॥ ଅଷ୍ଟମଃ ସର୍ଗଃ ॥
॥ ଵିଲକ୍ଷ୍ୟଲକ୍ଷ୍ମୀପତିଃ ॥
ଅଥ କଥମପି ୟାମିନୀଂ ଵିନୀୟ ସ୍ମରଶରଜର୍ଜରିତାପି ସା ପ୍ରଭାତେ ।
ଅନୁନୟଵଚନଂ ଵଦଂତମଗ୍ରେ ପ୍ରଣତମପି ପ୍ରିୟମାହ ସାଭ୍ୟସୂୟମ୍ ॥ 49 ॥
॥ ଗୀତଂ 17 ॥
ରଜନିଜନିତଗୁରୁଜାଗରରାଗକଷାୟିତମଲସନିଵେଶମ୍ ।
ଵହତି ନୟନମନୁରାଗମିଵ ସ୍ଫୁଟମୁଦିତରସାଭିନିଵେଶମ୍ ॥
ହରିହରି ୟାହି ମାଧଵ ୟାହି କେଶଵ ମା ଵଦ କୈତଵଵାଦଂ ତାମନୁସର ସରସୀରୁହଲୋଚନ ୟା ତଵ ହରତି ଵିଷାଦମ୍ ॥ 50 ॥
କଜ୍ଜଲମଲିନଵିଲୋଚନଚୁଂବନଵିରଚିତନୀଲିମରୂପମ୍ ।
ଦଶନଵସନମରୁଣଂ ତଵ କୃଷ୍ଣ ତନୋତି ତନୋରନୁରୂପମ୍ ॥ 2 ॥
ଵପୁରନୁହରତି ତଵ ସ୍ମରସଂଗରଖରନଖରକ୍ଷତରେଖମ୍ ।
ମରକତଶକଲକଲିତକଲଧୌତଲିପିରେଵ ରତିଜୟଲେଖମ୍ ॥ 3 ॥
ଚରଣକମଲଗଲଦଲକ୍ତକସିକ୍ତମିଦଂ ତଵ ହୃଦୟମୁଦାରମ୍ ।
ଦର୍ଶୟତୀଵ ବହିର୍ମଦନଦ୍ରୁମନଵକିସଲୟପରିଵାରମ୍ ॥ 4 ॥
ଦଶନପଦଂ ଭଵଦଧରଗତଂ ମମ ଜନୟତି ଚେତସି ଖେଦମ୍ ।
କଥୟତି କଥମଧୁନାପି ମୟା ସହ ତଵ ଵପୁରେତଦଭେଦମ୍ ॥ 5 ॥
ବହିରିଵ ମଲିନତରଂ ତଵ କୃଷ୍ଣ ମନୋଽପି ଭଵିଷ୍ୟତି ନୂନମ୍ ।
କଥମଥ ଵଂଚୟସେ ଜନମନୁଗତମସମଶରଜ୍ଵରଦୂନମ୍ ॥ 6 ॥
ଭ୍ରମତି ଭଵାନବଲାକଵଲାୟ ଵନେଷୁ କିମତ୍ର ଵିଚିତ୍ରମ୍ ।
ପ୍ରଥୟତି ପୂତନିକୈଵ ଵଧୂଵଧନିର୍ଦୟବାଲଚରିତ୍ରମ୍ ॥ 7 ॥
ଶ୍ରୀଜୟଦେଵଭଣିତରତିଵଂଚିତଖଂଡିତୟୁଵତିଵିଲାପମ୍ ।
ଶୃଣୁତ ସୁଧାମଧୁରଂ ଵିବୁଧା ଵିବୁଧାଲୟତୋଽପି ଦୁରାପମ୍ ॥ 8 ॥
ତଦେଵଂ ପଶ୍ୟଂତ୍ୟାଃ ପ୍ରସରଦନୁରାଗଂ ବହିରିଵ ପ୍ରିୟାପାଦାଲକ୍ତଚ୍ଛୁରିତମରୁଣଚ୍ଛାୟହୃଦୟମ୍ ।
ମମାଦ୍ୟ ପ୍ରଖ୍ୟାତପ୍ରଣୟଭରଭଂଗେନ କିତଵ ତ୍ଵଦାଲୋକଃ ଶୋକାଦପି କିମପି ଲଜ୍ଜାଂ ଜନୟତି ॥ 50 ॥
॥ ଇତି ଗୀତଗୋଵିଂଦେ ଖଂଡିତାଵର୍ଣନେ ଵିଲକ୍ଷ୍ୟଲକ୍ଷ୍ମୀପତିର୍ନାମ ଅଷ୍ଠମଃ ସର୍ଗଃ ॥