ගීර්වාණෛරර්ථ්යමානෝ දශමුඛනිධනං කෝසලේෂ්වෘශ්යශෘංගේ
පුත්රීයාමිෂ්ටිමිෂ්ට්වා දදුෂි දශරථක්ෂ්මාභෘතේ පායසාග්ර්යම් ।
තද්භුක්ත්යා තත්පුරංධ්රීෂ්වපි තිසෘෂු සමං ජාතගර්භාසු ජාතෝ
රාමස්ත්වං ලක්ෂ්මණේන ස්වයමථ භරතේනාපි ශත්රුඝ්නනාම්නා ॥1॥
කෝදංඩී කෞශිකස්ය ක්රතුවරමවිතුං ලක්ෂ්මණේනානුයාතෝ
යාතෝऽභූස්තාතවාචා මුනිකථිතමනුද්වංද්වශාංතාධ්වඛේදඃ ।
නෘණාං ත්රාණාය බාණෛර්මුනිවචනබලාත්තාටකාං පාටයිත්වා
ලබ්ධ්වාස්මාදස්ත්රජාලං මුනිවනමගමෝ දේව සිද්ධාශ්රමාඛ්යම් ॥2॥
මාරීචං ද්රාවයිත්වා මඛශිරසි ශරෛරන්යරක්ෂාංසි නිඝ්නන්
කල්යාං කුර්වන්නහල්යාං පථි පදරජසා ප්රාප්ය වෛදේහගේහම් ।
භිංදානශ්චාංද්රචූඩං ධනුරවනිසුතාමිංදිරාමේව ලබ්ධ්වා
රාජ්යං ප්රාතිෂ්ඨථාස්ත්වං ත්රිභිරපි ච සමං භ්රාතෘවීරෛස්සදාරෛඃ ॥3॥
ආරුංධානේ රුෂාංධේ භෘගුකුල තිලකේ සංක්රමය්ය ස්වතේජෝ
යාතේ යාතෝऽස්යයෝධ්යාං සුඛමිහ නිවසන් කාංතයා කාංතමූර්තේ ।
ශත්රුඝ්නේනෛකදාථෝ ගතවති භරතේ මාතුලස්යාධිවාසං
තාතාරබ්ධෝऽභිෂේකස්තව කිල විහතඃ කේකයාධීශපුත්ර්යා ॥4॥
තාතෝක්ත්යා යාතුකාමෝ වනමනුජවධූසංයුතශ්චාපධාරඃ
පෞරානාරුධ්ය මාර්ගේ ගුහනිලයගතස්ත්වං ජටාචීරධාරී।
නාවා සංතීර්ය ගංගාමධිපදවි පුනස්තං භරද්වාජමාරා-
න්නත්වා තද්වාක්යහේතෝරතිසුඛමවසශ්චිත්රකූටේ ගිරීංද්රේ ॥5॥
ශ්රුත්වා පුත්රාර්තිඛින්නං ඛලු භරතමුඛාත් ස්වර්ගයාතං ස්වතාතං
තප්තෝ දත්වාऽංබු තස්මෛ නිදධිථ භරතේ පාදුකාං මේදිනීං ච
අත්රිං නත්වාऽථ ගත්වා වනමතිවිපුලං දංඩකං චංඩකායං
හත්වා දෛත්යං විරාධං සුගතිමකලයශ්චාරු භෝඃ ශාරභංගීම් ॥6॥
නත්වාऽගස්ත්යං සමස්තාශරනිකරසපත්රාකෘතිං තාපසේභ්යඃ
ප්රත්යශ්රෞෂීඃ ප්රියෛෂී තදනු ච මුනිනා වෛෂ්ණවේ දිව්යචාපේ ।
බ්රහ්මාස්ත්රේ චාපි දත්තේ පථි පිතෘසුහෘදං වීක්ෂ්ය භූයෝ ජටායුං
මෝදාත් ගෝදාතටාංතේ පරිරමසි පුරා පංචවට්යාං වධූට්යා ॥7॥
ප්රාප්තායාඃ ශූර්පණඛ්යා මදනචලධෘතේරර්ථනෛර්නිස්සහාත්මා
තාං සෞමිත්රෞ විසෘජ්ය ප්රබලතමරුෂා තේන නිර්ලූනනාසාම් ।
දෘෂ්ට්වෛනාං රුෂ්ටචිත්තං ඛරමභිපතිතං දූෂණං ච ත්රිමූර්ධං
ව්යාහිංසීරාශරානප්යයුතසමධිකාංස්තත්ක්ෂණාදක්ෂතෝෂ්මා ॥8॥
සෝදර්යාප්රෝක්තවාර්තාවිවශදශමුඛාදිෂ්ටමාරීචමායා-
සාරංග සාරසාක්ෂ්යා ස්පෘහිතමනුගතඃ ප්රාවධීර්බාණඝාතම් ।
තන්මායාක්රංදනිර්යාපිතභවදනුජාං රාවණස්තාමහාර්ෂී-
ත්තේනාර්තෝऽපි ත්වමංතඃ කිමපි මුදමධාස්තද්වධෝපායලාභාත් ॥9॥
භූයස්තන්වීං විචින්වන්නහෘත දශමුඛස්ත්වද්වධූං මද්වධේනේ-
ත්යුක්ත්වා යාතේ ජටායෞ දිවමථ සුහෘදඃ ප්රාතනෝඃ ප්රේතකාර්යම් ।
ගෘහ්ණානං තං කබංධං ජඝනිථ ශබරීං ප්රේක්ෂ්ය පංපාතටේ ත්වං
සංප්රාප්තෝ වාතසූනුං භෘශමුදිතමනාඃ පාහි වාතාලයේශ ॥10॥