॥ අෂ්ටමඃ සර්ගඃ ॥
॥ විලක්ෂ්යලක්ෂ්මීපතිඃ ॥
අථ කථමපි යාමිනීං විනීය ස්මරශරජර්ජරිතාපි සා ප්රභාතේ ।
අනුනයවචනං වදංතමග්රේ ප්රණතමපි ප්රියමාහ සාභ්යසූයම් ॥ 49 ॥
॥ ගීතං 17 ॥
රජනිජනිතගුරුජාගරරාගකෂායිතමලසනිවේශම් ।
වහති නයනමනුරාගමිව ස්ඵුටමුදිතරසාභිනිවේශම් ॥
හරිහරි යාහි මාධව යාහි කේශව මා වද කෛතවවාදං තාමනුසර සරසීරුහලෝචන යා තව හරති විෂාදම් ॥ 50 ॥
කජ්ජලමලිනවිලෝචනචුංබනවිරචිතනීලිමරූපම් ।
දශනවසනමරුණං තව කෘෂ්ණ තනෝති තනෝරනුරූපම් ॥ 2 ॥
වපුරනුහරති තව ස්මරසංගරඛරනඛරක්ෂතරේඛම් ।
මරකතශකලකලිතකලධෞතලිපිරේව රතිජයලේඛම් ॥ 3 ॥
චරණකමලගලදලක්තකසික්තමිදං තව හෘදයමුදාරම් ।
දර්ශයතීව බහිර්මදනද්රුමනවකිසලයපරිවාරම් ॥ 4 ॥
දශනපදං භවදධරගතං මම ජනයති චේතසි ඛේදම් ।
කථයති කථමධුනාපි මයා සහ තව වපුරේතදභේදම් ॥ 5 ॥
බහිරිව මලිනතරං තව කෘෂ්ණ මනෝऽපි භවිෂ්යති නූනම් ।
කථමථ වංචයසේ ජනමනුගතමසමශරජ්වරදූනම් ॥ 6 ॥
භ්රමති භවානබලාකවලාය වනේෂු කිමත්ර විචිත්රම් ।
ප්රථයති පූතනිකෛව වධූවධනිර්දයබාලචරිත්රම් ॥ 7 ॥
ශ්රීජයදේවභණිතරතිවංචිතඛංඩිතයුවතිවිලාපම් ।
ශෘණුත සුධාමධුරං විබුධා විබුධාලයතෝऽපි දුරාපම් ॥ 8 ॥
තදේවං පශ්යංත්යාඃ ප්රසරදනුරාගං බහිරිව ප්රියාපාදාලක්තච්ඡුරිතමරුණච්ඡායහෘදයම් ।
මමාද්ය ප්රඛ්යාතප්රණයභරභංගේන කිතව ත්වදාලෝකඃ ශෝකාදපි කිමපි ලජ්ජාං ජනයති ॥ 50 ॥
॥ ඉති ගීතගෝවිංදේ ඛංඩිතාවර්ණනේ විලක්ෂ්යලක්ෂ්මීපතිර්නාම අෂ්ඨමඃ සර්ගඃ ॥