ජනක උවාච ॥
හංතාත්මජ්ඤානස්ය ධීරස්ය ඛේලතෝ භෝගලීලයා ।
න හි සංසාරවාහීකෛර්මූඪෛඃ සහ සමානතා ॥ 4-1॥
යත් පදං ප්රේප්සවෝ දීනාඃ ශක්රාද්යාඃ සර්වදේවතාඃ ।
අහෝ තත්ර ස්ථිතෝ යෝගී න හර්ෂමුපගච්ඡති ॥ 4-2॥
තජ්ජ්ඤස්ය පුණ්යපාපාභ්යාං ස්පර්ශෝ හ්යංතර්න ජායතේ ।
න හ්යාකාශස්ය ධූමේන දෘශ්යමානාපි සංගතිඃ ॥ 4-3॥
ආත්මෛවේදං ජගත්සර්වං ජ්ඤාතං යේන මහාත්මනා ।
යදෘච්ඡයා වර්තමානං තං නිෂේද්ධුං ක්ෂමේත කඃ ॥ 4-4॥
ආබ්රහ්මස්තංබපර්යංතේ භූතග්රාමේ චතුර්විධේ ।
විජ්ඤස්යෛව හි සාමර්ථ්යමිච්ඡානිච්ඡාවිවර්ජනේ ॥ 4-5॥
ආත්මානමද්වයං කශ්චිජ්ජානාති ජගදීශ්වරම් ।
යද් වේත්ති තත්ස කුරුතේ න භයං තස්ය කුත්රචිත් ॥ 4-6॥