వ్రజే ప్రసిద్ధం నవనీతచౌరం
గోపాంగనానాం చ దుకూలచౌరమ్ ।
అనేకజన్మార్జితపాపచౌరం
చౌరాగ్రగణ్యం పురుషం నమామి ॥ 1॥
శ్రీరాధికాయా హృదయస్య చౌరం
నవాంబుదశ్యామలకాంతిచౌరమ్ ।
పదాశ్రితానాం చ సమస్తచౌరం
చౌరాగ్రగణ్యం పురుషం నమామి ॥ 2॥
అకించనీకృత్య పదాశ్రితం యః
కరోతి భిక్షుం పథి గేహహీనమ్ ।
కేనాప్యహో భీషణచౌర ఈదృగ్-
దృష్టఃశ్రుతో వా న జగత్త్రయేఽపి ॥ 3॥
యదీయ నామాపి హరత్యశేషం
గిరిప్రసారాన్ అపి పాపరాశీన్ ।
ఆశ్చర్యరూపో నను చౌర ఈదృగ్
దృష్టః శ్రుతో వా న మయా కదాపి ॥ 4॥
ధనం చ మానం చ తథేంద్రియాణి
ప్రాణాంశ్చ హృత్వా మమ సర్వమేవ ।
పలాయసే కుత్ర ధృతోఽద్య చౌర
త్వం భక్తిదామ్నాసి మయా నిరుద్ధః ॥ 5॥
ఛినత్సి ఘోరం యమపాశబంధం
భినత్సి భీమం భవపాశబంధమ్ ।
ఛినత్సి సర్వస్య సమస్తబంధం
నైవాత్మనో భక్తకృతం తు బంధమ్ ॥ 6॥
మన్మానసే తామసరాశిఘోరే
కారాగృహే దుఃఖమయే నిబద్ధః ।
లభస్వ హే చౌర! హరే! చిరాయ
స్వచౌర్యదోషోచితమేవ దండమ్ ॥ 7॥
కారాగృహే వస సదా హృదయే మదీయే
మద్భక్తిపాశదృఢబంధననిశ్చలః సన్ ।
త్వాం కృష్ణ హే! ప్రలయకోటిశతాంతరేఽపి
సర్వస్వచౌర! హృదయాన్ న హి మోచయామి ॥ 8॥
ఇతి శ్రీబిల్వమంగలఠాకూరవిరచితం చౌరాష్టకం సంపూర్ణమ్ ।
చౌరగ్రగణ్య పురుషాష్టకమ్ ।