জাতস্য ধ্রুবকুল এব তুংগকীর্তে-
রংগস্য ব্যজনি সুতঃ স বেননামা ।
যদ্দোষব্যথিতমতিঃ স রাজবর্য-
স্ত্বত্পাদে নিহিতমনা বনং গতোঽভূত্ ॥1॥
পাপোঽপি ক্ষিতিতলপালনায বেনঃ
পৌরাদ্যৈরুপনিহিতঃ কঠোরবীর্যঃ ।
সর্বেভ্যো নিজবলমেব সংপ্রশংসন্
ভূচক্রে তব যজনান্যযং ন্যরৌত্সীত্ ॥2॥
সংপ্রাপ্তে হিতকথনায তাপসৌঘে
মত্তোঽন্যো ভুবনপতির্ন কশ্চনেতি ।
ত্বন্নিংদাবচনপরো মুনীশ্বরৈস্তৈঃ
শাপাগ্নৌ শলভদশামনাযি বেনঃ ॥3॥
তন্নাশাত্ খলজনভীরুকৈর্মুনীংদ্রৈ-
স্তন্মাত্রা চিরপরিরক্ষিতে তদংগে ।
ত্যক্তাঘে পরিমথিতাদথোরুদংডা-
দ্দোর্দংডে পরিমথিতে ত্বমাবিরাসীঃ ॥4॥
বিখ্যাতঃ পৃথুরিতি তাপসোপদিষ্টৈঃ
সূতাদ্যৈঃ পরিণুতভাবিভূরিবীর্যঃ ।
বেনার্ত্যা কবলিতসংপদং ধরিত্রী-
মাক্রাংতাং নিজধনুষা সমামকার্ষীঃ ॥5॥
ভূযস্তাং নিজকুলমুখ্যবত্সযুক্ত্যৈ-
র্দেবাদ্যৈঃ সমুচিতচারুভাজনেষু ।
অন্নাদীন্যভিলষিতানি যানি তানি
স্বচ্ছংদং সুরভিতনূমদূদুহস্ত্বম্ ॥6॥
আত্মানং যজতি মখৈস্ত্বযি ত্রিধাম-
ন্নারব্ধে শততমবাজিমেধযাগে ।
স্পর্ধালুঃ শতমখ এত্য নীচবেষো
হৃত্বাঽশ্বং তব তনযাত্ পরাজিতোঽভূত্ ॥7॥
দেবেংদ্রং মুহুরিতি বাজিনং হরংতং
বহ্নৌ তং মুনিবরমংডলে জুহূষৌ ।
রুংধানে কমলভবে ক্রতোঃ সমাপ্তৌ
সাক্ষাত্ত্বং মধুরিপুমৈক্ষথাঃ স্বযং স্বম্ ॥8॥
তদ্দত্তং বরমুপলভ্য ভক্তিমেকাং
গংগাংতে বিহিতপদঃ কদাপি দেব ।
সত্রস্থং মুনিনিবহং হিতানি শংস-
ন্নৈক্ষিষ্ঠাঃ সনকমুখান্ মুনীন্ পুরস্তাত্ ॥9॥
বিজ্ঞানং সনকমুখোদিতং দধানঃ
স্বাত্মানং স্বযমগমো বনাংতসেবী ।
তত্তাদৃক্পৃথুবপুরীশ সত্বরং মে
রোগৌঘং প্রশময বাতগেহবাসিন্ ॥10॥