darvāsāssuravanitāptadivyamālyaṃ
śakrāya svayamupadāya tatra bhūyaḥ ।
nāgēndrapratimṛditē śaśāpa śakraṃ
kā kṣāntistvaditaradēvatāṃśajānām ॥1॥
śāpēna prathitajarē’tha nirjarēndrē
dēvēṣvapyasurajitēṣu niṣprabhēṣu ।
śarvādyāḥ kamalajamētya sarvadēvā
nirvāṇaprabhava samaṃ bhavantamāpuḥ ॥2॥
brahmādyaiḥ stutamahimā chiraṃ tadānīṃ
prāduṣṣan varada puraḥ parēṇa dhāmnā ।
hē dēvā ditijakulairvidhāya sandhiṃ
pīyūṣaṃ parimathatēti paryaśāstvam ॥3॥
sandhānaṃ kṛtavati dānavaiḥ suraughē
manthānaṃ nayati madēna mandarādrim ।
bhraṣṭē’smin badaramivōdvahan khagēndrē
sadyastvaṃ vinihitavān payaḥpayōdhau ॥4॥
ādhāya drutamatha vāsukiṃ varatrāṃ
pāthōdhau vinihitasarvabījajālē ।
prārabdhē mathanavidhau surāsuraistai-
rvyājāttvaṃ bhujagamukhē’karōssurārīn ॥5॥
kṣubdhādrau kṣubhitajalōdarē tadānīṃ
dugdhābdhau gurutarabhāratō nimagnē ।
dēvēṣu vyathitatamēṣu tatpriyaiṣī
prāṇaiṣīḥ kamaṭhatanuṃ kaṭhōrapṛṣṭhām ॥6॥
vajrātisthiratarakarparēṇa viṣṇō
vistārātparigatalakṣayōjanēna ।
ambhōdhēḥ kuharagatēna varṣmaṇā tvaṃ
nirmagnaṃ kṣitidharanāthamunninētha ॥7॥
unmagnē jhaṭiti tadā dharādharēndrē
nirmēthurdṛḍhamiha sammadēna sarvē ।
āviśya dvitayagaṇē’pi sarparājē
vaivaśyaṃ pariśamayannavīvṛdhastān ॥8॥
uddāmabhramaṇajavōnnamadgirīndra-
nyastaikasthiratarahastapaṅkajaṃ tvām ।
abhrāntē vidhigiriśādayaḥ pramōdā-
dudbhrāntā nunuvurupāttapuṣpavarṣāḥ ॥9॥
daityaughē bhujagamukhānilēna taptē
tēnaiva tridaśakulē’pi kiñchidārtē ।
kāruṇyāttava kila dēva vārivāhāḥ
prāvarṣannamaragaṇānna daityasaṅghān ॥10॥
udbhrāmyadbahutiminakrachakravālē
tatrābdhau chiramathitē’pi nirvikārē ।
ēkastvaṃ karayugakṛṣṭasarparājaḥ
saṃrājan pavanapurēśa pāhi rōgāt ॥11॥