ସୁଂଦରଗୋପାଲଂ ଉରଵନମାଲଂ ନୟନଵିଶାଲଂ ଦୁଃଖହରଂ
ବୃଂଦାଵନଚଂଦ୍ରମାନଂଦକଂଦଂ ପରମାନଂଦଂ ଧରଣିଧରମ୍ ।
ଵଲ୍ଲଭଘନଶ୍ୟାମଂ ପୂର୍ଣକାମଂ ଅତ୍ୟଭିରାମଂ ପ୍ରୀତିକରଂ
ଭଜ ନଂଦକୁମାରଂ ସର୍ଵସୁଖସାରଂ ତତ୍ତ୍ଵଵିଚାରଂ ବ୍ରହ୍ମପରମ୍ ॥ 1 ॥
ସୁଂଦରଵାରିଜଵଦନଂ ନିର୍ଜିତମଦନଂ ଆନଂଦସଦନଂ ମୁକୁଟଧରଂ
ଗୁଂଜାକୃତିହାରଂ ଵିପିନଵିହାରଂ ପରମୋଦାରଂ ଚୀରହରମ୍ ।
ଵଲ୍ଲଭପଟପୀତଂ କୃତ ଉପଵୀତଂ କରନଵନୀତଂ ଵିବୁଧଵରଂ
ଭଜ ନଂଦକୁମାରଂ ସର୍ଵସୁଖସାରଂ ତତ୍ତ୍ଵଵିଚାରଂ ବ୍ରହ୍ମପରମ୍ ॥ 2 ॥
ଶୋଭିତସୁଖମୂଲଂ ୟମୁନାକୂଲଂ ନିପଟ ଅତୂଲଂ ସୁଖଦତରଂ
ମୁଖମଂଡିତରେଣୁଂ ଚାରିତଧେନୁଂ ଵାଦିତଵେଣୁଂ ମଧୁରସୁରମ୍ ।
ଵଲ୍ଲଭମତିଵିମଲଂ ଶୁଭପଦକମଲଂ ନଖରୁଚି ଅମଲଂ ତିମିରହରଂ
ଭଜ ନଂଦକୁମାରଂ ସର୍ଵସୁଖସାରଂ ତତ୍ତ୍ଵଵିଚାରଂ ବ୍ରହ୍ମପରମ୍ ॥ 3 ॥
ଶିରମୁକୁଟସୁଦେଶଂ କୁଂଚିତକେଶଂ ନଟଵରଵେଷଂ କାମଵରଂ
ମାୟାକୃତମନୁଜଂ ହଲଧର ଅନୁଜଂ ପ୍ରତିହତଦନୁଜଂ ଭାରହରମ୍ ।
ଵଲ୍ଲଭଵ୍ରଜପାଲଂ ସୁଭଗସୁଚାଲଂ ହିତମନୁକାଲଂ ଭାଵଵରଂ
ଭଜ ନଂଦକୁମାରଂ ସର୍ଵସୁଖସାରଂ ତତ୍ତ୍ଵଵିଚାରଂ ବ୍ରହ୍ମପରମ୍ ॥ 4 ॥
ଇଂଦୀଵରଭାସଂ ପ୍ରକଟସରାସଂ କୁସୁମଵିକାସଂ ଵଂଶଧରଂ
ହୃତ୍ମନ୍ମଥମାନଂ ରୂପନିଧାନଂ କୃତକଲଗାନଂ ଚିତ୍ତହରମ୍ ।
ଵଲ୍ଲଭମୃଦୁହାସଂ କୁଂଜନିଵାସଂ ଵିଵିଧଵିଲାସଂ କେଳିକରଂ
ଭଜ ନଂଦକୁମାରଂ ସର୍ଵସୁଖସାରଂ ତତ୍ତ୍ଵଵିଚାରଂ ବ୍ରହ୍ମପରମ୍ ॥ 5 ॥
ଅତିପରମପ୍ରଵୀଣଂ ପାଲିତଦୀନଂ ଭକ୍ତାଧୀନଂ କର୍ମକରଂ
ମୋହନମତିଧୀରଂ ଫଣିବଲଵୀରଂ ହତପରଵୀରଂ ତରଳତରମ୍ ।
ଵଲ୍ଲଭଵ୍ରଜରମଣଂ ଵାରିଜଵଦନଂ ହଲଧରଶମନଂ ଶୈଲଧରଂ
ଭଜ ନଂଦକୁମାରଂ ସର୍ଵସୁଖସାରଂ ତତ୍ତ୍ଵଵିଚାରଂ ବ୍ରହ୍ମପରମ୍ ॥ 6 ॥
ଜଲଧରଦ୍ୟୁତିଅଂଗଂ ଲଲିତତ୍ରିଭଂଗଂ ବହୁକୃତିରଂଗଂ ରସିକଵରଂ
ଗୋକୁଲପରିଵାରଂ ମଦନାକାରଂ କୁଂଜଵିହାରଂ ଗୂଢତରମ୍ ।
ଵଲ୍ଲଭଵ୍ରଜଚଂଦ୍ରଂ ସୁଭଗସୁଛଂଦଂ କୃତ ଆନଂଦଂ ଭ୍ରାଂତିହରଂ
ଭଜ ନଂଦକୁମାରଂ ସର୍ଵସୁଖସାରଂ ତତ୍ତ୍ଵଵିଚାରଂ ବ୍ରହ୍ମପରମ୍ ॥ 7 ॥
ଵଂଦିତୟୁଗଚରଣଂ ପାଵନକରଣଂ ଜଗଦୁଦ୍ଧରଣଂ ଵିମଲଧରଂ
କାଳିୟଶିରଗମନଂ କୃତଫଣିନମନଂ ଘାତିତୟମନଂ ମୃଦୁଲତରମ୍ ।
ଵଲ୍ଲଭଦୁଃଖହରଣଂ ନିର୍ମଲଚରଣଂ ଅଶରଣଶରଣଂ ମୁକ୍ତିକରଂ
ଭଜ ନଂଦକୁମାରଂ ସର୍ଵସୁଖସାରଂ ତତ୍ତ୍ଵଵିଚାରଂ ବ୍ରହ୍ମପରମ୍ ॥ 8 ॥
ଇତି ଶ୍ରୀମଦ୍ଵଲ୍ଲଭାଚାର୍ୟଵିରଚିତଂ ଶ୍ରୀନଂଦକୁମାରାଷ୍ଟକମ୍ ॥