સમનુસ્મૃતતાવકાંઘ્રિયુગ્મઃ
સ મનુઃ પંકજસંભવાંગજન્મા ।
નિજમંતરમંતરાયહીનં
ચરિતં તે કથયન્ સુખં નિનાય ॥1॥
સમયે ખલુ તત્ર કર્દમાખ્યો
દ્રુહિણચ્છાયભવસ્તદીયવાચા ।
ધૃતસર્ગરસો નિસર્ગરમ્યં
ભગવંસ્ત્વામયુતં સમાઃ સિષેવે ॥2॥
ગરુડોપરિ કાલમેઘક્રમં
વિલસત્કેલિસરોજપાણિપદ્મમ્ ।
હસિતોલ્લસિતાનનં વિભો ત્વં
વપુરાવિષ્કુરુષે સ્મ કર્દમાય ॥3॥
સ્તુવતે પુલકાવૃતાય તસ્મૈ
મનુપુત્રીં દયિતાં નવાપિ પુત્રીઃ ।
કપિલં ચ સુતં સ્વમેવ પશ્ચાત્
સ્વગતિં ચાપ્યનુગૃહ્ય નિર્ગતોઽભૂઃ ॥4॥
સ મનુઃ શતરૂપયા મહિષ્યા
ગુણવત્યા સુતયા ચ દેવહૂત્યા ।
ભવદીરિતનારદોપદિષ્ટઃ
સમગાત્ કર્દમમાગતિપ્રતીક્ષમ્ ॥5॥
મનુનોપહૃતાં ચ દેવહૂતિં
તરુણીરત્નમવાપ્ય કર્દમોઽસૌ ।
ભવદર્ચનનિવૃતોઽપિ તસ્યાં
દૃઢશુશ્રૂષણયા દધૌ પ્રસાદમ્ ॥6॥
સ પુનસ્ત્વદુપાસનપ્રભાવા-
દ્દયિતાકામકૃતે કૃતે વિમાને ।
વનિતાકુલસંકુલો નવાત્મા
વ્યહરદ્દેવપથેષુ દેવહૂત્યા ॥7॥
શતવર્ષમથ વ્યતીત્ય સોઽયં
નવ કન્યાઃ સમવાપ્ય ધન્યરૂપાઃ ।
વનયાનસમુદ્યતોઽપિ કાંતા-
હિતકૃત્ત્વજ્જનનોત્સુકો ન્યવાત્સીત્ ॥8॥
નિજભર્તૃગિરા ભવન્નિષેવા-
નિરતાયામથ દેવ દેવહૂત્યામ્ ।
કપિલસ્ત્વમજાયથા જનાનાં
પ્રથયિષ્યન્ પરમાત્મતત્ત્વવિદ્યામ્ ॥9॥
વનમેયુષિ કર્દમે પ્રસન્ને
મતસર્વસ્વમુપાદિશન્ જનન્યૈ ।
કપિલાત્મક વાયુમંદિરેશ
ત્વરિતં ત્વં પરિપાહિ માં ગદૌઘાત્ ॥10॥