॥ pañchamaḥ sargaḥ ॥
॥ sākāṅkṣapuṇḍarīkākṣaḥ ॥
ahamiha nivasāmi yāhi rādhāṃ anunaya madvachanēna chānayēthāḥ ।
iti madhuripuṇā sakhī niyuktā svayamidamētya punarjagāda rādhām ॥ 31 ॥
॥ gītaṃ 10 ॥
vahati malayasamīrē madanamupanidhāya ।
sphuṭati kusumanikarē virahihṛdayadalanāya ॥
tava virahē vanamālī sakhi sīdati ॥ 1 ॥
dahati śiśiramayūkhē maraṇamanukarōti ।
patati madanaviśikhē vilapati vikalatarō’ti ॥ 2 ॥
dhvanati madhupasamūhē śravaṇamapidadhāti ।
manasi chalitavirahē niśi niśi rujamupayāti ॥ 3 ॥
vasati vipinavitānē tyajati lalitadhāma ।
luṭhati dharaṇiśayanē bahu vilapati tava nāma ॥ 4 ॥
raṇati pikasamavāyē pratidiśamanuyāti ।
hasati manujanichayē virahamapalapati nēti ॥ 5 ॥
sphurati kalaravarāvē smarati maṇitamēva।
tavaratisukhavibhavē gaṇayati suguṇamatīva ॥ 6 ॥
tvadabhidhaśubhadamāsaṃ vadati nari śṛṇōti ।
tamapi japati sarasaṃ yuvatiṣu na ratimupaiti ॥ 7 ॥
bhaṇati kavijayadēvē virahavilasitēna ।
manasi rabhasavibhavē harirudayatu sukṛtēna ॥ 8 ॥
pūrvaṃ yatra samaṃ tvayā ratipatērāsāditaḥ siddhaya-stasminnēva nikuñjamanmathamahātīrthē punarmādhavaḥ ।
dhyāyaṃstvāmaniśaṃ japannapi tavaivālāpamantrāvalīṃ bhūyastvatkuchakumbhanirbharaparīrambhāmṛtaṃ vāñChati ॥ 32 ॥
॥ gītaṃ 11 ॥
ratisukhasārē gatamabhisārē madanamanōharavēśam ।
na kuru nitambini gamanavilambanamanusara taṃ hṛdayēśam ॥
dhīrasamīrē yamunātīrē vasati vanē vanamālī ॥ 1 ॥
nāma samētaṃ kṛtasaṅkētaṃ vādayatē mṛduvēṇum ।
bahu manutē nanu tē tanusaṅgatapavanachalitamapi rēṇum ॥ 2 ॥
patati patatrē vichalati patrē śaṅkitabhavadupayānam ।
rachayati śayanaṃ sachakitanayanaṃ paśyati tava panthānam ॥ 3 ॥
mukharamadhīraṃ tyaja mañjīraṃ ripumiva kēliṣulōlam ।
chala sakhi kuñjaṃ satimirapuñjaṃ śīlaya nīlanichōlam ॥ 4 ॥
urasi murārērupahitahārē ghana iva taralabalākē ।
taṭidiva pītē rativiparītē rājasi sukṛtavipākē ॥ 5 ॥
vigalitavasanaṃ parihṛtarasanaṃ ghaṭaya jaghanamapidhānam ।
kisalayaśayanē paṅkajanayanē nidhimiva harṣanidānam ॥ 6 ॥
harirabhimānī rajaniridānīmiyamapi yāti virāmam ।
kuru mama vachanaṃ satvararachanaṃ pūraya madhuripukāmam ॥ 7 ॥
śrījayadēvē kṛtaharisēvē bhaṇati paramaramaṇīyam ।
pramuditahṛdayaṃ harimatisadayaṃ namata sukṛtakamanīyam ॥ 8 ॥
vikirati muhuḥ śvāsāndiśaḥ purō muhurīkṣatē praviśati muhuḥ kuñjaṃ guñjanmuhurbahu tāmyati ।
rachayati muhuḥ śayyāṃ paryākulaṃ muhurīkṣatē madanakadanaklāntaḥ kāntē priyastava vartatē ॥ 33 ॥
tvadvāmyēna samaṃ samagramadhunā tigmāṃśurastaṃ gatō gōvindasya manōrathēna cha samaṃ prāptaṃ tamaḥ sāndratām ।
kōkānāṃ karuṇasvanēna sadṛśī dīrghā madabhyarthanā tanmugdhē viphalaṃ vilambanamasau ramyō’bhisārakṣaṇaḥ ॥ 34 ॥
āślēṣādanu chumbanādanu nakhōllēkhādanu svāntaja-prōdbōdhādanu sambhramādanu ratārambhādanu prītayōḥ ।
anyārthaṃ gatayōrbhramānmilitayōḥ sambhāṣaṇairjānatō-rdampatyōriha kō na kō na tamasi vrīḍāvimiśrō rasaḥ ॥ 35 ॥
sabhayachakitaṃ vinyasyantīṃ dṛśau timirē pathi pratitaru muhuḥ sthitvā mandaṃ padāni vitanvatīm ।
kathamapi rahaḥ prāptāmaṅgairanaṅgataraṅgibhiḥ sumukhi subhagaḥ paśyansa tvāmupaitu kṛtārthatām ॥ 36 ॥
rādhāmugdhamukhāravindamadhupastrailōkyamaulisthalī nēpathyōchitanīlaratnamavanībhārāvatārāntakaḥ।
svachChandaṃ vrajasubdarījanamanastōṣapradōṣōdayaḥ kaṃsadhvaṃsanadhūmakēturavatu tvāṃ dēvakīnandanaḥ॥ 36 + 1 ॥
॥ iti śrīgītagōvindē’bhisārikavarṇanē sākāṅkṣapuṇḍarīkākṣō nāma pañchamaḥ sargaḥ ॥