අන්යාවතාරනිකරේෂ්වනිරීක්ෂිතං තේ
භූමාතිරේකමභිවීක්ෂ්ය තදාඝමෝක්ෂේ ।
බ්රහ්මා පරීක්ෂිතුමනාඃ ස පරෝක්ෂභාවං
නින්යේऽථ වත්සකගණාන් ප්රවිතත්ය මායාම් ॥1॥
වත්සානවීක්ෂ්ය විවශේ පශුපෝත්කරේ තා-
නානේතුකාම ඉව ධාතෘමතානුවර්තී ।
ත්වං සාමිභුක්තකබලෝ ගතවාංස්තදානීං
භුක්තාංස්තිරෝऽධිත සරෝජභවඃ කුමාරාන් ॥2॥
වත්සායිතස්තදනු ගෝපගණායිතස්ත්වං
ශික්යාදිභාංඩමුරලීගවලාදිරූපඃ ।
ප්රාග්වද්විහෘත්ය විපිනේෂු චිරාය සායං
ත්වං මායයාऽථ බහුධා ව්රජමායයාථ ॥3॥
ත්වාමේව ශික්යගවලාදිමයං දධානෝ
භූයස්ත්වමේව පශුවත්සකබාලරූපඃ ।
ගෝරූපිණීභිරපි ගෝපවධූමයීභි-
රාසාදිතෝऽසි ජනනීභිරතිප්රහර්ෂාත් ॥4॥
ජීවං හි කංචිදභිමානවශාත්ස්වකීයං
මත්වා තනූජ ඉති රාගභරං වහංත්යඃ ।
ආත්මානමේව තු භවංතමවාප්ය සූනුං
ප්රීතිං යයුර්න කියතීං වනිතාශ්ච ගාවඃ ॥5॥
ඒවං ප්රතික්ෂණවිජෘංභිතහර්ෂභාර-
නිශ්ශේෂගෝපගණලාලිතභූරිමූර්තිම් ।
ත්වාමග්රජෝऽපි බුබුධේ කිල වත්සරාංතේ
බ්රහ්මාත්මනෝරපි මහාන් යුවයෝර්විශේෂඃ ॥6॥
වර්ෂාවධෞ නවපුරාතනවත්සපාලාන්
දෘෂ්ට්වා විවේකමසෘණේ ද්රුහිණේ විමූඪේ ।
ප්රාදීදෘශඃ ප්රතිනවාන් මකුටාංගදාදි
භූෂාංශ්චතුර්භුජයුජඃ සජලාංබුදාභාන් ॥7॥
ප්රත්යේකමේව කමලාපරිලාලිතාංගාන්
භෝගීංද්රභෝගශයනාන් නයනාභිරාමාන් ।
ලීලානිමීලිතදෘශඃ සනකාදියෝගි-
ව්යාසේවිතාන් කමලභූර්භවතෝ දදර්ශ ॥8॥
නාරායණාකෘතිමසංඛ්යතමාං නිරීක්ෂ්ය
සර්වත්ර සේවකමපි ස්වමවේක්ෂ්ය ධාතා ।
මායානිමග්නහෘදයෝ විමුමෝහ යාව-
දේකෝ බභූවිථ තදා කබලාර්ධපාණිඃ ॥9॥
නශ්යන්මදේ තදනු විශ්වපතිං මුහුස්ත්වාං
නත්වා ච නූතවති ධාතරි ධාම යාතේ ।
පෝතෛඃ සමං ප්රමුදිතෛඃ ප්රවිශන් නිකේතං
වාතාලයාධිප විභෝ පරිපාහි රෝගාත් ॥10॥