ଜାତସ୍ୟ ଧ୍ରୁଵକୁଲ ଏଵ ତୁଂଗକୀର୍ତେ-
ରଂଗସ୍ୟ ଵ୍ୟଜନି ସୁତଃ ସ ଵେନନାମା ।
ୟଦ୍ଦୋଷଵ୍ୟଥିତମତିଃ ସ ରାଜଵର୍ୟ-
ସ୍ତ୍ଵତ୍ପାଦେ ନିହିତମନା ଵନଂ ଗତୋଽଭୂତ୍ ॥1॥
ପାପୋଽପି କ୍ଷିତିତଲପାଲନାୟ ଵେନଃ
ପୌରାଦ୍ୟୈରୁପନିହିତଃ କଠୋରଵୀର୍ୟଃ ।
ସର୍ଵେଭ୍ୟୋ ନିଜବଲମେଵ ସଂପ୍ରଶଂସନ୍
ଭୂଚକ୍ରେ ତଵ ୟଜନାନ୍ୟୟଂ ନ୍ୟରୌତ୍ସୀତ୍ ॥2॥
ସଂପ୍ରାପ୍ତେ ହିତକଥନାୟ ତାପସୌଘେ
ମତ୍ତୋଽନ୍ୟୋ ଭୁଵନପତିର୍ନ କଶ୍ଚନେତି ।
ତ୍ଵନ୍ନିଂଦାଵଚନପରୋ ମୁନୀଶ୍ଵରୈସ୍ତୈଃ
ଶାପାଗ୍ନୌ ଶଲଭଦଶାମନାୟି ଵେନଃ ॥3॥
ତନ୍ନାଶାତ୍ ଖଲଜନଭୀରୁକୈର୍ମୁନୀଂଦ୍ରୈ-
ସ୍ତନ୍ମାତ୍ରା ଚିରପରିରକ୍ଷିତେ ତଦଂଗେ ।
ତ୍ୟକ୍ତାଘେ ପରିମଥିତାଦଥୋରୁଦଂଡା-
ଦ୍ଦୋର୍ଦଂଡେ ପରିମଥିତେ ତ୍ଵମାଵିରାସୀଃ ॥4॥
ଵିଖ୍ୟାତଃ ପୃଥୁରିତି ତାପସୋପଦିଷ୍ଟୈଃ
ସୂତାଦ୍ୟୈଃ ପରିଣୁତଭାଵିଭୂରିଵୀର୍ୟଃ ।
ଵେନାର୍ତ୍ୟା କବଲିତସଂପଦଂ ଧରିତ୍ରୀ-
ମାକ୍ରାଂତାଂ ନିଜଧନୁଷା ସମାମକାର୍ଷୀଃ ॥5॥
ଭୂୟସ୍ତାଂ ନିଜକୁଲମୁଖ୍ୟଵତ୍ସୟୁକ୍ତ୍ୟୈ-
ର୍ଦେଵାଦ୍ୟୈଃ ସମୁଚିତଚାରୁଭାଜନେଷୁ ।
ଅନ୍ନାଦୀନ୍ୟଭିଲଷିତାନି ୟାନି ତାନି
ସ୍ଵଚ୍ଛଂଦଂ ସୁରଭିତନୂମଦୂଦୁହସ୍ତ୍ଵମ୍ ॥6॥
ଆତ୍ମାନଂ ୟଜତି ମଖୈସ୍ତ୍ଵୟି ତ୍ରିଧାମ-
ନ୍ନାରବ୍ଧେ ଶତତମଵାଜିମେଧୟାଗେ ।
ସ୍ପର୍ଧାଲୁଃ ଶତମଖ ଏତ୍ୟ ନୀଚଵେଷୋ
ହୃତ୍ଵାଽଶ୍ଵଂ ତଵ ତନୟାତ୍ ପରାଜିତୋଽଭୂତ୍ ॥7॥
ଦେଵେଂଦ୍ରଂ ମୁହୁରିତି ଵାଜିନଂ ହରଂତଂ
ଵହ୍ନୌ ତଂ ମୁନିଵରମଂଡଲେ ଜୁହୂଷୌ ।
ରୁଂଧାନେ କମଲଭଵେ କ୍ରତୋଃ ସମାପ୍ତୌ
ସାକ୍ଷାତ୍ତ୍ଵଂ ମଧୁରିପୁମୈକ୍ଷଥାଃ ସ୍ଵୟଂ ସ୍ଵମ୍ ॥8॥
ତଦ୍ଦତ୍ତଂ ଵରମୁପଲଭ୍ୟ ଭକ୍ତିମେକାଂ
ଗଂଗାଂତେ ଵିହିତପଦଃ କଦାପି ଦେଵ ।
ସତ୍ରସ୍ଥଂ ମୁନିନିଵହଂ ହିତାନି ଶଂସ-
ନ୍ନୈକ୍ଷିଷ୍ଠାଃ ସନକମୁଖାନ୍ ମୁନୀନ୍ ପୁରସ୍ତାତ୍ ॥9॥
ଵିଜ୍ଞାନଂ ସନକମୁଖୋଦିତଂ ଦଧାନଃ
ସ୍ଵାତ୍ମାନଂ ସ୍ଵୟମଗମୋ ଵନାଂତସେଵୀ ।
ତତ୍ତାଦୃକ୍ପୃଥୁଵପୁରୀଶ ସତ୍ଵରଂ ମେ
ରୋଗୌଘଂ ପ୍ରଶମୟ ଵାତଗେହଵାସିନ୍ ॥10॥