදෘශෝऽසි මහේශ්වර ।
යාදෘශෝऽසි මහාදේව තාදෘශාය නමෝ නමඃ ॥ 41 ॥
ඒකකාලං ද්විකාලං වා ත්රිකාලං යඃ පඨේන්නරඃ ।
සර්වපාප-විනිර්මුක්තඃ ශිව ලෝකේ මහීයතේ ॥ 42 ॥
ඉත්යේෂා වාඞ්මයී පූජා ශ්රීමච්ඡංකර-පාදයෝඃ ।
අර්පිතා තේන දේවේශඃ ප්රීයතාං මේ සදාශිවඃ ॥ 40 ॥
॥ ඉති ශ්රී පුෂ්පදංත විරචිතං ශිවමහිම්නඃ ස්තෝත්රං සමාප්තම් ॥