ಪ್ರಕೃತ್ಯಾ ಸುರಮ್ಯಂ ವಿಶಾಲಂ ಪ್ರಕಾಮಂ
ಸರಿತ್ತಾರಹಾರೈಃ ಲಲಾಮಂ ನಿಕಾಮಮ್ ।
ಹಿಮಾದ್ರಿರ್ಲಲಾಟೇ ಪದೇ ಚೈವ ಸಿಂಧುಃ
ಪ್ರಿಯಂ ಭಾರತಂ ಸರ್ವದಾ ದರ್ಶನೀಯಮ್ ॥ 1 ॥
ಧನಾನಾಂ ನಿಧಾನಂ ಧರಾಯಾಂ ಪ್ರಧಾನಂ
ಇದಂ ಭಾರತಂ ದೇವಲೋಕೇನ ತುಲ್ಯಮ್ ।
ಯಶೋ ಯಸ್ಯ ಶುಭ್ರಂ ವಿದೇಶೇಷು ಗೀತಂ
ಪ್ರಿಯಂ ಭಾರತಂ ತತ್ ಸದಾ ಪೂಜನೀಯಮ್ ॥ 2 ॥
ಅನೇಕೇ ಪ್ರದೇಶಾಃ ಅನೇಕೇ ಚ ವೇಷಾಃ
ಅನೇಕಾನಿ ರುಪಾಣಿ ಭಾಷಾ ಅನೇಕಾಃ ।
ಪರಂ ಯತ್ರ ಸರ್ವೇ ವಯಂ ಭಾರತೀಯಾಃ
ಪ್ರಿಯಂ ಭಾರತಂ ತತ್ ಸದಾ ರಕ್ಷಣೀಯಮ್ ॥ 3 ॥
ವಯಂ ಭಾರತೀಯಾಃ ಸ್ವದೇಶಂ ನಮಾಮಃ
ಪರಂ ಧರ್ಮಮೇಕಂ ಸದಾ ಮಾನಯಾಮಃ ।
ತದರ್ಥಂ ಧನಂ ಜೀವನಂ ಚಾರ್ಪಯಾಮ
ಪ್ರಿಯಂ ಭಾರತಂ ಮೇ ಸದಾ ವಂದನೀಯಮ್ ॥ 4 ॥
ರಚನ: ಡಾ. ಚಂದ್ರಭಾನು ತ್ರಿಪಾಠೀ