ব্যক্তাব্যক্তমিদং ন কিংচিদভবত্প্রাক্প্রাকৃতপ্রক্ষযে
মাযাযাং গুণসাম্যরুদ্ধবিকৃতৌ ত্বয্যাগতাযাং লযম্ ।
নো মৃত্যুশ্চ তদাঽমৃতং চ সমভূন্নাহ্নো ন রাত্রেঃ স্থিতি-
স্তত্রৈকস্ত্বমশিষ্যথাঃ কিল পরানংদপ্রকাশাত্মনা ॥1॥
কালঃ কর্ম গুণাশ্চ জীবনিবহা বিশ্বং চ কার্যং বিভো
চিল্লীলারতিমেযুষি ত্বযি তদা নির্লীনতামাযযুঃ ।
তেষাং নৈব বদংত্যসত্ত্বমযি ভোঃ শক্ত্যাত্মনা তিষ্ঠতাং
নো চেত্ কিং গগনপ্রসূনসদৃশাং ভূযো ভবেত্সংভবঃ ॥2॥
এবং চ দ্বিপরার্ধকালবিগতাবীক্ষাং সিসৃক্ষাত্মিকাং
বিভ্রাণে ত্বযি চুক্ষুভে ত্রিভুবনীভাবায মাযা স্বযম্ ।
মাযাতঃ খলু কালশক্তিরখিলাদৃষ্টং স্বভাবোঽপি চ
প্রাদুর্ভূয গুণান্বিকাস্য বিদধুস্তস্যাস্সহাযক্রিযাম্ ॥3॥
মাযাসন্নিহিতোঽপ্রবিষ্টবপুষা সাক্ষীতি গীতো ভবান্
ভেদৈস্তাং প্রতিবিংবতো বিবিশিবান্ জীবোঽপি নৈবাপরঃ ।
কালাদিপ্রতিবোধিতাঽথ ভবতা সংচোদিতা চ স্বযং
মাযা সা খলু বুদ্ধিতত্ত্বমসৃজদ্যোঽসৌ মহানুচ্যতে ॥4॥
তত্রাসৌ ত্রিগুণাত্মকোঽপি চ মহান্ সত্ত্বপ্রধানঃ স্বযং
জীবেঽস্মিন্ খলু নির্বিকল্পমহমিত্যুদ্বোধনিষ্পাদ্কঃ ।
চক্রেঽস্মিন্ সবিকল্পবোধকমহংতত্ত্বং মহান্ খল্বসৌ
সংপুষ্টং ত্রিগুণৈস্তমোঽতিবহুলং বিষ্ণো ভবত্প্রেরণাত্ ॥5॥
সোঽহং চ ত্রিগুণক্রমাত্ ত্রিবিধতামাসাদ্য বৈকারিকো
ভূযস্তৈজসতামসাবিতি ভবন্নাদ্যেন সত্ত্বাত্মনা
দেবানিংদ্রিযমানিনোঽকৃত দিশাবাতার্কপাশ্যশ্বিনো
বহ্নীংদ্রাচ্যুতমিত্রকান্ বিধুবিধিশ্রীরুদ্রশারীরকান্ ॥6॥
ভূমন্ মানসবুদ্ধ্যহংকৃতিমিলচ্চিত্তাখ্যবৃত্ত্যন্বিতং
তচ্চাংতঃকরণং বিভো তব বলাত্ সত্ত্বাংশ এবাসৃজত্ ।
জাতস্তৈজসতো দশেংদ্রিযগণস্তত্তামসাংশাত্পুন-
স্তন্মাত্রং নভসো মরুত্পুরপতে শব্দোঽজনি ত্বদ্বলাত্ ॥7॥
শ্ব্দাদ্ব্যোম ততঃ সসর্জিথ বিভো স্পর্শং ততো মারুতং
তস্মাদ্রূপমতো মহোঽথ চ রসং তোযং চ গংধং মহীম্ ।
এবং মাধব পূর্বপূর্বকলনাদাদ্যাদ্যধর্মান্বিতং
ভূতগ্রামমিমং ত্বমেব ভগবন্ প্রাকাশযস্তামসাত্ ॥8॥
এতে ভূতগণাস্তথেংদ্রিযগণা দেবাশ্চ জাতাঃ পৃথঙ্-
নো শেকুর্ভুবনাংডনির্মিতিবিধৌ দেবৈরমীভিস্তদা ।
ত্বং নানাবিধসূক্তিভির্নুতগুণস্তত্ত্বান্যমূন্যাবিশং-
শ্চেষ্টাশক্তিমুদীর্য তানি ঘটযন্ হৈরণ্যমংডং ব্যধাঃ ॥9॥
অংডং তত্খলু পূর্বসৃষ্টসলিলেঽতিষ্ঠত্ সহস্রং সমাঃ
নির্ভিংদন্নকৃথাশ্চতুর্দশজগদ্রূপং বিরাডাহ্বযম্ ।
সাহস্রৈঃ করপাদমূর্ধনিবহৈর্নিশ্শেষজীবাত্মকো
নির্ভাতোঽসি মরুত্পুরাধিপ স মাং ত্রাযস্ব সর্বামযাত্ ॥10॥