සමනුස්මෘතතාවකාංඝ්රියුග්මඃ
ස මනුඃ පංකජසංභවාංගජන්මා ।
නිජමංතරමංතරායහීනං
චරිතං තේ කථයන් සුඛං නිනාය ॥1॥
සමයේ ඛලු තත්ර කර්දමාඛ්යෝ
ද්රුහිණච්ඡායභවස්තදීයවාචා ।
ධෘතසර්ගරසෝ නිසර්ගරම්යං
භගවංස්ත්වාමයුතං සමාඃ සිෂේවේ ॥2॥
ගරුඩෝපරි කාලමේඝක්රමං
විලසත්කේලිසරෝජපාණිපද්මම් ।
හසිතෝල්ලසිතානනං විභෝ ත්වං
වපුරාවිෂ්කුරුෂේ ස්ම කර්දමාය ॥3॥
ස්තුවතේ පුලකාවෘතාය තස්මෛ
මනුපුත්රීං දයිතාං නවාපි පුත්රීඃ ।
කපිලං ච සුතං ස්වමේව පශ්චාත්
ස්වගතිං චාප්යනුගෘහ්ය නිර්ගතෝऽභූඃ ॥4॥
ස මනුඃ ශතරූපයා මහිෂ්යා
ගුණවත්යා සුතයා ච දේවහූත්යා ।
භවදීරිතනාරදෝපදිෂ්ටඃ
සමගාත් කර්දමමාගතිප්රතීක්ෂම් ॥5॥
මනුනෝපහෘතාං ච දේවහූතිං
තරුණීරත්නමවාප්ය කර්දමෝऽසෞ ।
භවදර්චනනිවෘතෝऽපි තස්යාං
දෘඪශුශ්රූෂණයා දධෞ ප්රසාදම් ॥6॥
ස පුනස්ත්වදුපාසනප්රභාවා-
ද්දයිතාකාමකෘතේ කෘතේ විමානේ ।
වනිතාකුලසංකුලෝ නවාත්මා
ව්යහරද්දේවපථේෂු දේවහූත්යා ॥7॥
ශතවර්ෂමථ ව්යතීත්ය සෝऽයං
නව කන්යාඃ සමවාප්ය ධන්යරූපාඃ ।
වනයානසමුද්යතෝऽපි කාංතා-
හිතකෘත්ත්වජ්ජනනෝත්සුකෝ න්යවාත්සීත් ॥8॥
නිජභර්තෘගිරා භවන්නිෂේවා-
නිරතායාමථ දේව දේවහූත්යාම් ।
කපිලස්ත්වමජායථා ජනානාං
ප්රථයිෂ්යන් පරමාත්මතත්ත්වවිද්යාම් ॥9॥
වනමේයුෂි කර්දමේ ප්රසන්නේ
මතසර්වස්වමුපාදිශන් ජනන්යෛ ।
කපිලාත්මක වායුමංදිරේශ
ත්වරිතං ත්වං පරිපාහි මාං ගදෞඝාත් ॥10॥