ଅଥ ଷୋଡଶୋଽଧ୍ୟାୟଃ ।
ଦୈଵାସୁରସଂପଦ୍ଵିଭାଗୟୋଗଃ
ଶ୍ରୀଭଗଵାନୁଵାଚ ।
ଅଭୟଂ ସତ୍ତ୍ଵସଂଶୁଦ୍ଧିର୍ଜ୍ଞାନୟୋଗଵ୍ୟଵସ୍ଥିତିଃ ।
ଦାନଂ ଦମଶ୍ଚ ୟଜ୍ଞଶ୍ଚ ସ୍ଵାଧ୍ୟାୟସ୍ତପ ଆର୍ଜଵମ୍ ॥ 1 ॥
ଅହିଂସା ସତ୍ୟମକ୍ରୋଧସ୍ତ୍ୟାଗଃ ଶାଂତିରପୈଶୁନମ୍ ।
ଦୟା ଭୂତେଷ୍ଵଲୋଲୁପ୍ତ୍ଵଂ ମାର୍ଦଵଂ ହ୍ରୀରଚାପଲମ୍ ॥ 2 ॥
ତେଜଃ କ୍ଷମା ଧୃତିଃ ଶୌଚମଦ୍ରୋହୋ ନାତିମାନିତା ।
ଭଵଂତି ସଂପଦଂ ଦୈଵୀମଭିଜାତସ୍ୟ ଭାରତ ॥ 3 ॥
ଦଂଭୋ ଦର୍ପୋଽଭିମାନଶ୍ଚ କ୍ରୋଧଃ ପାରୁଷ୍ୟମେଵ ଚ ।
ଅଜ୍ଞାନଂ ଚାଭିଜାତସ୍ୟ ପାର୍ଥ ସଂପଦମାସୁରୀମ୍ ॥ 4 ॥
ଦୈଵୀ ସଂପଦ୍ଵିମୋକ୍ଷାୟ ନିବଂଧାୟାସୁରୀ ମତା ।
ମା ଶୁଚଃ ସଂପଦଂ ଦୈଵୀମଭିଜାତୋଽସି ପାଂଡଵ ॥ 5 ॥
ଦ୍ଵୌ ଭୂତସର୍ଗୌ ଲୋକେଽସ୍ମିଂଦୈଵ ଆସୁର ଏଵ ଚ ।
ଦୈଵୋ ଵିସ୍ତରଶଃ ପ୍ରୋକ୍ତ ଆସୁରଂ ପାର୍ଥ ମେ ଶୃଣୁ ॥ 6 ॥
ପ୍ରଵୃତ୍ତିଂ ଚ ନିଵୃତ୍ତିଂ ଚ ଜନା ନ ଵିଦୁରାସୁରାଃ ।
ନ ଶୌଚଂ ନାପି ଚାଚାରୋ ନ ସତ୍ୟଂ ତେଷୁ ଵିଦ୍ୟତେ ॥ 7 ॥
ଅସତ୍ୟମପ୍ରତିଷ୍ଠଂ ତେ ଜଗଦାହୁରନୀଶ୍ଵରମ୍ ।
ଅପରସ୍ପରସଂଭୂତଂ କିମନ୍ୟତ୍କାମହୈତୁକମ୍ ॥ 8 ॥
ଏତାଂ ଦୃଷ୍ଟିମଵଷ୍ଟଭ୍ୟ ନଷ୍ଟାତ୍ମାନୋଽଲ୍ପବୁଦ୍ଧୟଃ ।
ପ୍ରଭଵଂତ୍ୟୁଗ୍ରକର୍ମାଣଃ କ୍ଷୟାୟ ଜଗତୋଽହିତାଃ ॥ 9 ॥
କାମମାଶ୍ରିତ୍ୟ ଦୁଷ୍ପୂରଂ ଦଂଭମାନମଦାନ୍ଵିତାଃ ।
ମୋହାଦ୍ଗୃହୀତ୍ଵାସଦ୍ଗ୍ରାହାନ୍ପ୍ରଵର୍ତଂତେଽଶୁଚିଵ୍ରତାଃ ॥ 10 ॥
ଚିଂତାମପରିମେୟାଂ ଚ ପ୍ରଲୟାଂତାମୁପାଶ୍ରିତାଃ ।
କାମୋପଭୋଗପରମା ଏତାଵଦିତି ନିଶ୍ଚିତାଃ ॥ 11 ॥
ଆଶାପାଶଶତୈର୍ବଦ୍ଧାଃ କାମକ୍ରୋଧପରାୟଣାଃ ।
ଈହଂତେ କାମଭୋଗାର୍ଥମନ୍ୟାୟେନାର୍ଥସଂଚୟାନ୍ ॥ 12 ॥
ଇଦମଦ୍ୟ ମୟା ଲବ୍ଧମିମଂ ପ୍ରାପ୍ସ୍ୟେ ମନୋରଥମ୍ ।
ଇଦମସ୍ତୀଦମପି ମେ ଭଵିଷ୍ୟତି ପୁନର୍ଧନମ୍ ॥ 13 ॥
ଅସୌ ମୟା ହତଃ ଶତ୍ରୁର୍ହନିଷ୍ୟେ ଚାପରାନପି ।
ଈଶ୍ଵରୋଽହମହଂ ଭୋଗୀ ସିଦ୍ଧୋଽହଂ ବଲଵାନ୍ସୁଖୀ ॥ 14 ॥
ଆଢ୍ୟୋଽଭିଜନଵାନସ୍ମି କୋଽନ୍ୟୋସ୍ତି ସଦୃଶୋ ମୟା ।
ୟକ୍ଷ୍ୟେ ଦାସ୍ୟାମି ମୋଦିଷ୍ୟ ଇତ୍ୟଜ୍ଞାନଵିମୋହିତାଃ ॥ 15 ॥
ଅନେକଚିତ୍ତଵିଭ୍ରାଂତା ମୋହଜାଲସମାଵୃତାଃ ।
ପ୍ରସକ୍ତାଃ କାମଭୋଗେଷୁ ପତଂତି ନରକେଽଶୁଚୌ ॥ 16 ॥
ଆତ୍ମସଂଭାଵିତାଃ ସ୍ତବ୍ଧା ଧନମାନମଦାନ୍ଵିତାଃ ।
ୟଜଂତେ ନାମୟଜ୍ଞୈସ୍ତେ ଦଂଭେନାଵିଧିପୂର୍ଵକମ୍ ॥ 17 ॥
ଅହଂକାରଂ ବଲଂ ଦର୍ପଂ କାମଂ କ୍ରୋଧଂ ଚ ସଂଶ୍ରିତାଃ ।
ମାମାତ୍ମପରଦେହେଷୁ ପ୍ରଦ୍ଵିଷଂତୋଽଭ୍ୟସୂୟକାଃ ॥ 18 ॥
ତାନହଂ ଦ୍ଵିଷତଃ କ୍ରୂରାନ୍ସଂସାରେଷୁ ନରାଧମାନ୍ ।
କ୍ଷିପାମ୍ୟଜସ୍ରମଶୁଭାନାସୁରୀଷ୍ଵେଵ ୟୋନିଷୁ ॥ 19 ॥
ଆସୁରୀଂ ୟୋନିମାପନ୍ନା ମୂଢା ଜନ୍ମନି ଜନ୍ମନି ।
ମାମପ୍ରାପ୍ୟୈଵ କୌଂତେୟ ତତୋ ୟାଂତ୍ୟଧମାଂ ଗତିମ୍ ॥ 20 ॥
ତ୍ରିଵିଧଂ ନରକସ୍ୟେଦଂ ଦ୍ଵାରଂ ନାଶନମାତ୍ମନଃ ।
କାମଃ କ୍ରୋଧସ୍ତଥା ଲୋଭସ୍ତସ୍ମାଦେତତ୍ତ୍ରୟଂ ତ୍ୟଜେତ୍ ॥ 21 ॥
ଏତୈର୍ଵିମୁକ୍ତଃ କୌଂତେୟ ତମୋଦ୍ଵାରୈସ୍ତ୍ରିଭିର୍ନରଃ ।
ଆଚରତ୍ୟାତ୍ମନଃ ଶ୍ରେୟସ୍ତତୋ ୟାତି ପରାଂ ଗତିମ୍ ॥ 22 ॥
ୟଃ ଶାସ୍ତ୍ରଵିଧିମୁତ୍ସୃଜ୍ୟ ଵର୍ତତେ କାମକାରତଃ ।
ନ ସ ସିଦ୍ଧିମଵାପ୍ନୋତି ନ ସୁଖଂ ନ ପରାଂ ଗତିମ୍ ॥ 23 ॥
ତସ୍ମାଚ୍ଛାସ୍ତ୍ରଂ ପ୍ରମାଣଂ ତେ କାର୍ୟାକାର୍ୟଵ୍ୟଵସ୍ଥିତୌ ।
ଜ୍ଞାତ୍ଵା ଶାସ୍ତ୍ରଵିଧାନୋକ୍ତଂ କର୍ମ କର୍ତୁମିହାର୍ହସି ॥ 24 ॥
ଓଂ ତତ୍ସଦିତି ଶ୍ରୀମଦ୍ଭଗଵଦ୍ଗୀତାସୂପନିଷତ୍ସୁ ବ୍ରହ୍ମଵିଦ୍ୟାୟାଂ ୟୋଗଶାସ୍ତ୍ରେ ଶ୍ରୀକୃଷ୍ଣାର୍ଜୁନସଂଵାଦେ
ଦୈଵାସୁରସଂପଦ୍ଵିଭାଗୟୋଗୋ ନାମ ଷୋଡଶୋଽଧ୍ୟାୟଃ ॥16 ॥