ସୂର୍ୟସ୍ପର୍ଧିକିରୀଟମୂର୍ଧ୍ଵତିଲକପ୍ରୋଦ୍ଭାସିଫାଲାଂତରଂ
କାରୁଣ୍ୟାକୁଲନେତ୍ରମାର୍ଦ୍ରହସିତୋଲ୍ଲାସଂ ସୁନାସାପୁଟମ୍।
ଗଂଡୋଦ୍ୟନ୍ମକରାଭକୁଂଡଲୟୁଗଂ କଂଠୋଜ୍ଵଲତ୍କୌସ୍ତୁଭଂ
ତ୍ଵଦ୍ରୂପଂ ଵନମାଲ୍ୟହାରପଟଲଶ୍ରୀଵତ୍ସଦୀପ୍ରଂ ଭଜେ॥1॥
କେୟୂରାଂଗଦକଂକଣୋତ୍ତମମହାରତ୍ନାଂଗୁଲୀୟାଂକିତ-
ଶ୍ରୀମଦ୍ବାହୁଚତୁଷ୍କସଂଗତଗଦାଶଂଖାରିପଂକେରୁହାମ୍ ।
କାଂଚିତ୍ କାଂଚନକାଂଚିଲାଂଚ୍ଛିତଲସତ୍ପୀତାଂବରାଲଂବିନୀ-
ମାଲଂବେ ଵିମଲାଂବୁଜଦ୍ୟୁତିପଦାଂ ମୂର୍ତିଂ ତଵାର୍ତିଚ୍ଛିଦମ୍ ॥2॥
ୟତ୍ତ୍ତ୍ରୈଲୋକ୍ୟମହୀୟସୋଽପି ମହିତଂ ସମ୍ମୋହନଂ ମୋହନାତ୍
କାଂତଂ କାଂତିନିଧାନତୋଽପି ମଧୁରଂ ମାଧୁର୍ୟଧୁର୍ୟାଦପି ।
ସୌଂଦର୍ୟୋତ୍ତରତୋଽପି ସୁଂଦରତରଂ ତ୍ଵଦ୍ରୂପମାଶ୍ଚର୍ୟତୋଽ-
ପ୍ୟାଶ୍ଚର୍ୟଂ ଭୁଵନେ ନ କସ୍ୟ କୁତୁକଂ ପୁଷ୍ଣାତି ଵିଷ୍ଣୋ ଵିଭୋ ॥3॥
ତତ୍ତାଦୃଙ୍ମଧୁରାତ୍ମକଂ ତଵ ଵପୁଃ ସଂପ୍ରାପ୍ୟ ସଂପନ୍ମୟୀ
ସା ଦେଵୀ ପରମୋତ୍ସୁକା ଚିରତରଂ ନାସ୍ତେ ସ୍ଵଭକ୍ତେଷ୍ଵପି ।
ତେନାସ୍ୟା ବତ କଷ୍ଟମଚ୍ୟୁତ ଵିଭୋ ତ୍ଵଦ୍ରୂପମାନୋଜ୍ଞକ –
ପ୍ରେମସ୍ଥୈର୍ୟମୟାଦଚାପଲବଲାଚ୍ଚାପଲ୍ୟଵାର୍ତୋଦଭୂତ୍ ॥4॥
ଲକ୍ଷ୍ମୀସ୍ତାଵକରାମଣୀୟକହୃତୈଵେୟଂ ପରେଷ୍ଵସ୍ଥିରେ-
ତ୍ୟସ୍ମିନ୍ନନ୍ୟଦପି ପ୍ରମାଣମଧୁନା ଵକ୍ଷ୍ୟାମି ଲକ୍ଷ୍ମୀପତେ ।
ୟେ ତ୍ଵଦ୍ଧ୍ୟାନଗୁଣାନୁକୀର୍ତନରସାସକ୍ତା ହି ଭକ୍ତା ଜନା-
ସ୍ତେଷ୍ଵେଷା ଵସତି ସ୍ଥିରୈଵ ଦୟିତପ୍ରସ୍ତାଵଦତ୍ତାଦରା ॥5॥
ଏଵଂଭୂତମନୋଜ୍ଞତାନଵସୁଧାନିଷ୍ୟଂଦସଂଦୋହନଂ
ତ୍ଵଦ୍ରୂପଂ ପରଚିଦ୍ରସାୟନମୟଂ ଚେତୋହରଂ ଶୃଣ୍ଵତାମ୍ ।
ସଦ୍ୟଃ ପ୍ରେରୟତେ ମତିଂ ମଦୟତେ ରୋମାଂଚୟତ୍ୟଂଗକଂ
ଵ୍ୟାସିଂଚତ୍ୟପି ଶୀତଵାଷ୍ପଵିସରୈରାନଂଦମୂର୍ଛୋଦ୍ଭଵୈଃ ॥6॥
ଏଵଂଭୂତତୟା ହି ଭକ୍ତ୍ୟଭିହିତୋ ୟୋଗସ୍ସ ୟୋଗଦ୍ଵୟାତ୍
କର୍ମଜ୍ଞାନମୟାତ୍ ଭୃଶୋତ୍ତମତରୋ ୟୋଗୀଶ୍ଵରୈର୍ଗୀୟତେ ।
ସୌଂଦର୍ୟୈକରସାତ୍ମକେ ତ୍ଵୟି ଖଲୁ ପ୍ରେମପ୍ରକର୍ଷାତ୍ମିକା
ଭକ୍ତିର୍ନିଶ୍ରମମେଵ ଵିଶ୍ଵପୁରୁଷୈର୍ଲଭ୍ୟା ରମାଵଲ୍ଲଭ ॥7॥
ନିଷ୍କାମଂ ନିୟତସ୍ଵଧର୍ମଚରଣଂ ୟତ୍ କର୍ମୟୋଗାଭିଧଂ
ତଦ୍ଦୂରେତ୍ୟଫଲଂ ୟଦୌପନିଷଦଜ୍ଞାନୋପଲଭ୍ୟଂ ପୁନଃ ।
ତତ୍ତ୍ଵଵ୍ୟକ୍ତତୟା ସୁଦୁର୍ଗମତରଂ ଚିତ୍ତସ୍ୟ ତସ୍ମାଦ୍ଵିଭୋ
ତ୍ଵତ୍ପ୍ରେମାତ୍ମକଭକ୍ତିରେଵ ସତତଂ ସ୍ଵାଦୀୟସୀ ଶ୍ରେୟସୀ ॥8॥
ଅତ୍ୟାୟାସକରାଣି କର୍ମପଟଲାନ୍ୟାଚର୍ୟ ନିର୍ୟନ୍ମଲା
ବୋଧେ ଭକ୍ତିପଥେଽଥଵାଽପ୍ୟୁଚିତତାମାୟାଂତି କିଂ ତାଵତା ।
କ୍ଲିଷ୍ଟ୍ଵା ତର୍କପଥେ ପରଂ ତଵ ଵପୁର୍ବ୍ରହ୍ମାଖ୍ୟମନ୍ୟେ ପୁନ-
ଶ୍ଚିତ୍ତାର୍ଦ୍ରତ୍ଵମୃତେ ଵିଚିଂତ୍ୟ ବହୁଭିସ୍ସିଦ୍ଧ୍ୟଂତି ଜନ୍ମାଂତରୈଃ ॥9॥
ତ୍ଵଦ୍ଭକ୍ତିସ୍ତୁ କଥାରସାମୃତଝରୀନିର୍ମଜ୍ଜନେନ ସ୍ଵୟଂ
ସିଦ୍ଧ୍ୟଂତୀ ଵିମଲପ୍ରବୋଧପଦଵୀମକ୍ଲେଶତସ୍ତନ୍ଵତୀ ।
ସଦ୍ୟସ୍ସିଦ୍ଧିକରୀ ଜୟତ୍ୟୟି ଵିଭୋ ସୈଵାସ୍ତୁ ମେ ତ୍ଵତ୍ପଦ-
ପ୍ରେମପ୍ରୌଢିରସାର୍ଦ୍ରତା ଦ୍ରୁତତରଂ ଵାତାଲୟାଧୀଶ୍ଵର ॥10॥