දක්ෂෝ විරිංචතනයෝऽථ මනෝස්තනූජාං
ලබ්ධ්වා ප්රසූතිමිහ ෂෝඩශ චාප කන්යාඃ ।
ධර්මේ ත්රයෝදශ දදෞ පිතෘෂු ස්වධාං ච
ස්වාහාං හවිර්භුජි සතීං ගිරිශේ ත්වදංශේ ॥1॥
මූර්තිර්හි ධර්මගෘහිණී සුෂුවේ භවංතං
නාරායණං නරසඛං මහිතානුභාවම් ।
යජ්ජන්මනි ප්රමුදිතාඃ කෘතතූර්යඝෝෂාඃ
පුෂ්පෝත්කරාන් ප්රවවෘෂුර්නුනුවුඃ සුරෞඝාඃ ॥2॥
දෛත්යං සහස්රකවචං කවචෛඃ පරීතං
සාහස්රවත්සරතපස්සමරාභිලව්යෛඃ ।
පර්යායනිර්මිතතපස්සමරෞ භවංතෞ
ශිෂ්ටෛකකංකටමමුං න්යහතාං සලීලම් ॥3॥
අන්වාචරන්නුපදිශන්නපි මෝක්ෂධර්මං
ත්වං භ්රාතෘමාන් බදරිකාශ්රමමධ්යවාත්සීඃ ।
ශක්රෝऽථ තේ ශමතපෝබලනිස්සහාත්මා
දිව්යාංගනාපරිවෘතං ප්රජිඝාය මාරම් ॥4॥
කාමෝ වසංතමලයානිලබංධුශාලී
කාංතාකටාක්ෂවිශිඛෛර්විකසද්විලාසෛඃ ।
විධ්යන්මුහුර්මුහුරකංපමුදීක්ෂ්ය ච ත්වාං
භීරුස්ත්වයාऽථ ජගදේ මෘදුහාසභාජා ॥5॥
භීත්යාऽලමංගජ වසංත සුරාංගනා වෝ
මන්මානසං ත්විහ ජුෂධ්වමිති බ්රුවාණඃ ।
ත්වං විස්මයේන පරිතඃ ස්තුවතාමථෛෂාං
ප්රාදර්ශයඃ ස්වපරිචාරකකාතරාක්ෂීඃ ॥6॥
සම්මෝහනාය මිලිතා මදනාදයස්තේ
ත්වද්දාසිකාපරිමලෛඃ කිල මෝහමාපුඃ ।
දත්තාං ත්වයා ච ජගෘහුස්ත්රපයෛව සර්ව-
ස්වර්වාසිගර්වශමනීං පුනරුර්වශීං තාම් ॥7॥
දෘෂ්ට්වෝර්වශීං තව කථාං ච නිශම්ය ශක්රඃ
පර්යාකුලෝऽජනි භවන්මහිමාවමර්ශාත් ।
ඒවං ප්රශාංතරමණීයතරාවතාරා-
ත්ත්වත්තෝऽධිකෝ වරද කෘෂ්ණතනුස්ත්වමේව ॥8॥
දක්ෂස්තු ධාතුරතිලාලනයා රජෝऽංධෝ
නාත්යාදෘතස්ත්වයි ච කෂ්ටමශාංතිරාසීත් ।
යේන ව්යරුංධ ස භවත්තනුමේව ශර්වං
යජ්ඤේ ච වෛරපිශුනේ ස්වසුතාං ව්යමානීත් ॥9॥
ක්රුද්ධේශමර්දිතමඛඃ ස තු කෘත්තශීර්ෂෝ
දේවප්රසාදිතහරාදථ ලබ්ධජීවඃ ।
ත්වත්පූරිතක්රතුවරඃ පුනරාප ශාංතිං
ස ත්වං ප්රශාංතිකර පාහි මරුත්පුරේශ ॥10॥