ભવત્પ્રભાવાવિદુરા હિ ગોપાસ્તરુપ્રપાતાદિકમત્ર ગોષ્ઠે ।
અહેતુમુત્પાતગણં વિશંક્ય પ્રયાતુમન્યત્ર મનો વિતેનુઃ ॥1॥
તત્રોપનંદાભિધગોપવર્યો જગૌ ભવત્પ્રેરણયૈવ નૂનમ્ ।
ઇતઃ પ્રતીચ્યાં વિપિનં મનોજ્ઞં વૃંદાવનં નામ વિરાજતીતિ ॥2॥
બૃહદ્વનં તત્ ખલુ નંદમુખ્યા વિધાય ગૌષ્ઠીનમથ ક્ષણેન ।
ત્વદન્વિતત્વજ્જનનીનિવિષ્ટગરિષ્ઠયાનાનુગતા વિચેલુઃ ॥3॥
અનોમનોજ્ઞધ્વનિધેનુપાલીખુરપ્રણાદાંતરતો વધૂભિઃ ।
ભવદ્વિનોદાલપિતાક્ષરાણિ પ્રપીય નાજ્ઞાયત માર્ગદૈર્ઘ્યમ્ ॥4॥
નિરીક્ષ્ય વૃંદાવનમીશ નંદત્પ્રસૂનકુંદપ્રમુખદ્રુમૌઘમ્ ।
અમોદથાઃ શાદ્વલસાંદ્રલક્ષ્મ્યા હરિન્મણીકુટ્ટિમપુષ્ટશોભમ્ ॥5॥
નવાકનિર્વ્યૂઢનિવાસભેદેષ્વશેષગોપેષુ સુખાસિતેષુ ।
વનશ્રિયં ગોપકિશોરપાલીવિમિશ્રિતઃ પર્યગલોકથાસ્ત્વમ્ ॥6॥
અરાલમાર્ગાગતનિર્મલાપાં મરાલકૂજાકૃતનર્મલાપામ્ ।
નિરંતરસ્મેરસરોજવક્ત્રાં કલિંદકન્યાં સમલોકયસ્ત્વમ્ ॥7॥
મયૂરકેકાશતલોભનીયં મયૂખમાલાશબલં મણીનામ્ ।
વિરિંચલોકસ્પૃશમુચ્ચશૃંગૈર્ગિરિં ચ ગોવર્ધનમૈક્ષથાસ્ત્વમ્ ॥8॥
સમં તતો ગોપકુમારકૈસ્ત્વં સમંતતો યત્ર વનાંતમાગાઃ ।
તતસ્તતસ્તાં કુટિલામપશ્યઃ કલિંદજાં રાગવતીમિવૈકામ્ ॥9॥
તથાવિધેઽસ્મિન્ વિપિને પશવ્યે સમુત્સુકો વત્સગણપ્રચારે ।
ચરન્ સરામોઽથ કુમારકૈસ્ત્વં સમીરગેહાધિપ પાહિ રોગાત્ ॥10॥