ଈଶ୍ଵରଃ ପରମଃ କୃଷ୍ଣଃ ସଚ୍ଚିଦାନଂଦଵିଗ୍ରହଃ ।
ଅନାଦିରାଦିର୍ଗୋଵିଂଦଃ ସର୍ଵକାରଣକାରଣମ୍ ॥ 1 ॥
ସହସ୍ରପତ୍ରକମଲଂ ଗୋକୁଲାଖ୍ୟଂ ମହତ୍ପଦମ୍ ।
ତତ୍କର୍ଣିକାରଂ ତଦ୍ଧାମ ତଦନଂତାଶସଂଭଵମ୍ ॥ 2 ॥
କର୍ଣିକାରଂ ମହଦ୍ୟଂତ୍ରଂ ଷଟ୍କୋଣଂ ଵଜ୍ରକୀଲକମ୍
ଷଡଂଗ ଷଟ୍ପଦୀସ୍ଥାନଂ ପ୍ରକୃତ୍ୟା ପୁରୁଷେଣ ଚ ।
ପ୍ରେମାନଂଦମହାନଂଦରସେନାଵସ୍ଥିତଂ ହି ୟତ୍
ଜ୍ୟୋତୀରୂପେଣ ମନୁନା କାମବୀଜେନ ସଂଗତମ୍ ॥ 3 ॥
ତତ୍କିଂଜଲ୍କଂ ତଦଂଶାନାଂ ତତ୍ପତ୍ରାଣି ଶ୍ରିୟାମପି ॥ 4 ॥
ଚତୁରସ୍ରଂ ତତ୍ପରିତଃ ଶ୍ଵେତଦ୍ଵୀପାଖ୍ୟମଦ୍ଭୁତମ୍ ।
ଚତୁରସ୍ରଂ ଚତୁର୍ମୂର୍ତେଶ୍ଚତୁର୍ଧାମ ଚତୁଷ୍କୃତମ୍ ।
ଚତୁର୍ଭିଃ ପୁରୁଷାର୍ଥୈଶ୍ଚ ଚତୁର୍ଭିର୍ହେତୁଭିର୍ଵୃତମ୍ ।
ଶୂଲୈର୍ଦଶଭିରାନଦ୍ଧମୂର୍ଧ୍ଵାଧୋ ଦିଗ୍ଵିଦିକ୍ଷ୍ଵପି ।
ଅଷ୍ଟଭିର୍ନିଧିଭିର୍ଜୁଷ୍ଟମଷ୍ଟଭିଃ ସିଦ୍ଧିଭିସ୍ତଥା ।
ମନୁରୂପୈଶ୍ଚ ଦଶଭିର୍ଦିକ୍ପାଲୈଃ ପରିତୋ ଵୃତମ୍ ।
ଶ୍ୟାମୈର୍ଗୌରୈଶ୍ଚ ରକ୍ତୈଶ୍ଚ ଶୁକ୍ଲୈଶ୍ଚ ପାର୍ଷଦର୍ଷଭୈଃ ।
ଶୋଭିତଂ ଶକ୍ତିଭିସ୍ତାଭିରଦ୍ଭୁତାଭିଃ ସମଂତତଃ ॥ 5 ॥
ଏଵଂ ଜ୍ୟୋତିର୍ମୟୋ ଦେଵଃ ସଦାନଂଦଂ ପରାତ୍ପରଃ ।
ଆତ୍ମାରାମସ୍ୟ ତସ୍ୟାସ୍ତି ପ୍ରକୃତ୍ୟା ନ ସମାଗମଃ ॥ 6 ॥
ମାୟୟାଽରମମାଣସ୍ୟ ନ ଵିୟୋଗସ୍ତୟା ସହ ।
ଆତ୍ମନା ରମୟା ରେମେ ତ୍ୟକ୍ତକାଲଂ ସିସୃକ୍ଷୟା ॥ 7 ॥
ନିୟତିଃ ସା ରମାଦେଵୀ ତତ୍ପ୍ରିୟା ତଦ୍ଵଶଂ ତଦା ।
ତଲ୍ଲିଂଗଂ ଭଗଵାନ୍ ଶଂଭୁର୍ଜୋତିରୂପଃ ସନାତନଃ ।
ୟା ୟୋନିଃ ସାପରାଶକ୍ତିଃ କାମୋ ବୀଜଂ ମହଦ୍ଧରେଃ ॥ 8 ॥
ଲିଂଗୟୋନ୍ୟାତ୍ମିକା ଜାତା ଇମା ମାହେଶ୍ଵରୀ ପ୍ରଜାଃ ॥ 9 ॥
ଶକ୍ତିମାନ୍ ପୁରୁଷଃ ସୋଽୟଂ ଲିଂଗରୂପୀ ମହେଶ୍ଵରଃ ।
ତସ୍ମିନ୍ନାଵିରଭୂଲ୍ଲିଂଗେ ମହାଵିଷ୍ଣୁର୍ଜଗତ୍ପତିଃ ॥ 10 ॥
ସହସ୍ରଶୀର୍ଷା ପୁରୁଷଃ ସହସ୍ରାକ୍ଷଃ ସହସ୍ରପାତ୍ ।
ସହସ୍ରବାହୁର୍ଵିଶ୍ଵାତ୍ମା ସହସ୍ରାଂଶଃ ସହସ୍ରସୂଃ ॥ 11 ॥
ନାରାୟଣଃ ସ ଭଗଵାନାପସ୍ତସ୍ମାତ୍ସନାତନାତ୍ ।
ଆଵିରାସୀତ୍କାରଣାର୍ଣୋ ନିଧିଃ ସଂକର୍ଷଣାତ୍ମକଃ ।
ୟୋଗନିଦ୍ରାଂ ଗତସ୍ତସ୍ମିନ୍ ସହସ୍ରାଂଶଃ ସ୍ଵୟଂ ମହାନ୍ ॥ 12 ॥
ତଦ୍ରୋମବିଲ ଜାଲେଷୁ ବୀଜଂ ସଂକର୍ଷଣସ୍ୟ ଚ ।
ହୈମାନ୍ୟଂଡାନି ଜାତାନି ମହାଭୂତାଵୃତାନି ତୁ ॥ 13 ॥
ପ୍ରତ୍ୟଂଡମେଵମେକାଂଶାଦେକାଂଶାଦ୍ଵିଶତି ସ୍ଵୟମ୍ ।
ସହସ୍ରମୂର୍ଧା ଵିଶ୍ଵାତ୍ମା ମହାଵିଷ୍ଣୁଃ ସନାତନଃ ॥ 14 ॥
ଵାମାଂଗାଦସୃଜଦ୍ଵିଷ୍ଣୁଂ ଦକ୍ଷିଣାଂଗାତ୍ପ୍ରଜାପତିମ୍ ।
ଜ୍ୟୋତିର୍ଲିଂଗମୟଂ ଶଂଭୁଂ କୂର୍ଚଦେଶାଦଵାସୃଜତ୍ ॥ 15 ॥
ଅହଂକାରାତ୍ମକଂ ଵିଶ୍ଵଂ ତସ୍ମାଦେତଦ୍ଵ୍ୟଜାୟତ ॥ 16 ॥
ଅଥ ତୈସ୍ତ୍ରିଵିଧୈର୍ଵେଶୈର୍ଲୀଲାମୁଦ୍ଵହତଃ କିଲ ।
ୟୋଗନିଦ୍ରା ଭଗଵତୀ ତସ୍ୟ ଶ୍ରୀରିଵ ସଂଗତା ॥ 17 ॥
ସସୃକ୍ଷାୟାଂ ତତୋ ନାଭେସ୍ତସ୍ୟ ପଦ୍ମଂ ଵିନିର୍ୟୟୌ ।
ତନ୍ନାଲଂ ହେମନଲିନଂ ବ୍ରହ୍ମଣୋ ଲୋକମଦ୍ଭୁତମ୍ ॥ 18 ॥
ତତ୍ତ୍ଵାନି ପୂର୍ଵରୂଢାନି କାରଣାନି ପରସ୍ପରମ୍ ।
ସମଵାୟାପ୍ରୟୋଗାଚ୍ଚ ଵିଭିନ୍ନାନି ପୃଥକ୍ ପୃଥକ୍ ।
ଚିଚ୍ଛକ୍ତ୍ୟା ସଜ୍ଜମାନୋଽଥ ଭଗଵାନାଦିପୂରୁଷଃ ।
ୟୋଜୟନ୍ମାୟୟା ଦେଵୋ ୟୋଗନିଦ୍ରାମକଲ୍ପୟତ୍ ॥ 19 ॥
ୟୋଜୟିତ୍ଵା ତୁ ତାନ୍ୟେଵ ପ୍ରଵିଵେଶ ସ୍ଵୟଂ ଗୁହାମ୍ ।
ଗୁହାଂ ପ୍ରଵିଷ୍ଟେ ତସ୍ମିଂସ୍ତୁ ଜୀଵାତ୍ମା ପ୍ରତିବୁଧ୍ୟତେ ॥ 20 ॥
ସ ନିତ୍ୟୋ ନିତ୍ୟସଂବଂଧଃ ପ୍ରକୃତିଶ୍ଚ ପରୈଵ ସା ॥ 21 ॥
ଏଵଂ ସର୍ଵାତ୍ମସଂବଂଧଂ ନାଭ୍ୟାଂ ପଦ୍ମଂ ହରେରଭୂତ୍ ।
ତତ୍ର ବ୍ରହ୍ମାଭଵଦ୍ଭୂୟଶ୍ଚତୁର୍ଵେଦୀ ଚତୁର୍ମୁଖଃ ॥ 22 ॥
ସ ଜାତୋ ଭଗଵଚ୍ଛକ୍ତ୍ୟା ତତ୍କାଲଂ କିଲ ଚୋଦିତଃ ।
ସିସୃକ୍ଷାୟାଂ ମତିଂ ଚକ୍ରେ ପୂର୍ଵସଂସ୍କାରସଂସ୍କୃତଃ ।
ଦଦର୍ଶ କେଵଲଂ ଧ୍ଵାଂତଂ ନାନ୍ୟତ୍କିମପି ସର୍ଵତଃ ॥ 23 ॥
ଉଵାଚ ପୁରତସ୍ତସ୍ମୈ ତସ୍ୟ ଦିଵ୍ୟା ସରସ୍ଵତୀ ।
କାମଃ କୃଷ୍ଣାୟ ଗୋଵିଂଦ ହେ ଗୋପୀଜନ ଇତ୍ୟପି ।
ଵଲ୍ଲଭାୟ ପ୍ରିୟା ଵହ୍ନେର୍ମଂତ୍ରଂ ତେ ଦାସ୍ୟତି ପ୍ରିୟମ୍ ॥ 24 ॥
ତପସ୍ତ୍ଵଂ ତପ ଏତେନ ତଵ ସିଦ୍ଧିର୍ଭଵିଷ୍ୟତି ॥ 25 ॥
ଅଥ ତେପେ ସ ସୁଚିରଂ ପ୍ରୀଣନ୍ ଗୋଵିଂଦମଵ୍ୟୟମ୍ ।
ଶ୍ଵେତଦ୍ଵୀପପତିଂ କୃଷ୍ଣଂ ଗୋଲୋକସ୍ଥଂ ପରାତ୍ପରମ୍ ।
ପ୍ରକୃତ୍ୟା ଗୁଣରୂପିଣ୍ୟା ରୂପିଣ୍ୟା ପର୍ୟୁପାସିତମ୍ ।
ସହସ୍ରଦଲସଂପନ୍ନେ କୋଟିକିଂଜଲ୍କବୃଂହିତେ ।
ଭୂମିଶ୍ଚିଂତାମଣିସ୍ତତ୍ର କର୍ଣିକାରେ ମହାସନେ ।
ସମାସୀନଂ ଚିଦାନଂଦଂ ଜ୍ୟୋତିରୂପଂ ସନାତନମ୍ ।
ଶବ୍ଦବ୍ରହ୍ମମୟଂ ଵେଣୁଂ ଵାଦୟଂତଂ ମୁଖାଂବୁଜେ ।
ଵିଲାସିନୀଗଣଵୃତଂ ସ୍ଵୈଃ ସ୍ଵୈରଂଶୈରଭିଷ୍ଟୁତମ୍ ॥ 26 ॥
ଅଥ ଵେଣୁନିନାଦସ୍ୟ ତ୍ରୟୀମୂର୍ତିମୟୀ ଗତିଃ ।
ସ୍ଫୁରଂତୀ ପ୍ରଵିଵେଶାଶୁ ମୁଖାବ୍ଜାନି ସ୍ଵୟଂଭୁଵଃ ।
ଗାୟତ୍ରୀଂ ଗାୟତସ୍ତସ୍ମାଦଧିଗତ୍ୟ ସରୋଜଜଃ ।
ସଂସ୍କୃତଶ୍ଚାଦିଗୁରୁଣା ଦ୍ଵିଜତାମଗମତ୍ତତଃ ॥ 27 ॥
ତ୍ରୟ୍ୟା ପ୍ରବୁଦ୍ଧୋଽଥ ଵିଧିର୍ଵିଜ୍ଞାତତତ୍ତ୍ଵସାଗରଃ ।
ତୁଷ୍ଟାଵ ଵେଦସାରେଣ ସ୍ତୋତ୍ରେଣାନେନ କେଶଵମ୍ ॥ 28 ॥
ଚିଂତାମଣିପ୍ରକରସଦ୍ମସୁ କଲ୍ପଵୃକ୍ଷ
ଲକ୍ଷାଵୃତେଷୁ ସୁରଭୀରଭିପାଲୟଂତମ୍ ।
ଲକ୍ଷ୍ମୀସହସ୍ରଶତସଂଭ୍ରମସେଵ୍ୟମାନଂ
ଗୋଵିଂଦମାଦିପୁରୁଷଂ ତମହଂ ଭଜାମି ॥ 29 ॥
ଵେଣୁଂ କ୍ଵଣଂତମରଵିଂଦଦଲାୟତାକ୍ଷଂ
ବର୍ହାଵତଂସମସିତାଂବୁଦସୁଂଦରାଂଗମ୍ ।
କଂଦର୍ପକୋଟିକମନୀୟଵିଶେଷଶୋଭଂ
ଗୋଵିଂଦମାଦିପୁରୁଷଂ ତମହଂ ଭଜାମି ॥ 30 ॥
ଆଲୋଲଚଂଦ୍ରକଲସଦ୍ଵନମାଲ୍ୟଵଂଶୀ-
-ରତ୍ନାଂଗଦଂ ପ୍ରଣୟକେଲିକଲାଵିଲାସମ୍ ।
ଶ୍ୟାମଂ ତ୍ରିଭଂଗଲଲିତଂ ନିୟତପ୍ରକାଶଂ
ଗୋଵିଂଦମାଦିପୁରୁଷଂ ତମହଂ ଭଜାମି ॥ 31 ॥
ଅଂଗାନି ୟସ୍ୟ ସକଲେଂଦ୍ରିୟଵୃତ୍ତିମଂତି
ପଶ୍ୟଂତି ପାଂତି କଲୟଂତି ଚିରଂ ଜଗଂତି ।
ଆନଂଦଚିନ୍ମୟସଦୁଜ୍ଜ୍ଵଲଵିଗ୍ରହସ୍ୟ
ଗୋଵିଂଦମାଦିପୁରୁଷଂ ତମହଂ ଭଜାମି ॥ 32 ॥
ଅଦ୍ଵୈତମଚ୍ୟୁତମନାଦିମନଂତରୂପଂ
ଆଦ୍ୟଂ ପୁରାଣପୁରୁଷଂ ନଵୟୌଵନଂ ଚ ।
ଵେଦେଷୁ ଦୁର୍ଲଭମଦୁର୍ଲଭମାତ୍ମଭକ୍ତୌ
ଗୋଵିଂଦମାଦିପୁରୁଷଂ ତମହଂ ଭଜାମି ॥ 33 ॥
ପଂଥାସ୍ତୁ କୋଟିଶତଵତ୍ସରସଂପ୍ରଗମ୍ୟୋ
ଵାୟୋରଥାପି ମନସୋ ମୁନିପୁଂଗଵାନାମ୍ ।
ସୋଽପ୍ୟସ୍ତି ୟତ୍ପ୍ରପଦସୀମ୍ନ୍ୟଵିଚିଂତ୍ୟତତ୍ତ୍ଵେ
ଗୋଵିଂଦମାଦିପୁରୁଷଂ ତମହଂ ଭଜାମି ॥ 34 ॥
ଏକୋଽପ୍ୟସୌ ରଚୟିତୁଂ ଜଗଦଂଡକୋଟିଂ
ୟଚ୍ଛକ୍ତିରସ୍ତି ଜଗଦଂଡଚୟା ୟଦଂତଃ ।
ଅଂଡାଂତରସ୍ଥପରମାଣୁଚୟାଂତରସ୍ଥଂ
ଗୋଵିଂଦମାଦିପୁରୁଷଂ ତମହଂ ଭଜାମି ॥ 35 ॥
ୟଦ୍ଭାଵଭାଵିତଧିୟୋ ମନୁଜାସ୍ତଥୈଵ
ସଂପ୍ରାପ୍ୟ ରୂପମହିମାସନୟାନଭୂଷାଃ ।
ସୂକ୍ତୈର୍ୟମେଵ ନିଗମପ୍ରଥିତୈଃ ସ୍ତୁଵଂତି
ଗୋଵିଂଦମାଦିପୁରୁଷଂ ତମହଂ ଭଜାମି ॥ 36 ॥
ଆନଂଦଚିନ୍ମୟରସପ୍ରତିଭାଵିତାଭି-
-ସ୍ତାଭିର୍ୟ ଏଵ ନିଜରୂପତୟା କଲାଭିଃ ।
ଗୋଲୋକ ଏଵ ନିଵସତ୍ୟଖିଲାତ୍ମଭୂତୋ
ଗୋଵିଂଦମାଦିପୁରୁଷଂ ତମହଂ ଭଜାମି ॥ 37 ॥
ପ୍ରେମାଂଜନଚ୍ଛୁରିତଭକ୍ତିଵିଲୋଚନେନ
ସଂତଃ ସଦୈଵ ହୃଦୟେଷୁ ଵିଲୋକୟଂତି ।
ୟଂ ଶ୍ୟାମସୁଂଦରମଚିଂତ୍ୟଗୁଣସ୍ଵରୂପଂ
ଗୋଵିଂଦମାଦିପୁରୁଷଂ ତମହଂ ଭଜାମି ॥ 38 ॥
ରାମାଦିମୂର୍ତିଷୁ କଲାନିୟମେନ ତିଷ୍ଠନ୍
ନାନାଵତାରମକରୋଦ୍ଭୁଵନେଷୁ କିଂତୁ ।
କୃଷ୍ଣଃ ସ୍ଵୟଂ ସମଭଵତ୍ପରମଃ ପୁମାନ୍ ୟୋ
ଗୋଵିଂଦମାଦିପୁରୁଷଂ ତମହଂ ଭଜାମି ॥ 39 ॥
ୟସ୍ୟ ପ୍ରଭା ପ୍ରଭଵତୋ ଜଗଦଂଡକୋଟି-
-କୋଟିଷ୍ଵଶେଷଵସୁଧାଦି ଵିଭୂତିଭିନ୍ନମ୍ ।
ତଦ୍ବ୍ରହ୍ମ ନିଷ୍କଲମନଂତମଶେଷଭୂତଂ
ଗୋଵିଂଦମାଦିପୁରୁଷଂ ତମହଂ ଭଜାମି ॥ 40 ॥
ମାୟା ହି ୟସ୍ୟ ଜଗଦଂଡଶତାନି ସୂତେ
ତ୍ରୈଗୁଣ୍ୟତଦ୍ଵିଷୟଵେଦଵିତାୟମାନା ।
ସତ୍ତ୍ଵାଵଲଂବିପରସତ୍ତ୍ଵଂ ଵିଶୁଦ୍ଧସତ୍ତ୍ଵଂ
ଗୋଵିଂଦମାଦିପୁରୁଷଂ ତମହଂ ଭଜାମି ॥ 41 ॥
ଆନଂଦଚିନ୍ମୟରସାତ୍ମତୟା ମନଃସୁ
ୟଃ ପ୍ରାଣିନାଂ ପ୍ରତିଫଲନ୍ ସ୍ମରତାମୁପେତ୍ୟ ।
ଲୀଲାୟିତେନ ଭୁଵନାନି ଜୟତ୍ୟଜସ୍ରଂ
ଗୋଵିଂଦମାଦିପୁରୁଷଂ ତମହଂ ଭଜାମି ॥ 42 ॥
ଗୋଲୋକନାମ୍ନି ନିଜଧାମ୍ନି ତଲେ ଚ ତସ୍ୟ
ଦେଵି ମହେଶହରିଧାମସୁ ତେଷୁ ତେଷୁ ।
ତେ ତେ ପ୍ରଭାଵନିଚୟା ଵିହିତାଶ୍ଚ ୟେନ
ଗୋଵିଂଦମାଦିପୁରୁଷଂ ତମହଂ ଭଜାମି ॥ 43 ॥
ସୃଷ୍ଟିସ୍ଥିତିପ୍ରଲୟସାଧନଶକ୍ତିରେକା
ଛାୟେଵ ୟସ୍ୟ ଭୁଵନାନି ବିଭର୍ତି ଦୁର୍ଗା ।
ଇଚ୍ଛାନୁରୂପମପି ୟସ୍ୟ ଚ ଚେଷ୍ଟତେ ସା
ଗୋଵିଂଦମାଦିପୁରୁଷଂ ତମହଂ ଭଜାମି ॥ 44 ॥
କ୍ଷୀରଂ ୟଥା ଦଧି ଵିକାରଵିଶେଷୟୋଗାତ୍
ସଂଜାୟତେ ନ ହି ତତଃ ପୃଥଗସ୍ତି ହେତୋଃ ।
ୟଃ ଶଂଭୁତାମପି ତଥା ସମୁପୈତି କାର୍ୟା-
-ଦ୍ଗୋଵିଂଦମାଦିପୁରୁଷଂ ତମହଂ ଭଜାମି ॥ 45 ॥
ଦୀପାର୍ଚିରେଵ ହି ଦଶାଂତରମଭ୍ୟୁପେତ୍ୟ
ଦୀପାୟତେ ଵିଵୃତହେତୁସମାନଧର୍ମା ।
ୟସ୍ତାଦୃଗେଵ ହି ଚ ଵିଷ୍ଣୁତୟା ଵିଭାତି
ଗୋଵିଂଦମାଦିପୁରୁଷଂ ତମହଂ ଭଜାମି ॥ 46 ॥
ୟଃ କାରଣାର୍ଣଵଜଲେ ଭଜତି ସ୍ମ ୟୋଗ-
-ନିଦ୍ରାମନଂତଜଗଦଂଡସରୋମକୂପଃ ।
ଆଧାରଶକ୍ତିମଵଲଂବ୍ୟ ପରାଂ ସ୍ଵମୂର୍ତିଂ
ଗୋଵିଂଦମାଦିପୁରୁଷଂ ତମହଂ ଭଜାମି ॥ 47 ॥
ୟସ୍ୟୈକନିଶ୍ଵସିତକାଲମଥାଵଲଂବ୍ୟ
ଜୀଵଂତି ଲୋମବିଲଜା ଜଗଦଂଡନାଥାଃ ।
ଵିଷ୍ଣୁର୍ମହାନ୍ ସ ଇହ ୟସ୍ୟ କଲାଵିଶେଷୋ
ଗୋଵିଂଦମାଦିପୁରୁଷଂ ତମହଂ ଭଜାମି ॥ 48 ॥
ଭାସ୍ଵାନ୍ ୟଥାଶ୍ମଶକଲେଷୁ ନିଜେଷୁ ତେଜଃ
ସ୍ଵୀୟଂ କିୟତ୍ପ୍ରକଟୟତ୍ୟପି ତଦ୍ଵଦତ୍ର ।
ବ୍ରହ୍ମା ୟ ଏଷ ଜଗଦଂଡଵିଧାନକର୍ତା
ଗୋଵିଂଦମାଦିପୁରୁଷଂ ତମହଂ ଭଜାମି ॥ 49 ॥
ୟତ୍ପାଦପଲ୍ଲଵୟୁଗଂ ଵିନିଧାୟ କୁଂଭ-
-ଦ୍ଵଂଦ୍ଵେ ପ୍ରଣାମସମୟେ ସ ଗଣାଧିରାଜଃ ।
ଵିଘ୍ନାନ୍ ଵିହଂତୁମଲମସ୍ୟ ଜଗତ୍ତ୍ରୟସ୍ୟ
ଗୋଵିଂଦମାଦିପୁରୁଷଂ ତମହଂ ଭଜାମି ॥ 50 ॥
ଅଗ୍ନିର୍ମହୀ ଗଗନମଂବୁ ମରୁଦ୍ଦିଶଶ୍ଚ
କାଲସ୍ତଥାତ୍ମମନସୀତି ଜଗତ୍ତ୍ରୟାଣି ।
ୟସ୍ମାଦ୍ଭଵଂତି ଵିଭଵଂତି ଵିଶଂତି ୟଂ ଚ
ଗୋଵିଂଦମାଦିପୁରୁଷଂ ତମହଂ ଭଜାମି ॥ 51 ॥
ୟଚ୍ଚକ୍ଷୁରେଷ ସଵିତା ସକଲଗ୍ରହାଣାଂ
ରାଜା ସମସ୍ତସୁରମୂର୍ତିରଶେଷତେଜାଃ ।
ୟସ୍ୟାଜ୍ଞୟା ଭ୍ରମତି ସଂଭୃତକାଲଚକ୍ରୋ
ଗୋଵିଂଦମାଦିପୁରୁଷଂ ତମହଂ ଭଜାମି ॥ 52 ॥
ଧର୍ମୋଽଥ ପାପନିଚୟଃ ଶ୍ରୁତୟସ୍ତପାଂସି
ବ୍ରହ୍ମାଦିକୀଟପତଗାଵଧୟଶ୍ଚ ଜୀଵାଃ ।
ୟଦ୍ଦତମାତ୍ରଵିଭଵପ୍ରକଟପ୍ରଭାଵା
ଗୋଵିଂଦମାଦିପୁରୁଷଂ ତମହଂ ଭଜାମି ॥ 53 ॥
ୟସ୍ତ୍ଵିଂଦ୍ରଗୋପମଥଵେଂଦ୍ରମହୋ ସ୍ଵକର୍ମ-
-ବଂଧାନୁରୂପଫଲଭାଜନମାତନୋତି ।
କର୍ମାଣି ନିର୍ଦହତି କିଂତୁ ଚ ଭକ୍ତିଭାଜାଂ
ଗୋଵିଂଦମାଦିପୁରୁଷଂ ତମହଂ ଭଜାମି ॥ 54 ॥
ୟଂ କ୍ରୋଧକାମସହଜପ୍ରଣୟାଦିଭୀତି-
-ଵାତ୍ସଲ୍ୟମୋହଗୁରୁଗୌରଵସେଵ୍ୟଭାଵୈଃ ।
ସଂଚିଂତ୍ୟ ତସ୍ୟ ସଦୃଶୀଂ ତନୁମାପୁରେତେ
ଗୋଵିଂଦମାଦିପୁରୁଷଂ ତମହଂ ଭଜାମି ॥ 55 ॥
ଶ୍ରିୟଃ କାଂତାଃ କାଂତଃ ପରମପୁରୁଷଃ କଲ୍ପତରଵୋ
ଦ୍ରୁମା ଭୂମିଶ୍ଚିଂତାମଣିଗଣମୟି ତୋୟମମୃତମ୍ ।
କଥା ଗାନଂ ନାଟ୍ୟଂ ଗମନମପି ଵଂଶୀ ପ୍ରିୟସଖି
ଚିଦାନଂଦଂ ଜ୍ୟୋତିଃ ପରମପି ତଦାସ୍ଵାଦ୍ୟମପି ଚ ।
ସ ୟତ୍ର କ୍ଷୀରାବ୍ଧିଃ ସ୍ରଵତି ସୁରଭୀଭ୍ୟଶ୍ଚ ସୁମହାନ୍
ନିମେଷାର୍ଧାଖ୍ୟୋ ଵା ଵ୍ରଜତି ନ ହି ୟତ୍ରାପି ସମୟଃ ।
ଭଜେ ଶ୍ଵେତଦ୍ଵୀପଂ ତମହମିହ ଗୋଲୋକମିତି ୟଂ
ଵିଦଂତସ୍ତେ ସଂତଃ କ୍ଷିତିଵିରଲଚାରାଃ କତିପୟେ ॥ 56 ॥
ଅଥୋଵାଚ ମହାଵିଷ୍ଣୁର୍ଭଗଵଂତଂ ପ୍ରଜାପତିମ୍ ।
ବ୍ରହ୍ମନ୍ ମହତ୍ତ୍ଵଵିଜ୍ଞାନେ ପ୍ରଜାସର୍ଗେ ଚ ଚେନ୍ମତିଃ ।
ପଂଚଶ୍ଲୋକୀମିମାଂ ଵିଦ୍ୟାଂ ଵତ୍ସ ଦତ୍ତାଂ ନିବୋଧ ମେ ॥ 57 ॥
ପ୍ରବୁଦ୍ଧେ ଜ୍ଞାନଭକ୍ତିଭ୍ୟାମାତ୍ମନ୍ୟାନଂଦଚିନ୍ମୟୀ ।
ଉଦେତ୍ୟନୁତ୍ତମା ଭକ୍ତିର୍ଭଗଵତ୍ପ୍ରେମଲକ୍ଷଣା ॥ 58 ॥
ପ୍ରମାଣୈସ୍ତତ୍ ସଦାଚାରୈସ୍ତଦଭ୍ୟାସୈର୍ନିରଂତରମ୍ ।
ବୋଧୟନାତ୍ମନାତ୍ମାନଂ ଭକ୍ତିମପ୍ୟୁତ୍ତମାଂ ଲଭେତ୍ ॥ 59 ॥
ୟସ୍ୟାଃ ଶ୍ରେୟସ୍କରଂ ନାସ୍ତି ୟୟା ନିର୍ଵୃତିମାପ୍ନୁୟାତ୍ ।
ୟା ସାଧୟତି ମାମେଵ ଭକ୍ତିଂ ତାମେଵ ସାଧୟେତ୍ ॥ 60 ॥
ଧର୍ମାନନ୍ୟାନ୍ ପରିତ୍ୟଜ୍ୟ ମାମେକଂ ଭଜ ଵିଶ୍ଵସନ୍ ।
ୟାଦୃଶୀ ୟାଦୃଶୀ ଶ୍ରଦ୍ଧା ସିଦ୍ଧିର୍ଭଵତି ତାଦୃଶୀ ।
କୁର୍ଵନ୍ନିରଂତରଂ କର୍ମ ଲୋକୋଽୟମନୁଵର୍ତତେ ।
ତେନୈଵ କର୍ମଣା ଧ୍ୟାୟନ୍ମାଂ ପରାଂ ଭକ୍ତିମିଚ୍ଛତି ॥ 61 ॥
ଅହଂ ହି ଵିଶ୍ଵସ୍ୟ ଚରାଚରସ୍ୟ
ବୀଜଂ ପ୍ରଧାନଂ ପ୍ରକୃତିଃ ପୁମାଂଶ୍ଚ ।
ମୟାହିତଂ ତେଜ ଇଦଂ ବିଭର୍ଷି
ଵିଧେ ଵିଧେହି ତ୍ଵମଥୋ ଜଗଂତି ॥ 62 ॥
ଇତି ଶ୍ରୀ ବ୍ରହ୍ମ ସଂହିତା ସଂପୂର୍ଣମ୍ ।