ēvaṃ tāvat prākṛtaprakṣayāntē
brāhmē kalpē hyādimē labdhajanmā ।
brahmā bhūyastvatta ēvāpya vēdān
sṛṣṭiṃ chakrē pūrvakalpōpamānām ॥1॥
sō’yaṃ chaturyugasahasramitānyahāni
tāvanmitāścha rajanīrbahuśō nināya ।
nidrātyasau tvayi nilīya samaṃ svasṛṣṭai-
rnaimittikapralayamāhuratō’sya rātrim ॥2॥
asmādṛśāṃ punaraharmukhakṛtyatulyāṃ
sṛṣṭiṃ karōtyanudinaṃ sa bhavatprasādāt ।
prāgbrāhmakalpajanuṣāṃ cha parāyuṣāṃ tu
suptaprabōdhanasamāsti tadā’pi sṛṣṭiḥ ॥3॥
pañchāśadabdamadhunā svavayōrdharūpa-
mēkaṃ parārdhamativṛtya hi vartatē’sau ।
tatrāntyarātrijanitān kathayāmi bhūman
paśchāddināvataraṇē cha bhavadvilāsān ॥4॥
dināvasānē’tha sarōjayōniḥ
suṣuptikāmastvayi sannililyē ।
jaganti cha tvajjaṭharaṃ samīyu-
stadēdamēkārṇavamāsa viśvam ॥5॥
tavaiva vēṣē phaṇirāji śēṣē
jalaikaśēṣē bhuvanē sma śēṣē ।
ānandasāndrānubhavasvarūpaḥ
svayōganidrāparimudritātmā ॥6॥
kālākhyaśaktiṃ pralayāvasānē
prabōdhayētyādiśatā kilādau ।
tvayā prasuptaṃ parisuptaśakti-
vrajēna tatrākhilajīvadhāmnā ॥7॥
chaturyugāṇāṃ cha sahasramēvaṃ
tvayi prasuptē punaradvitīyē ।
kālākhyaśaktiḥ prathamaprabuddhā
prābōdhayattvāṃ kila viśvanātha ॥8॥
vibudhya cha tvaṃ jalagarbhaśāyin
vilōkya lōkānakhilān pralīnān ।
tēṣvēva sūkṣmātmatayā nijāntaḥ –
sthitēṣu viśvēṣu dadātha dṛṣṭim ॥9॥
tatastvadīyādayi nābhirandhrā-
dudañchitaṃ kiñchana divyapadmam ।
nilīnaniśśēṣapadārthamālā-
saṅkṣēparūpaṃ mukulāyamānam ॥10॥
tadētadambhōruhakuḍmalaṃ tē
kalēvarāt tōyapathē prarūḍham ।
bahirnirītaṃ paritaḥ sphuradbhiḥ
svadhāmabhirdhvāntamalaṃ nyakṛntat ॥11॥
samphullapatrē nitarāṃ vichitrē
tasmin bhavadvīryadhṛtē sarōjē ।
sa padmajanmā vidhirāvirāsīt
svayamprabuddhākhilavēdarāśiḥ ॥12॥
asmin parātman nanu pādmakalpē
tvamitthamutthāpitapadmayōniḥ ।
anantabhūmā mama rōgarāśiṃ
nirundhi vātālayavāsa viṣṇō ॥13॥