॥ પંચમઃ સર્ગઃ ॥
॥ સાકાંક્ષપુંડરીકાક્ષઃ ॥
અહમિહ નિવસામિ યાહિ રાધાં અનુનય મદ્વચનેન ચાનયેથાઃ ।
ઇતિ મધુરિપુણા સખી નિયુક્તા સ્વયમિદમેત્ય પુનર્જગાદ રાધામ્ ॥ 31 ॥
॥ ગીતં 10 ॥
વહતિ મલયસમીરે મદનમુપનિધાય ।
સ્ફુટતિ કુસુમનિકરે વિરહિહૃદયદલનાય ॥
તવ વિરહે વનમાલી સખિ સીદતિ ॥ 1 ॥
દહતિ શિશિરમયૂખે મરણમનુકરોતિ ।
પતતિ મદનવિશિખે વિલપતિ વિકલતરોઽતિ ॥ 2 ॥
ધ્વનતિ મધુપસમૂહે શ્રવણમપિદધાતિ ।
મનસિ ચલિતવિરહે નિશિ નિશિ રુજમુપયાતિ ॥ 3 ॥
વસતિ વિપિનવિતાને ત્યજતિ લલિતધામ ।
લુઠતિ ધરણિશયને બહુ વિલપતિ તવ નામ ॥ 4 ॥
રણતિ પિકસમવાયે પ્રતિદિશમનુયાતિ ।
હસતિ મનુજનિચયે વિરહમપલપતિ નેતિ ॥ 5 ॥
સ્ફુરતિ કલરવરાવે સ્મરતિ મણિતમેવ।
તવરતિસુખવિભવે ગણયતિ સુગુણમતીવ ॥ 6 ॥
ત્વદભિધશુભદમાસં વદતિ નરિ શૃણોતિ ।
તમપિ જપતિ સરસં યુવતિષુ ન રતિમુપૈતિ ॥ 7 ॥
ભણતિ કવિજયદેવે વિરહવિલસિતેન ।
મનસિ રભસવિભવે હરિરુદયતુ સુકૃતેન ॥ 8 ॥
પૂર્વં યત્ર સમં ત્વયા રતિપતેરાસાદિતઃ સિદ્ધય-સ્તસ્મિન્નેવ નિકુંજમન્મથમહાતીર્થે પુનર્માધવઃ ।
ધ્યાયંસ્ત્વામનિશં જપન્નપિ તવૈવાલાપમંત્રાવલીં ભૂયસ્ત્વત્કુચકુંભનિર્ભરપરીરંભામૃતં વાંછતિ ॥ 32 ॥
॥ ગીતં 11 ॥
રતિસુખસારે ગતમભિસારે મદનમનોહરવેશમ્ ।
ન કુરુ નિતંબિનિ ગમનવિલંબનમનુસર તં હૃદયેશમ્ ॥
ધીરસમીરે યમુનાતીરે વસતિ વને વનમાલી ॥ 1 ॥
નામ સમેતં કૃતસંકેતં વાદયતે મૃદુવેણુમ્ ।
બહુ મનુતે નનુ તે તનુસંગતપવનચલિતમપિ રેણુમ્ ॥ 2 ॥
પતતિ પતત્રે વિચલતિ પત્રે શંકિતભવદુપયાનમ્ ।
રચયતિ શયનં સચકિતનયનં પશ્યતિ તવ પંથાનમ્ ॥ 3 ॥
મુખરમધીરં ત્યજ મંજીરં રિપુમિવ કેલિષુલોલમ્ ।
ચલ સખિ કુંજં સતિમિરપુંજં શીલય નીલનિચોલમ્ ॥ 4 ॥
ઉરસિ મુરારેરુપહિતહારે ઘન ઇવ તરલબલાકે ।
તટિદિવ પીતે રતિવિપરીતે રાજસિ સુકૃતવિપાકે ॥ 5 ॥
વિગલિતવસનં પરિહૃતરસનં ઘટય જઘનમપિધાનમ્ ।
કિસલયશયને પંકજનયને નિધિમિવ હર્ષનિદાનમ્ ॥ 6 ॥
હરિરભિમાની રજનિરિદાનીમિયમપિ યાતિ વિરામમ્ ।
કુરુ મમ વચનં સત્વરરચનં પૂરય મધુરિપુકામમ્ ॥ 7 ॥
શ્રીજયદેવે કૃતહરિસેવે ભણતિ પરમરમણીયમ્ ।
પ્રમુદિતહૃદયં હરિમતિસદયં નમત સુકૃતકમનીયમ્ ॥ 8 ॥
વિકિરતિ મુહુઃ શ્વાસાંદિશઃ પુરો મુહુરીક્ષતે પ્રવિશતિ મુહુઃ કુંજં ગુંજન્મુહુર્બહુ તામ્યતિ ।
રચયતિ મુહુઃ શય્યાં પર્યાકુલં મુહુરીક્ષતે મદનકદનક્લાંતઃ કાંતે પ્રિયસ્તવ વર્તતે ॥ 33 ॥
ત્વદ્વામ્યેન સમં સમગ્રમધુના તિગ્માંશુરસ્તં ગતો ગોવિંદસ્ય મનોરથેન ચ સમં પ્રાપ્તં તમઃ સાંદ્રતામ્ ।
કોકાનાં કરુણસ્વનેન સદૃશી દીર્ઘા મદભ્યર્થના તન્મુગ્ધે વિફલં વિલંબનમસૌ રમ્યોઽભિસારક્ષણઃ ॥ 34 ॥
આશ્લેષાદનુ ચુંબનાદનુ નખોલ્લેખાદનુ સ્વાંતજ-પ્રોદ્બોધાદનુ સંભ્રમાદનુ રતારંભાદનુ પ્રીતયોઃ ।
અન્યાર્થં ગતયોર્ભ્રમાન્મિલિતયોઃ સંભાષણૈર્જાનતો-ર્દંપત્યોરિહ કો ન કો ન તમસિ વ્રીડાવિમિશ્રો રસઃ ॥ 35 ॥
સભયચકિતં વિન્યસ્યંતીં દૃશૌ તિમિરે પથિ પ્રતિતરુ મુહુઃ સ્થિત્વા મંદં પદાનિ વિતન્વતીમ્ ।
કથમપિ રહઃ પ્રાપ્તામંગૈરનંગતરંગિભિઃ સુમુખિ સુભગઃ પશ્યન્સ ત્વામુપૈતુ કૃતાર્થતામ્ ॥ 36 ॥
રાધામુગ્ધમુખારવિંદમધુપસ્ત્રૈલોક્યમૌલિસ્થલી નેપથ્યોચિતનીલરત્નમવનીભારાવતારાંતકઃ।
સ્વચ્છંદં વ્રજસુબ્દરીજનમનસ્તોષપ્રદોષોદયઃ કંસધ્વંસનધૂમકેતુરવતુ ત્વાં દેવકીનંદનઃ॥ 36 + 1 ॥
॥ ઇતિ શ્રીગીતગોવિંદેઽભિસારિકવર્ણને સાકાંક્ષપુંડરીકાક્ષો નામ પંચમઃ સર્ગઃ ॥