ಏಕದಾ ದಧಿವಿಮಾಥಕಾರಿಣೀಂ ಮಾತರಂ ಸಮುಪಸೇದಿವಾನ್ ಭವಾನ್ ।
ಸ್ತನ್ಯಲೋಲುಪತಯಾ ನಿವಾರಯನ್ನಂಕಮೇತ್ಯ ಪಪಿವಾನ್ ಪಯೋಧರೌ ॥1॥
ಅರ್ಧಪೀತಕುಚಕುಡ್ಮಲೇ ತ್ವಯಿ ಸ್ನಿಗ್ಧಹಾಸಮಧುರಾನನಾಂಬುಜೇ ।
ದುಗ್ಧಮೀಶ ದಹನೇ ಪರಿಸ್ರುತಂ ಧರ್ತುಮಾಶು ಜನನೀ ಜಗಾಮ ತೇ ॥2॥
ಸಾಮಿಪೀತರಸಭಂಗಸಂಗತಕ್ರೋಧಭಾರಪರಿಭೂತಚೇತಸಾ।
ಮಂಥದಂಡಮುಪಗೃಹ್ಯ ಪಾಟಿತಂ ಹಂತ ದೇವ ದಧಿಭಾಜನಂ ತ್ವಯಾ ॥3॥
ಉಚ್ಚಲದ್ಧ್ವನಿತಮುಚ್ಚಕೈಸ್ತದಾ ಸನ್ನಿಶಮ್ಯ ಜನನೀ ಸಮಾದ್ರುತಾ ।
ತ್ವದ್ಯಶೋವಿಸರವದ್ದದರ್ಶ ಸಾ ಸದ್ಯ ಏವ ದಧಿ ವಿಸ್ತೃತಂ ಕ್ಷಿತೌ ॥4॥
ವೇದಮಾರ್ಗಪರಿಮಾರ್ಗಿತಂ ರುಷಾ ತ್ವಮವೀಕ್ಷ್ಯ ಪರಿಮಾರ್ಗಯಂತ್ಯಸೌ ।
ಸಂದದರ್ಶ ಸುಕೃತಿನ್ಯುಲೂಖಲೇ ದೀಯಮಾನನವನೀತಮೋತವೇ ॥5॥
ತ್ವಾಂ ಪ್ರಗೃಹ್ಯ ಬತ ಭೀತಿಭಾವನಾಭಾಸುರಾನನಸರೋಜಮಾಶು ಸಾ ।
ರೋಷರೂಷಿತಮುಖೀ ಸಖೀಪುರೋ ಬಂಧನಾಯ ರಶನಾಮುಪಾದದೇ ॥6॥
ಬಂಧುಮಿಚ್ಛತಿ ಯಮೇವ ಸಜ್ಜನಸ್ತಂ ಭವಂತಮಯಿ ಬಂಧುಮಿಚ್ಛತೀ ।
ಸಾ ನಿಯುಜ್ಯ ರಶನಾಗುಣಾನ್ ಬಹೂನ್ ದ್ವ್ಯಂಗುಲೋನಮಖಿಲಂ ಕಿಲೈಕ್ಷತ ॥7॥
ವಿಸ್ಮಿತೋತ್ಸ್ಮಿತಸಖೀಜನೇಕ್ಷಿತಾಂ ಸ್ವಿನ್ನಸನ್ನವಪುಷಂ ನಿರೀಕ್ಷ್ಯ ತಾಮ್ ।
ನಿತ್ಯಮುಕ್ತವಪುರಪ್ಯಹೋ ಹರೇ ಬಂಧಮೇವ ಕೃಪಯಾಽನ್ವಮನ್ಯಥಾಃ ॥8॥
ಸ್ಥೀಯತಾಂ ಚಿರಮುಲೂಖಲೇ ಖಲೇತ್ಯಾಗತಾ ಭವನಮೇವ ಸಾ ಯದಾ।
ಪ್ರಾಗುಲೂಖಲಬಿಲಾಂತರೇ ತದಾ ಸರ್ಪಿರರ್ಪಿತಮದನ್ನವಾಸ್ಥಿಥಾಃ ॥9॥
ಯದ್ಯಪಾಶಸುಗಮೋ ವಿಭೋ ಭವಾನ್ ಸಂಯತಃ ಕಿಮು ಸಪಾಶಯಾಽನಯಾ ।
ಏವಮಾದಿ ದಿವಿಜೈರಭಿಷ್ಟುತೋ ವಾತನಾಥ ಪರಿಪಾಹಿ ಮಾಂ ಗದಾತ್ ॥10॥