મુદા સુરૌઘૈસ્ત્વમુદારસમ્મદૈ-
રુદીર્ય દામોદર ઇત્યભિષ્ટુતઃ ।
મૃદુદરઃ સ્વૈરમુલૂખલે લગ-
ન્નદૂરતો દ્વૌ કકુભાવુદૈક્ષથાઃ ॥1॥
કુબેરસૂનુર્નલકૂબરાભિધઃ
પરો મણિગ્રીવ ઇતિ પ્રથાં ગતઃ ।
મહેશસેવાધિગતશ્રિયોન્મદૌ
ચિરં કિલ ત્વદ્વિમુખાવખેલતામ્ ॥2॥
સુરાપગાયાં કિલ તૌ મદોત્કટૌ
સુરાપગાયદ્બહુયૌવતાવૃતૌ ।
વિવાસસૌ કેલિપરૌ સ નારદો
ભવત્પદૈકપ્રવણો નિરૈક્ષત ॥3॥
ભિયા પ્રિયાલોકમુપાત્તવાસસં
પુરો નિરીક્ષ્યાપિ મદાંધચેતસૌ ।
ઇમૌ ભવદ્ભક્ત્યુપશાંતિસિદ્ધયે
મુનિર્જગૌ શાંતિમૃતે કુતઃ સુખમ્ ॥4॥
યુવામવાપ્તૌ કકુભાત્મતાં ચિરં
હરિં નિરીક્ષ્યાથ પદં સ્વમાપ્નુતમ્ ।
ઇતીરેતૌ તૌ ભવદીક્ષણસ્પૃહાં
ગતૌ વ્રજાંતે કકુભૌ બભૂવતુઃ ॥5॥
અતંદ્રમિંદ્રદ્રુયુગં તથાવિધં
સમેયુષા મંથરગામિના ત્વયા ।
તિરાયિતોલૂખલરોધનિર્ધુતૌ
ચિરાય જીર્ણૌ પરિપાતિતૌ તરૂ ॥6॥
અભાજિ શાખિદ્વિતયં યદા ત્વયા
તદૈવ તદ્ગર્ભતલાન્નિરેયુષા ।
મહાત્વિષા યક્ષયુગેન તત્ક્ષણા-
દભાજિ ગોવિંદ ભવાનપિ સ્તવૈઃ ॥7॥
ઇહાન્યભક્તોઽપિ સમેષ્યતિ ક્રમાત્
ભવંતમેતૌ ખલુ રુદ્રસેવકૌ ।
મુનિપ્રસાદાદ્ભવ્દંઘ્રિમાગતૌ
ગતૌ વૃણાનૌ ખલુ ભક્તિમુત્તમામ્ ॥8॥
તતસ્તરૂદ્દારણદારુણારવ-
પ્રકંપિસંપાતિનિ ગોપમંડલે ।
વિલજ્જિતત્વજ્જનનીમુખેક્ષિણા
વ્યમોક્ષિ નંદેન ભવાન્ વિમોક્ષદઃ ॥9॥
મહીરુહોર્મધ્યગતો બતાર્ભકો
હરેઃ પ્રભાવાદપરિક્ષતોઽધુના ।
ઇતિ બ્રુવાણૈર્ગમિતો ગૃહં ભવાન્
મરુત્પુરાધીશ્વર પાહિ માં ગદાત્ ॥10॥