taralamadhukṛt vṛndē vṛndāvanē’tha manōharē
paśupaśiśubhiḥ sākaṃ vatsānupālanalōlupaḥ ।
haladharasakhō dēva śrīman vichēritha dhārayan
gavalamuralīvētraṃ nētrābhirāmatanudyutiḥ ॥1॥
vihitajagatīrakṣaṃ lakṣmīkarāmbujalālitaṃ
dadati charaṇadvandvaṃ vṛndāvanē tvayi pāvanē ।
kimiva na babhau sampatsampūritaṃ taruvallarī-
saliladharaṇīgōtrakṣētrādikaṃ kamalāpatē ॥2॥
vilasadulapē kāntārāntē samīraṇaśītalē
vipulayamunātīrē gōvardhanāchalamūrdhasu ।
lalitamuralīnādaḥ sañchārayan khalu vātsakaṃ
kvachana divasē daityaṃ vatsākṛtiṃ tvamudaikṣathāḥ ॥3॥
rabhasavilasatpuchChaṃ vichChāyatō’sya vilōkayan
kimapi valitaskandhaṃ randhrapratīkṣamudīkṣitam ।
tamatha charaṇē bibhradvibhrāmayan muhuruchchakaiḥ
kuhachana mahāvṛkṣē chikṣēpitha kṣatajīvitam ॥4॥
nipatati mahādaityē jātyā durātmani tatkṣaṇaṃ
nipatanajavakṣuṇṇakṣōṇīruhakṣatakānanē ।
divi parimilat vṛndā vṛndārakāḥ kusumōtkaraiḥ
śirasi bhavatō harṣādvarṣanti nāma tadā harē ॥5॥
surabhilatamā mūrdhanyūrdhvaṃ kutaḥ kusumāvalī
nipatati tavētyuktō bālaiḥ sahēlamudairayaḥ ।
jhaṭiti danujakṣēpēṇōrdhvaṃ gatastarumaṇḍalāt
kusumanikaraḥ sō’yaṃ nūnaṃ samēti śanairiti ॥6॥
kvachana divasē bhūyō bhūyastarē paruṣātapē
tapanatanayāpāthaḥ pātuṃ gatā bhavadādayaḥ ।
chalitagarutaṃ prēkṣāmāsurbakaṃ khalu vismrṛtaṃ
kṣitidharagaruchChēdē kailāsaśailamivāparam ॥7॥
pibati salilaṃ gōpavrātē bhavantamabhidrutaḥ
sa kila nigilannagniprakhyaṃ punardrutamudvaman ।
dalayitumagāttrōṭyāḥ kōṭyā tadā”śu bhavān vibhō
khalajanabhidāchuñchuśchañchū pragṛhya dadāra tam ॥8॥
sapadi sahajāṃ sandraṣṭuṃ vā mṛtāṃ khalu pūtanā-
manujamaghamapyagrē gatvā pratīkṣitumēva vā ।
śamananilayaṃ yātē tasmin bakē sumanōgaṇē
kirati sumanōvṛndaṃ vṛndāvanāt gṛhamaiyathāḥ ॥9॥
lalitamuralīnādaṃ dūrānniśamya vadhūjanai-
stvaritamupagamyārādārūḍhamōdamudīkṣitaḥ ।
janitajananīnandānandaḥ samīraṇamandira-
prathitavasatē śaurē dūrīkuruṣva mamāmayān ॥10॥