īśvaraḥ paramaḥ kṛṣṇaḥ sachchidānandavigrahaḥ ।
anādirādirgōvindaḥ sarvakāraṇakāraṇam ॥ 1 ॥
sahasrapatrakamalaṃ gōkulākhyaṃ mahatpadam ।
tatkarṇikāraṃ taddhāma tadanantāśasambhavam ॥ 2 ॥
karṇikāraṃ mahadyantraṃ ṣaṭkōṇaṃ vajrakīlakam
ṣaḍaṅga ṣaṭpadīsthānaṃ prakṛtyā puruṣēṇa cha ।
prēmānandamahānandarasēnāvasthitaṃ hi yat
jyōtīrūpēṇa manunā kāmabījēna saṅgatam ॥ 3 ॥
tatkiñjalkaṃ tadaṃśānāṃ tatpatrāṇi śriyāmapi ॥ 4 ॥
chaturasraṃ tatparitaḥ śvētadvīpākhyamadbhutam ।
chaturasraṃ chaturmūrtēśchaturdhāma chatuṣkṛtam ।
chaturbhiḥ puruṣārthaiścha chaturbhirhētubhirvṛtam ।
śūlairdaśabhirānaddhamūrdhvādhō digvidikṣvapi ।
aṣṭabhirnidhibhirjuṣṭamaṣṭabhiḥ siddhibhistathā ।
manurūpaiścha daśabhirdikpālaiḥ paritō vṛtam ।
śyāmairgauraiścha raktaiścha śuklaiścha pārṣadarṣabhaiḥ ।
śōbhitaṃ śaktibhistābhiradbhutābhiḥ samantataḥ ॥ 5 ॥
ēvaṃ jyōtirmayō dēvaḥ sadānandaṃ parātparaḥ ।
ātmārāmasya tasyāsti prakṛtyā na samāgamaḥ ॥ 6 ॥
māyayā’ramamāṇasya na viyōgastayā saha ।
ātmanā ramayā rēmē tyaktakālaṃ sisṛkṣayā ॥ 7 ॥
niyatiḥ sā ramādēvī tatpriyā tadvaśaṃ tadā ।
talliṅgaṃ bhagavān śambhurjōtirūpaḥ sanātanaḥ ।
yā yōniḥ sāparāśaktiḥ kāmō bījaṃ mahaddharēḥ ॥ 8 ॥
liṅgayōnyātmikā jātā imā māhēśvarī prajāḥ ॥ 9 ॥
śaktimān puruṣaḥ sō’yaṃ liṅgarūpī mahēśvaraḥ ।
tasminnāvirabhūlliṅgē mahāviṣṇurjagatpatiḥ ॥ 10 ॥
sahasraśīrṣā puruṣaḥ sahasrākṣaḥ sahasrapāt ।
sahasrabāhurviśvātmā sahasrāṃśaḥ sahasrasūḥ ॥ 11 ॥
nārāyaṇaḥ sa bhagavānāpastasmātsanātanāt ।
āvirāsītkāraṇārṇō nidhiḥ saṅkarṣaṇātmakaḥ ।
yōganidrāṃ gatastasmin sahasrāṃśaḥ svayaṃ mahān ॥ 12 ॥
tadrōmabila jālēṣu bījaṃ saṅkarṣaṇasya cha ।
haimānyaṇḍāni jātāni mahābhūtāvṛtāni tu ॥ 13 ॥
pratyaṇḍamēvamēkāṃśādēkāṃśādviśati svayam ।
sahasramūrdhā viśvātmā mahāviṣṇuḥ sanātanaḥ ॥ 14 ॥
vāmāṅgādasṛjadviṣṇuṃ dakṣiṇāṅgātprajāpatim ।
jyōtirliṅgamayaṃ śambhuṃ kūrchadēśādavāsṛjat ॥ 15 ॥
ahaṅkārātmakaṃ viśvaṃ tasmādētadvyajāyata ॥ 16 ॥
atha taistrividhairvēśairlīlāmudvahataḥ kila ।
yōganidrā bhagavatī tasya śrīriva saṅgatā ॥ 17 ॥
sasṛkṣāyāṃ tatō nābhēstasya padmaṃ viniryayau ।
tannālaṃ hēmanalinaṃ brahmaṇō lōkamadbhutam ॥ 18 ॥
tattvāni pūrvarūḍhāni kāraṇāni parasparam ।
samavāyāprayōgāchcha vibhinnāni pṛthak pṛthak ।
chichChaktyā sajjamānō’tha bhagavānādipūruṣaḥ ।
yōjayanmāyayā dēvō yōganidrāmakalpayat ॥ 19 ॥
yōjayitvā tu tānyēva pravivēśa svayaṃ guhām ।
guhāṃ praviṣṭē tasmiṃstu jīvātmā pratibudhyatē ॥ 20 ॥
sa nityō nityasambandhaḥ prakṛtiścha paraiva sā ॥ 21 ॥
ēvaṃ sarvātmasambandhaṃ nābhyāṃ padmaṃ harērabhūt ।
tatra brahmābhavadbhūyaśchaturvēdī chaturmukhaḥ ॥ 22 ॥
sa jātō bhagavachChaktyā tatkālaṃ kila chōditaḥ ।
sisṛkṣāyāṃ matiṃ chakrē pūrvasaṃskārasaṃskṛtaḥ ।
dadarśa kēvalaṃ dhvāntaṃ nānyatkimapi sarvataḥ ॥ 23 ॥
uvācha puratastasmai tasya divyā sarasvatī ।
kāmaḥ kṛṣṇāya gōvinda hē gōpījana ityapi ।
vallabhāya priyā vahnērmantraṃ tē dāsyati priyam ॥ 24 ॥
tapastvaṃ tapa ētēna tava siddhirbhaviṣyati ॥ 25 ॥
atha tēpē sa suchiraṃ prīṇan gōvindamavyayam ।
śvētadvīpapatiṃ kṛṣṇaṃ gōlōkasthaṃ parātparam ।
prakṛtyā guṇarūpiṇyā rūpiṇyā paryupāsitam ।
sahasradalasampannē kōṭikiñjalkabṛṃhitē ।
bhūmiśchintāmaṇistatra karṇikārē mahāsanē ।
samāsīnaṃ chidānandaṃ jyōtirūpaṃ sanātanam ।
śabdabrahmamayaṃ vēṇuṃ vādayantaṃ mukhāmbujē ।
vilāsinīgaṇavṛtaṃ svaiḥ svairaṃśairabhiṣṭutam ॥ 26 ॥
atha vēṇuninādasya trayīmūrtimayī gatiḥ ।
sphurantī pravivēśāśu mukhābjāni svayambhuvaḥ ।
gāyatrīṃ gāyatastasmādadhigatya sarōjajaḥ ।
saṃskṛtaśchādiguruṇā dvijatāmagamattataḥ ॥ 27 ॥
trayyā prabuddhō’tha vidhirvijñātatattvasāgaraḥ ।
tuṣṭāva vēdasārēṇa stōtrēṇānēna kēśavam ॥ 28 ॥
chintāmaṇiprakarasadmasu kalpavṛkṣa
lakṣāvṛtēṣu surabhīrabhipālayantam ।
lakṣmīsahasraśatasambhramasēvyamānaṃ
gōvindamādipuruṣaṃ tamahaṃ bhajāmi ॥ 29 ॥
vēṇuṃ kvaṇantamaravindadalāyatākṣaṃ
barhāvataṃsamasitāmbudasundarāṅgam ।
kandarpakōṭikamanīyaviśēṣaśōbhaṃ
gōvindamādipuruṣaṃ tamahaṃ bhajāmi ॥ 30 ॥
ālōlachandrakalasadvanamālyavaṃśī-
-ratnāṅgadaṃ praṇayakēlikalāvilāsam ।
śyāmaṃ tribhaṅgalalitaṃ niyataprakāśaṃ
gōvindamādipuruṣaṃ tamahaṃ bhajāmi ॥ 31 ॥
aṅgāni yasya sakalēndriyavṛttimanti
paśyanti pānti kalayanti chiraṃ jaganti ।
ānandachinmayasadujjvalavigrahasya
gōvindamādipuruṣaṃ tamahaṃ bhajāmi ॥ 32 ॥
advaitamachyutamanādimanantarūpaṃ
ādyaṃ purāṇapuruṣaṃ navayauvanaṃ cha ।
vēdēṣu durlabhamadurlabhamātmabhaktau
gōvindamādipuruṣaṃ tamahaṃ bhajāmi ॥ 33 ॥
panthāstu kōṭiśatavatsarasampragamyō
vāyōrathāpi manasō munipuṅgavānām ।
sō’pyasti yatprapadasīmnyavichintyatattvē
gōvindamādipuruṣaṃ tamahaṃ bhajāmi ॥ 34 ॥
ēkō’pyasau rachayituṃ jagadaṇḍakōṭiṃ
yachChaktirasti jagadaṇḍachayā yadantaḥ ।
aṇḍāntarasthaparamāṇuchayāntarasthaṃ
gōvindamādipuruṣaṃ tamahaṃ bhajāmi ॥ 35 ॥
yadbhāvabhāvitadhiyō manujāstathaiva
samprāpya rūpamahimāsanayānabhūṣāḥ ।
sūktairyamēva nigamaprathitaiḥ stuvanti
gōvindamādipuruṣaṃ tamahaṃ bhajāmi ॥ 36 ॥
ānandachinmayarasapratibhāvitābhi-
-stābhirya ēva nijarūpatayā kalābhiḥ ।
gōlōka ēva nivasatyakhilātmabhūtō
gōvindamādipuruṣaṃ tamahaṃ bhajāmi ॥ 37 ॥
prēmāñjanachChuritabhaktivilōchanēna
santaḥ sadaiva hṛdayēṣu vilōkayanti ।
yaṃ śyāmasundaramachintyaguṇasvarūpaṃ
gōvindamādipuruṣaṃ tamahaṃ bhajāmi ॥ 38 ॥
rāmādimūrtiṣu kalāniyamēna tiṣṭhan
nānāvatāramakarōdbhuvanēṣu kintu ।
kṛṣṇaḥ svayaṃ samabhavatparamaḥ pumān yō
gōvindamādipuruṣaṃ tamahaṃ bhajāmi ॥ 39 ॥
yasya prabhā prabhavatō jagadaṇḍakōṭi-
-kōṭiṣvaśēṣavasudhādi vibhūtibhinnam ।
tadbrahma niṣkalamanantamaśēṣabhūtaṃ
gōvindamādipuruṣaṃ tamahaṃ bhajāmi ॥ 40 ॥
māyā hi yasya jagadaṇḍaśatāni sūtē
traiguṇyatadviṣayavēdavitāyamānā ।
sattvāvalambiparasattvaṃ viśuddhasattvaṃ
gōvindamādipuruṣaṃ tamahaṃ bhajāmi ॥ 41 ॥
ānandachinmayarasātmatayā manaḥsu
yaḥ prāṇināṃ pratiphalan smaratāmupētya ।
līlāyitēna bhuvanāni jayatyajasraṃ
gōvindamādipuruṣaṃ tamahaṃ bhajāmi ॥ 42 ॥
gōlōkanāmni nijadhāmni talē cha tasya
dēvi mahēśaharidhāmasu tēṣu tēṣu ।
tē tē prabhāvanichayā vihitāścha yēna
gōvindamādipuruṣaṃ tamahaṃ bhajāmi ॥ 43 ॥
sṛṣṭisthitipralayasādhanaśaktirēkā
Chāyēva yasya bhuvanāni bibharti durgā ।
ichChānurūpamapi yasya cha chēṣṭatē sā
gōvindamādipuruṣaṃ tamahaṃ bhajāmi ॥ 44 ॥
kṣīraṃ yathā dadhi vikāraviśēṣayōgāt
sañjāyatē na hi tataḥ pṛthagasti hētōḥ ।
yaḥ śambhutāmapi tathā samupaiti kāryā-
-dgōvindamādipuruṣaṃ tamahaṃ bhajāmi ॥ 45 ॥
dīpārchirēva hi daśāntaramabhyupētya
dīpāyatē vivṛtahētusamānadharmā ।
yastādṛgēva hi cha viṣṇutayā vibhāti
gōvindamādipuruṣaṃ tamahaṃ bhajāmi ॥ 46 ॥
yaḥ kāraṇārṇavajalē bhajati sma yōga-
-nidrāmanantajagadaṇḍasarōmakūpaḥ ।
ādhāraśaktimavalambya parāṃ svamūrtiṃ
gōvindamādipuruṣaṃ tamahaṃ bhajāmi ॥ 47 ॥
yasyaikaniśvasitakālamathāvalambya
jīvanti lōmabilajā jagadaṇḍanāthāḥ ।
viṣṇurmahān sa iha yasya kalāviśēṣō
gōvindamādipuruṣaṃ tamahaṃ bhajāmi ॥ 48 ॥
bhāsvān yathāśmaśakalēṣu nijēṣu tējaḥ
svīyaṃ kiyatprakaṭayatyapi tadvadatra ।
brahmā ya ēṣa jagadaṇḍavidhānakartā
gōvindamādipuruṣaṃ tamahaṃ bhajāmi ॥ 49 ॥
yatpādapallavayugaṃ vinidhāya kumbha-
-dvandvē praṇāmasamayē sa gaṇādhirājaḥ ।
vighnān vihantumalamasya jagattrayasya
gōvindamādipuruṣaṃ tamahaṃ bhajāmi ॥ 50 ॥
agnirmahī gaganamambu maruddiśaścha
kālastathātmamanasīti jagattrayāṇi ।
yasmādbhavanti vibhavanti viśanti yaṃ cha
gōvindamādipuruṣaṃ tamahaṃ bhajāmi ॥ 51 ॥
yachchakṣurēṣa savitā sakalagrahāṇāṃ
rājā samastasuramūrtiraśēṣatējāḥ ।
yasyājñayā bhramati sambhṛtakālachakrō
gōvindamādipuruṣaṃ tamahaṃ bhajāmi ॥ 52 ॥
dharmō’tha pāpanichayaḥ śrutayastapāṃsi
brahmādikīṭapatagāvadhayaścha jīvāḥ ।
yaddatamātravibhavaprakaṭaprabhāvā
gōvindamādipuruṣaṃ tamahaṃ bhajāmi ॥ 53 ॥
yastvindragōpamathavēndramahō svakarma-
-bandhānurūpaphalabhājanamātanōti ।
karmāṇi nirdahati kintu cha bhaktibhājāṃ
gōvindamādipuruṣaṃ tamahaṃ bhajāmi ॥ 54 ॥
yaṃ krōdhakāmasahajapraṇayādibhīti-
-vātsalyamōhagurugauravasēvyabhāvaiḥ ।
sañchintya tasya sadṛśīṃ tanumāpurētē
gōvindamādipuruṣaṃ tamahaṃ bhajāmi ॥ 55 ॥
śriyaḥ kāntāḥ kāntaḥ paramapuruṣaḥ kalpataravō
drumā bhūmiśchintāmaṇigaṇamayi tōyamamṛtam ।
kathā gānaṃ nāṭyaṃ gamanamapi vaṃśī priyasakhi
chidānandaṃ jyōtiḥ paramapi tadāsvādyamapi cha ।
sa yatra kṣīrābdhiḥ sravati surabhībhyaścha sumahān
nimēṣārdhākhyō vā vrajati na hi yatrāpi samayaḥ ।
bhajē śvētadvīpaṃ tamahamiha gōlōkamiti yaṃ
vidantastē santaḥ kṣitiviralachārāḥ katipayē ॥ 56 ॥
athōvācha mahāviṣṇurbhagavantaṃ prajāpatim ।
brahman mahattvavijñānē prajāsargē cha chēnmatiḥ ।
pañchaślōkīmimāṃ vidyāṃ vatsa dattāṃ nibōdha mē ॥ 57 ॥
prabuddhē jñānabhaktibhyāmātmanyānandachinmayī ।
udētyanuttamā bhaktirbhagavatprēmalakṣaṇā ॥ 58 ॥
pramāṇaistat sadāchāraistadabhyāsairnirantaram ।
bōdhayanātmanātmānaṃ bhaktimapyuttamāṃ labhēt ॥ 59 ॥
yasyāḥ śrēyaskaraṃ nāsti yayā nirvṛtimāpnuyāt ।
yā sādhayati māmēva bhaktiṃ tāmēva sādhayēt ॥ 60 ॥
dharmānanyān parityajya māmēkaṃ bhaja viśvasan ।
yādṛśī yādṛśī śraddhā siddhirbhavati tādṛśī ।
kurvannirantaraṃ karma lōkō’yamanuvartatē ।
tēnaiva karmaṇā dhyāyanmāṃ parāṃ bhaktimichChati ॥ 61 ॥
ahaṃ hi viśvasya charācharasya
bījaṃ pradhānaṃ prakṛtiḥ pumāṃścha ।
mayāhitaṃ tēja idaṃ bibharṣi
vidhē vidhēhi tvamathō jaganti ॥ 62 ॥
iti śrī brahma saṃhitā sampūrṇam ।