॥ ચતુર્થઃ સર્ગઃ ॥
॥ સ્નિગ્ધમધુસૂદનઃ ॥
યમુનાતીરવાનીરનિકુંજે મંદમાસ્થિતમ્ ।
પ્રાહ પ્રેમભરોદ્ભ્રાંતં માધવં રાધિકાસખી ॥ 25 ॥
॥ ગીતં 8 ॥
નિંદતિ ચંદનમિંદુકિરણમનુ વિંદતિ ખેદમધીરમ્ ।
વ્યાલનિલયમિલનેન ગરલમિવ કલયતિ મલયસમીરમ્ ॥
સા વિરહે તવ દીના માધવ મનસિજવિશિખભયાદિવ ભાવનયા ત્વયિ લીના ॥ 1 ॥
અવિરલનિપતિતમદનશરાદિવ ભવદવનાય વિશાલમ્ ।
સ્વહૃદયર્મણી વર્મ કરોતિ સજલનલિનીદલજાલમ્ ॥ 2 ॥
કુસુમવિશિખશરતલ્પમનલ્પવિલાસકલાકમનીયમ્ ।
વ્રતમિવ તવ પરિરંભસુખાય કરોતિ કુસુમશયનીયમ્ ॥ 3 ॥
વહતિ ચ ગલિતવિલોચનજલભરમાનનકમલમુદારમ્ ।
વિધુમિવ વિકટવિધુંતુદદંતદલનગલિતામૃતધારમ્ ॥ 4 ॥
વિલિખતિ રહસિ કુરંગમદેન ભવંતમસમશરભૂતમ્ ।
પ્રણમતિ મકરમધો વિનિધાય કરે ચ શરં નવચૂતમ્ ॥ 5 ॥
પ્રતિપદમિદમપિ નિગતતિ માધવ તવ ચરણે પતિતાહમ્ ।
ત્વયિ વિમુખે મયિ સપદિ સુધાનિધિરપિ તનુતે તનુદાહમ્ ॥ 6 ॥
ધ્યાનલયેન પુરઃ પરિકલ્પ્ય ભવંતમતીવ દુરાપમ્ ।
વિલપતિ હસતિ વિષીદતિ રોદિતિ ચંચતિ મુંચતિ તાપમ્ ॥ 7 ॥
શ્રીજયદેવભણિતમિદમધિકં યદિ મનસા નટનીયમ્ ।
હરિવિરહાકુલબલ્લવયુવતિસખીવચનં પઠનીયમ્ ॥ 8 ॥
આવાસો વિપિનાયતે પ્રિયસખીમાલાપિ જાલાયતે તાપોઽપિ શ્વસિતેન દાવદહનજ્વાલાકલાપાયતે ।
સાપિ ત્વદ્વિરહેણ હંત હરિણીરૂપાયતે હા કથં કંદર્પોઽપિ યમાયતે વિરચયઞ્શાર્દૂલવિક્રીડિતમ્ ॥ 26 ॥
॥ ગીતં 9 ॥
સ્તનવિનિહિતમપિ હારમુદારમ્ ।
સા મનુતે કૃશતનુરતિભારમ્ ॥
રાધિકા વિરહે તવ કેશવ ॥ 1 ॥
સરસમસૃણમપિ મલયજપંકમ્ ।
પશ્યતિ વિષમિવ વપુષિ સશંકમ્ ॥ 2 ॥
શ્વસિતપવનમનુપમપરિણાહમ્ ।
મદનદહનમિવ વહતિ સદાહમ્ ॥ 3 ॥
દિશિ દિશિ કિરતિ સજલકણજાલમ્ ।
નયનનલિનમિવ વિગલિતનાલમ્ ॥ 4 ॥
નયનવિષયમપિ કિસલયતલ્પમ્ ।
કલયતિ વિહિતહુતાશવિકલ્પમ્ ॥ 5 ॥
ત્યજતિ ન પાણિતલેન કપોલમ્ ।
બાલશશિનમિવ સાયમલોલમ્ ॥ 6 ॥
હરિરિતિ હરિરિતિ જપતિ સકામમ્ ।
વિરહવિહિતમરણેન નિકામમ્ ॥ 7 ॥
શ્રીજયદેવભણિતમિતિ ગીતમ્ ।
સુખયતુ કેશવપદમુપુનીતમ્ ॥ 8 ॥
સા રોમાંચતિ સીત્કરોતિ વિલપત્યુત્કંપતે તામ્યતિ ધ્યાયત્યુદ્ભ્રમતિ પ્રમીલતિ પતત્યુદ્યાતિ મૂર્ચ્છત્યપિ ।
એતાવત્યતનુજ્વરે વરતનુર્જીવેન્ન કિં તે રસાત્ સ્વર્વૈદ્યપ્રતિમ પ્રસીદસિ યદિ ત્યક્તોઽન્યથા નાંતકઃ ॥ 27 ॥
સ્મરાતુરાં દૈવતવૈદ્યહૃદ્ય ત્વદંગસંગામૃતમાત્રસાધ્યામ્ ।
વિમુક્તબાધાં કુરુષે ન રાધા-મુપેંદ્ર વજ્રાદપિ દારુણોઽસિ ॥ 28 ॥
કંદર્પજ્વરસંજ્વરસ્તુરતનોરાશ્ચર્યમસ્યાશ્ચિરં ચેતશ્ચંદનચંદ્રમઃકમલિનીચિંતાસુ સંતામ્યતિ ।
કિંતુ ક્લાંતિવશેન શીતલતનું ત્વામેકમેવ પ્રિયં ધ્યાયંતી રહસિ સ્થિતા કથમપિ ક્ષીણા ક્ષણં પ્રાણિતિ ॥ 29 ॥
ક્ષણમપિ વિરહઃ પુરા ન સેહે નયનનિમીલનખિન્નયા યયા તે ।
શ્વસિતિ કથમસૌ રસાલશાખાં ચિરવિરહેણ વિલોક્ય પુષ્પિતાગ્રામ્ ॥ 30 ॥
॥ ઇતિ ગીતગોવિંદે સ્નિગ્ધમાધવો નામ ચતુર્થઃ સર્ગઃ ॥