অযি দেব পুরা কিল ত্বযি স্বযমুত্তানশযে স্তনংধযে ।
পরিজৃংভণতো ব্যপাবৃতে বদনে বিশ্বমচষ্ট বল্লবী ॥1॥
পুনরপ্যথ বালকৈঃ সমং ত্বযি লীলানিরতে জগত্পতে ।
ফলসংচযবংচনক্রুধা তব মৃদ্ভোজনমূচুরর্ভকাঃ ॥2॥
অযি তে প্রলযাবধৌ বিভো ক্ষিতিতোযাদিসমস্তভক্ষিণঃ ।
মৃদুপাশনতো রুজা ভবেদিতি ভীতা জননী চুকোপ সা ॥3॥
অযি দুর্বিনযাত্মক ত্বযা কিমু মৃত্সা বত বত্স ভক্ষিতা ।
ইতি মাতৃগিরং চিরং বিভো বিতথাং ত্বং প্রতিজজ্ঞিষে হসন্ ॥4॥
অযি তে সকলৈর্বিনিশ্চিতে বিমতিশ্চেদ্বদনং বিদার্যতাম্ ।
ইতি মাতৃবিভর্ত্সিতো মুখং বিকসত্পদ্মনিভং ব্যদারযঃ ॥5॥
অপি মৃল্লবদর্শনোত্সুকাং জননীং তাং বহু তর্পযন্নিব ।
পৃথিবীং নিখিলাং ন কেবলং ভুবনান্যপ্যখিলান্যদীদৃশঃ ॥6॥
কুহচিদ্বনমংবুধিঃ ক্বচিত্ ক্বচিদভ্রং কুহচিদ্রসাতলম্ ।
মনুজা দনুজাঃ ক্বচিত্ সুরা দদৃশে কিং ন তদা ত্বদাননে ॥7॥
কলশাংবুধিশাযিনং পুনঃ পরবৈকুংঠপদাধিবাসিনম্ ।
স্বপুরশ্চ নিজার্ভকাত্মকং কতিধা ত্বাং ন দদর্শ সা মুখে ॥8॥
বিকসদ্ভুবনে মুখোদরে ননু ভূযোঽপি তথাবিধাননঃ ।
অনযা স্ফুটমীক্ষিতো ভবাননবস্থাং জগতাং বতাতনোত্ ॥9॥
ধৃততত্ত্বধিযং তদা ক্ষণং জননীং তাং প্রণযেন মোহযন্ ।
স্তনমংব দিশেত্যুপাসজন্ ভগবন্নদ্ভুতবাল পাহি মাম্ ॥10॥