ගූඪං වසුදේවගිරා කර්තුං තේ නිෂ්ක්රියස්ය සංස්කාරාන් ।
හෘද්ගතහෝරාතත්ත්වෝ ගර්ගමුනිස්ත්වත් ගෘහං විභෝ ගතවාන් ॥1॥
නංදෝऽථ නංදිතාත්මා වෘංදිෂ්ටං මානයන්නමුං යමිනාම් ।
මංදස්මිතාර්ද්රමූචේ ත්වත්සංස්කාරාන් විධාතුමුත්සුකධීඃ ॥2॥
යදුවංශාචාර්යත්වාත් සුනිභෘතමිදමාර්ය කාර්යමිති කථයන් ।
ගර්ගෝ නිර්ගතපුලකශ්චක්රේ තව සාග්රජස්ය නාමානි ॥3॥
කථමස්ය නාම කුර්වේ සහස්රනාම්නෝ හ්යනංතනාම්නෝ වා ।
ඉති නූනං ගර්ගමුනිශ්චක්රේ තව නාම නාම රහසි විභෝ ॥4॥
කෘෂිධාතුණකාරාභ්යාං සත්තානංදාත්මතාං කිලාභිලපත් ।
ජගදඝකර්ෂිත්වං වා කථයදෘෂිඃ කෘෂ්ණනාම තේ ව්යතනෝත් ॥5॥
අන්යාංශ්ච නාමභේදාන් ව්යාකුර්වන්නග්රජේ ච රාමාදීන් ।
අතිමානුෂානුභාවං න්යගදත්ත්වාමප්රකාශයන් පිත්රේ ॥6॥
ස්නිහ්යති යස්තව පුත්රේ මුහ්යති ස න මායිකෛඃ පුනඃ ශෝකෛඃ ।
ද්රුහ්යති යඃ ස තු නශ්යේදිත්යවදත්තේ මහත්ත්වමෘෂිවර්යඃ ॥7॥
ජේෂ්යති බහුතරදෛත්යාන් නේෂ්යති නිජබංධුලෝකමමලපදම් ।
ශ්රෝෂ්යසි සුවිමලකීර්තීරස්යේති භවද්විභූතිමෘෂිරූචේ ॥8॥
අමුනෛව සර්වදුර්ගං තරිතාස්ථ කෘතාස්ථමත්ර තිෂ්ඨධ්වම් ।
හරිරේවේත්යනභිලපන්නිත්යාදි ත්වාමවර්ණයත් ස මුනිඃ ॥9॥
ගර්ගේऽථ නිර්ගතේऽස්මින් නංදිතනංදාදිනංද්යමානස්ත්වම් ।
මද්ගදමුද්ගතකරුණෝ නිර්ගමය ශ්රීමරුත්පුරාධීශ ॥10॥