වෛකුංඨ වර්ධිතබලෝऽථ භවත්ප්රසාදා-
දංභෝජයෝනිරසෘජත් කිල ජීවදේහාන් ।
ස්ථාස්නූනි භූරුහමයානි තථා තිරශ්චාං
ජාතිං මනුෂ්යනිවහානපි දේවභේදාන් ॥1॥
මිථ්යාග්රහාස්මිමතිරාගවිකෝපභීති-
රජ්ඤානවෘත්තිමිති පංචවිධාං ස සෘෂ්ට්වා ।
උද්දාමතාමසපදාර්ථවිධානදූන –
ස්තේනේ ත්වදීයචරණස්මරණං විශුද්ධ්යෛ ॥2॥
තාවත් සසර්ජ මනසා සනකං සනංදං
භූයඃ සනාතනමුනිං ච සනත්කුමාරම් ।
තේ සෘෂ්ටිකර්මණි තු තේන නියුජ්යමානා-
ස්ත්වත්පාදභක්තිරසිකා ජගෘහුර්න වාණීම් ॥3॥
තාවත් ප්රකෝපමුදිතං ප්රතිරුංධතෝऽස්ය
භ්රූමධ්යතෝऽජනි මෘඩෝ භවදේකදේශඃ ।
නාමානි මේ කුරු පදානි ච හා විරිංචේ-
ත්යාදෞ රුරෝද කිල තේන ස රුද්රනාමා ॥4॥
ඒකාදශාහ්වයතයා ච විභින්නරූපං
රුද්රං විධාය දයිතා වනිතාශ්ච දත්වා ।
තාවංත්යදත්ත ච පදානි භවත්ප්රණුන්නඃ
ප්රාහ ප්රජාවිරචනාය ච සාදරං තම් ॥5॥
රුද්රාභිසෘෂ්ටභයදාකෘතිරුද්රසංඝ-
සංපූර්යමාණභුවනත්රයභීතචේතාඃ ।
මා මා ප්රජාඃ සෘජ තපශ්චර මංගලායේ-
ත්යාචෂ්ට තං කමලභූර්භවදීරිතාත්මා ॥6॥
තස්යාථ සර්ගරසිකස්ය මරීචිරත්රි-
ස්තත්රාඞිගරාඃ ක්රතුමුනිඃ පුලහඃ පුලස්ත්යඃ ।
අංගාදජායත භෘගුශ්ච වසිෂ්ඨදක්ෂෞ
ශ්රීනාරදශ්ච භගවන් භවදංඝ්රිදාසඃ ॥7॥
ධර්මාදිකානභිසෘජන්නථ කර්දමං ච
වාණීං විධාය විධිරංගජසංකුලෝऽභූත් ।
ත්වද්බෝධිතෛස්සනකදක්ෂමුඛෛස්තනූජෛ-
රුද්බෝධිතශ්ච විරරාම තමෝ විමුංචන් ॥8॥
වේදාන් පුරාණනිවහානපි සර්වවිද්යාඃ
කුර්වන් නිජානනගණාච්චතුරානනෝऽසෞ ।
පුත්රේෂු තේෂු විනිධාය ස සර්ගවෘද්ධි-
මප්රාප්නුවංස්තව පදාංබුජමාශ්රිතෝභූත් ॥9॥
ජානන්නුපායමථ දේහමජෝ විභජ්ය
ස්රීපුංසභාවමභජන්මනුතද්වධූභ්යාම් ।
තාභ්යාං ච මානුෂකුලානි විවර්ධයංස්ත්වං
ගෝවිංද මාරුතපුරේශ නිරුංධි රෝගාන් ॥10॥