॥ ତୃତୀୟଃ ସର୍ଗଃ ॥
॥ ମୁଗ୍ଧମଧୁସୂଦନଃ ॥
କଂସାରିରପି ସଂସାରଵାସନାବଂଧଶୃଂଖଲାମ୍ ।
ରାଧାମାଧାୟ ହୃଦୟେ ତତ୍ୟାଜ ଵ୍ରଜସୁଂଦରୀଃ ॥ 18 ॥
ଇତସ୍ତତସ୍ତାମନୁସୃତ୍ୟ ରାଧିକା-ମନଂଗବାଣଵ୍ରଣଖିନ୍ନମାନସଃ ।
କୃତାନୁତାପଃ ସ କଲିଂଦନଂଦିନୀ-ତଟାଂତକୁଂଜେ ଵିଷସାଦ ମାଧଵଃ ॥ 19 ॥
॥ ଗୀତଂ 7 ॥
ମାମିୟଂ ଚଲିତା ଵିଲୋକ୍ୟ ଵୃତଂ ଵଧୂନିଚୟେନ ।
ସାପରାଧତୟା ମୟାପି ନ ଵାରିତାତିଭୟେନ ॥
ହରି ହରି ହତାଦରତୟା ଗତା ସା କୁପିତେଵ ॥ 1 ॥
କିଂ କରିଷ୍ୟତି କିଂ ଵଦିଷ୍ୟତି ସା ଚିରଂ ଵିରହେଣ ।
କିଂ ଧନେନ ଜନେନ କିଂ ମମ ଜୀଵନେନ ଗୃହେଣ ॥ 2 ॥
ଚିଂତୟାମି ତଦାନନଂ କୁଟିଲଭ୍ରୁ କୋପଭରେଣ ।
ଶୋଣପଦ୍ମମିଵୋପରି ଭ୍ରମତାକୁଲଂ ଭ୍ରମରେଣ ॥ 3 ॥
ତାମହଂ ହୃଦି ସଂଗତାମନିଶଂ ଭୃଶଂ ରମୟାମି ।
କିଂ ଵନେଽନୁସରାମି ତାମିହ କିଂ ଵୃଥା ଵିଲପାମି ॥ 4 ॥
ତନ୍ଵି ଖିନ୍ନମସୂୟୟା ହୃଦୟଂ ତଵାକଲୟାମି ।
ତନ୍ନ ଵେଦ୍ମି କୁତୋ ଗତାସି ନ ତେନ ତେଽନୁନୟାମି ॥ 5 ॥
ଦୃଶ୍ୟତେ ପୁରତୋ ଗତାଗତମେଵ ମେ ଵିଦଧାସି ।
କିଂ ପୁରେଵ ସସଂଭ୍ରମଂ ପରିରଂଭଣଂ ନ ଦଦାସି ॥ 6 ॥
କ୍ଷମ୍ୟତାମପରଂ କଦାପି ତଵେଦୃଶଂ ନ କରୋମି ।
ଦେହି ସୁଂଦରି ଦର୍ଶନଂ ମମ ମନ୍ମଥେନ ଦୁନୋମି ॥ 7 ॥
ଵର୍ଣିତଂ ଜୟଦେଵକେନ ହରେରିଦଂ ପ୍ରଵଣେନ ।
କିଂଦୁବିଲ୍ଵସମୁଦ୍ରସଂଭଵରୋହିଣୀରମଣେନ ॥ 8 ॥
ହୃଦି ବିସଲତାହାରୋ ନାୟଂ ଭୁଜଂଗମନାୟକଃ କୁଵଲୟଦଲଶ୍ରେଣୀ କଂଠେ ନ ସା ଗରଲଦ୍ୟୁତିଃ ।
ମଲୟଜରଜୋ ନେଦଂ ଭସ୍ମ ପ୍ରିୟାରହିତେ ମୟି ପ୍ରହର ନ ହରଭ୍ରାଂତ୍ୟାନଂଗ କ୍ରୁଧା କିମୁ ଧାଵସି ॥ 20 ॥
ପାଣୌ ମା କୁରୁ ଚୂତସାୟକମମୁଂ ମା ଚାପମାରୋପୟ କ୍ରୀଡାନିର୍ଜିତଵିଶ୍ଵ ମୂର୍ଛିତଜନାଘାତେନ କିଂ ପୌରୁଷମ୍ ।
ତସ୍ୟା ଏଵ ମୃଗୀଦୃଶୋ ମନସିଜପ୍ରେଂଖତ୍କଟାକ୍ଷାଶୁଗ-ଶ୍ରେଣୀଜର୍ଜରିତଂ ମନାଗପି ମନୋ ନାଦ୍ୟାପି ସଂଧୁକ୍ଷତେ ॥ 21 ॥
ଭ୍ରୂଚାପେ ନିହିତଃ କଟାକ୍ଷଵିଶିଖୋ ନିର୍ମାତୁ ମର୍ମଵ୍ୟଥାଂ ଶ୍ୟାମାତ୍ମା କୁଟିଲଃ କରୋତୁ କବରୀଭାରୋଽପି ମାରୋଦ୍ୟମମ୍ ।
ମୋହଂ ତାଵଦୟଂ ଚ ତନ୍ଵି ତନୁତାଂ ବିଂବାଦରୋ ରାଗଵାନ୍ ସଦ୍ଵୃତ୍ତସ୍ତନମଣ୍ଦଲସ୍ତଵ କଥଂ ପ୍ରାଣୈର୍ମମ କ୍ରୀଡତି ॥ 22 ॥
ତାନି ସ୍ପର୍ଶସୁଖାନି ତେ ଚ ତରଲାଃ ସ୍ନିଗ୍ଧା ଦୃଶୋର୍ଵିଭ୍ରମା-ସ୍ତଦ୍ଵକ୍ତ୍ରାଂବୁଜସୌରଭଂ ସ ଚ ସୁଧାସ୍ୟଂଦୀ ଗିରାଂ ଵକ୍ରିମା ।
ସା ବିଂବାଧରମାଧୁରୀତି ଵିଷୟାସଂଗେଽପି ଚେନ୍ମାନସଂ ତସ୍ୟାଂ ଲଗ୍ନସମାଧି ହଂତ ଵିରହଵ୍ୟାଧିଃ କଥଂ ଵର୍ଧତେ ॥ 23 ॥
ଭ୍ରୂପଲ୍ଲଵଂ ଧନୁରପାଂଗତରଂଗିତାନି ବାଣାଃ ଗୁଣଃ ଶ୍ରଵଣପାଲିରିତି ସ୍ମରେଣ ।
ତସ୍ୟାମନଂଗଜୟଜଂଗମଦେଵତାୟାଂ ଅସ୍ତ୍ରାଣି ନିର୍ଜିତଜଗଂତି କିମର୍ପିତାନି ॥ 24 ॥
[ଏଷଃ ଶ୍ଲୋକଃ କେଷୁଚନ ସଂସ୍କରଣେଷୁ ଵିଦ୍ୟତେ]
ତିର୍ୟକ୍କଂଠ ଵିଲୋଲ ମୌଲି ତରଲୋତ୍ତଂ ସସ୍ୟ ଵଂଶୋଚ୍ଚରଦ୍-
ଦୀପ୍ତିସ୍ଥାନ କୃତାଵଧାନ ଲଲନା ଲକ୍ଷୈର୍ନ ସଂଲକ୍ଷିତାଃ ।
ସଂମୁଗ୍ଧେ ମଧୁସୂଦନସ୍ୟ ମଧୁରେ ରାଧାମୁଖେଂଦୌ ସୁଧା-
ସାରେ କଂଦଲିତାଶ୍ଚିରଂ ଦଧତୁ ଵଃ କ୍ଷେମଂ କଟାକ୍ଷୋର୍ମ୍ମୟ ॥ (25) ॥
॥ ଇତି ଶ୍ରୀଗୀତଗୋଵିଂଦେ ମୁଗ୍ଧମଧୁସୂଦନୋ ନାମ ତୃତୀୟଃ ସର୍ଗଃ ॥