વૈકુંઠ વર્ધિતબલોઽથ ભવત્પ્રસાદા-
દંભોજયોનિરસૃજત્ કિલ જીવદેહાન્ ।
સ્થાસ્નૂનિ ભૂરુહમયાનિ તથા તિરશ્ચાં
જાતિં મનુષ્યનિવહાનપિ દેવભેદાન્ ॥1॥
મિથ્યાગ્રહાસ્મિમતિરાગવિકોપભીતિ-
રજ્ઞાનવૃત્તિમિતિ પંચવિધાં સ સૃષ્ટ્વા ।
ઉદ્દામતામસપદાર્થવિધાનદૂન –
સ્તેને ત્વદીયચરણસ્મરણં વિશુદ્ધ્યૈ ॥2॥
તાવત્ સસર્જ મનસા સનકં સનંદં
ભૂયઃ સનાતનમુનિં ચ સનત્કુમારમ્ ।
તે સૃષ્ટિકર્મણિ તુ તેન નિયુજ્યમાના-
સ્ત્વત્પાદભક્તિરસિકા જગૃહુર્ન વાણીમ્ ॥3॥
તાવત્ પ્રકોપમુદિતં પ્રતિરુંધતોઽસ્ય
ભ્રૂમધ્યતોઽજનિ મૃડો ભવદેકદેશઃ ।
નામાનિ મે કુરુ પદાનિ ચ હા વિરિંચે-
ત્યાદૌ રુરોદ કિલ તેન સ રુદ્રનામા ॥4॥
એકાદશાહ્વયતયા ચ વિભિન્નરૂપં
રુદ્રં વિધાય દયિતા વનિતાશ્ચ દત્વા ।
તાવંત્યદત્ત ચ પદાનિ ભવત્પ્રણુન્નઃ
પ્રાહ પ્રજાવિરચનાય ચ સાદરં તમ્ ॥5॥
રુદ્રાભિસૃષ્ટભયદાકૃતિરુદ્રસંઘ-
સંપૂર્યમાણભુવનત્રયભીતચેતાઃ ।
મા મા પ્રજાઃ સૃજ તપશ્ચર મંગલાયે-
ત્યાચષ્ટ તં કમલભૂર્ભવદીરિતાત્મા ॥6॥
તસ્યાથ સર્ગરસિકસ્ય મરીચિરત્રિ-
સ્તત્રાઙિગરાઃ ક્રતુમુનિઃ પુલહઃ પુલસ્ત્યઃ ।
અંગાદજાયત ભૃગુશ્ચ વસિષ્ઠદક્ષૌ
શ્રીનારદશ્ચ ભગવન્ ભવદંઘ્રિદાસઃ ॥7॥
ધર્માદિકાનભિસૃજન્નથ કર્દમં ચ
વાણીં વિધાય વિધિરંગજસંકુલોઽભૂત્ ।
ત્વદ્બોધિતૈસ્સનકદક્ષમુખૈસ્તનૂજૈ-
રુદ્બોધિતશ્ચ વિરરામ તમો વિમુંચન્ ॥8॥
વેદાન્ પુરાણનિવહાનપિ સર્વવિદ્યાઃ
કુર્વન્ નિજાનનગણાચ્ચતુરાનનોઽસૌ ।
પુત્રેષુ તેષુ વિનિધાય સ સર્ગવૃદ્ધિ-
મપ્રાપ્નુવંસ્તવ પદાંબુજમાશ્રિતોભૂત્ ॥9॥
જાનન્નુપાયમથ દેહમજો વિભજ્ય
સ્રીપુંસભાવમભજન્મનુતદ્વધૂભ્યામ્ ।
તાભ્યાં ચ માનુષકુલાનિ વિવર્ધયંસ્ત્વં
ગોવિંદ મારુતપુરેશ નિરુંધિ રોગાન્ ॥10॥