atha pañchadaśō’dhyāyaḥ ।
puruṣōttamaprāptiyōgaḥ
śrībhagavānuvācha ।
ūrdhvamūlamadhaḥśākhamaśvatthaṃ prāhuravyayam ।
Chandāṃsi yasya parṇāni yastaṃ vēda sa vēdavit ॥ 1 ॥
adhaśchōrdhvaṃ prasṛtāstasya śākhā guṇapravṛddhā viṣayapravālāḥ।
adhaścha mūlānyanusantatāni karmānubandhīni manuṣyalōkē ॥ 2 ॥
na rūpamasyēha tathōpalabhyatē nāntō na chādirna cha sampratiṣṭhā।
aśvatthamēnaṃ suvirūḍhamūlamasaṅgaśastrēṇa dṛḍhēna Chittvā ॥ 3 ॥
tataḥ padaṃ tatparimārgitavyaṃ yasmingatā na nivartanti bhūyaḥ।
tamēva chādyaṃ puruṣaṃ prapadyē yataḥ pravṛttiḥ prasṛtā purāṇī ॥ 4 ॥
nirmānamōhā jitasaṅgadōṣā adhyātmanityā vinivṛttakāmāḥ।
dvandvairvimuktāḥ sukhaduḥkhasañjñairgachChantyamūḍhāḥ padamavyayaṃ tat ॥ 5 ॥
na tadbhāsayatē sūryō na śaśāṅkō na pāvakaḥ ।
yadgatvā na nivartantē taddhāma paramaṃ mama ॥ 6 ॥
mamaivāṃśō jīvalōkē jīvabhūtaḥ sanātanaḥ ।
manaḥṣaṣṭhānīndriyāṇi prakṛtisthāni karṣati ॥ 7 ॥
śarīraṃ yadavāpnōti yachchāpyutkrāmatīśvaraḥ ।
gṛhītvaitāni saṃyāti vāyurgandhānivāśayāt ॥ 8 ॥
śrōtraṃ chakṣuḥ sparśanaṃ cha rasanaṃ ghrāṇamēva cha ।
adhiṣṭhāya manaśchāyaṃ viṣayānupasēvatē ॥ 9 ॥
utkrāmantaṃ sthitaṃ vāpi bhuñjānaṃ vā guṇānvitam ।
vimūḍhā nānupaśyanti paśyanti jñānachakṣuṣaḥ ॥ 10 ॥
yatantō yōginaśchainaṃ paśyantyātmanyavasthitam ।
yatantō’pyakṛtātmānō nainaṃ paśyantyachētasaḥ ॥ 11 ॥
yadādityagataṃ tējō jagadbhāsayatē’khilam ।
yachchandramasi yachchāgnau tattējō viddhi māmakam ॥ 12 ॥
gāmāviśya cha bhūtāni dhārayāmyahamōjasā ।
puṣṇāmi chauṣadhīḥ sarvāḥ sōmō bhūtvā rasātmakaḥ ॥ 13 ॥
ahaṃ vaiśvānarō bhūtvā prāṇināṃ dēhamāśritaḥ ।
prāṇāpānasamāyuktaḥ pachāmyannaṃ chaturvidham ॥ 14 ॥
sarvasya chāhaṃ hṛdi sanniviṣṭō mattaḥ smṛtirjñānamapōhanaṃ cha।
vēdaiścha sarvairahamēva vēdyō vēdāntakṛdvēdavidēva chāham ॥ 15 ॥
dvāvimau puruṣau lōkē kṣaraśchākṣara ēva cha ।
kṣaraḥ sarvāṇi bhūtāni kūṭasthō’kṣara uchyatē ॥ 16 ॥
uttamaḥ puruṣastvanyaḥ paramātmētyudhāhṛtaḥ ।
yō lōkatrayamāviśya bibhartyavyaya īśvaraḥ ॥ 17 ॥
yasmātkṣaramatītō’hamakṣarādapi chōttamaḥ ।
atō’smi lōkē vēdē cha prathitaḥ puruṣōttamaḥ ॥ 18 ॥
yō māmēvamasammūḍhō jānāti puruṣōttamam ।
sa sarvavidbhajati māṃ sarvabhāvēna bhārata ॥ 19 ॥
iti guhyatamaṃ śāstramidamuktaṃ mayānagha ।
ētadbuddhvā buddhimānsyātkṛtakṛtyaścha bhārata ॥ 20 ॥
ōṃ tatsaditi śrīmadbhagavadgītāsūpaniṣatsu brahmavidyāyāṃ yōgaśāstrē śrīkṛṣṇārjunasaṃvādē
puruṣōttamayōgō nāma pañchadaśō’dhyāyaḥ ॥15 ॥