একদা দধিবিমাথকারিণীং মাতরং সমুপসেদিবান্ ভবান্ ।
স্তন্যলোলুপতযা নিবারযন্নংকমেত্য পপিবান্ পযোধরৌ ॥1॥
অর্ধপীতকুচকুড্মলে ত্বযি স্নিগ্ধহাসমধুরাননাংবুজে ।
দুগ্ধমীশ দহনে পরিস্রুতং ধর্তুমাশু জননী জগাম তে ॥2॥
সামিপীতরসভংগসংগতক্রোধভারপরিভূতচেতসা।
মংথদংডমুপগৃহ্য পাটিতং হংত দেব দধিভাজনং ত্বযা ॥3॥
উচ্চলদ্ধ্বনিতমুচ্চকৈস্তদা সন্নিশম্য জননী সমাদ্রুতা ।
ত্বদ্যশোবিসরবদ্দদর্শ সা সদ্য এব দধি বিস্তৃতং ক্ষিতৌ ॥4॥
বেদমার্গপরিমার্গিতং রুষা ত্বমবীক্ষ্য পরিমার্গযংত্যসৌ ।
সংদদর্শ সুকৃতিন্যুলূখলে দীযমাননবনীতমোতবে ॥5॥
ত্বাং প্রগৃহ্য বত ভীতিভাবনাভাসুরাননসরোজমাশু সা ।
রোষরূষিতমুখী সখীপুরো বংধনায রশনামুপাদদে ॥6॥
বংধুমিচ্ছতি যমেব সজ্জনস্তং ভবংতমযি বংধুমিচ্ছতী ।
সা নিযুজ্য রশনাগুণান্ বহূন্ দ্ব্যংগুলোনমখিলং কিলৈক্ষত ॥7॥
বিস্মিতোত্স্মিতসখীজনেক্ষিতাং স্বিন্নসন্নবপুষং নিরীক্ষ্য তাম্ ।
নিত্যমুক্তবপুরপ্যহো হরে বংধমেব কৃপযাঽন্বমন্যথাঃ ॥8॥
স্থীযতাং চিরমুলূখলে খলেত্যাগতা ভবনমেব সা যদা।
প্রাগুলূখলবিলাংতরে তদা সর্পিরর্পিতমদন্নবাস্থিথাঃ ॥9॥
যদ্যপাশসুগমো বিভো ভবান্ সংযতঃ কিমু সপাশযাঽনযা ।
এবমাদি দিবিজৈরভিষ্টুতো বাতনাথ পরিপাহি মাং গদাত্ ॥10॥