ଅତୀତ୍ୟ ବାଲ୍ୟଂ ଜଗତାଂ ପତେ ତ୍ଵମୁପେତ୍ୟ ପୌଗଂଡଵୟୋ ମନୋଜ୍ଞମ୍ ।
ଉପେକ୍ଷ୍ୟ ଵତ୍ସାଵନମୁତ୍ସଵେନ ପ୍ରାଵର୍ତଥା ଗୋଗଣପାଲନାୟାମ୍ ॥1॥
ଉପକ୍ରମସ୍ୟାନୁଗୁଣୈଵ ସେୟଂ ମରୁତ୍ପୁରାଧୀଶ ତଵ ପ୍ରଵୃତ୍ତିଃ ।
ଗୋତ୍ରାପରିତ୍ରାଣକୃତେଽଵତୀର୍ଣସ୍ତଦେଵ ଦେଵାଽଽରଭଥାସ୍ତଦା ୟତ୍ ॥2॥
କଦାପି ରାମେଣ ସମଂ ଵନାଂତେ ଵନଶ୍ରିୟଂ ଵୀକ୍ଷ୍ୟ ଚରନ୍ ସୁଖେନ ।
ଶ୍ରୀଦାମନାମ୍ନଃ ସ୍ଵସଖସ୍ୟ ଵାଚା ମୋଦାଦଗା ଧେନୁକକାନନଂ ତ୍ଵମ୍ ॥3॥
ଉତ୍ତାଲତାଲୀନିଵହେ ତ୍ଵଦୁକ୍ତ୍ୟା ବଲେନ ଧୂତେଽଥ ବଲେନ ଦୋର୍ଭ୍ୟାମ୍ ।
ମୃଦୁଃ ଖରଶ୍ଚାଭ୍ୟପତତ୍ପୁରସ୍ତାତ୍ ଫଲୋତ୍କରୋ ଧେନୁକଦାନଵୋଽପି ॥4॥
ସମୁଦ୍ୟତୋ ଧୈନୁକପାଲନେଽହଂ କଥଂ ଵଧଂ ଧୈନୁକମଦ୍ୟ କୁର୍ଵେ ।
ଇତୀଵ ମତ୍ଵା ଧ୍ରୁଵମଗ୍ରଜେନ ସୁରୌଘୟୋଦ୍ଧାରମଜୀଘନସ୍ତ୍ଵମ୍ ॥5॥
ତଦୀୟଭୃତ୍ୟାନପି ଜଂବୁକତ୍ଵେନୋପାଗତାନଗ୍ରଜସଂୟୁତସ୍ତ୍ଵମ୍ ।
ଜଂବୂଫଲାନୀଵ ତଦା ନିରାସ୍ଥସ୍ତାଲେଷୁ ଖେଲନ୍ ଭଗଵନ୍ ନିରାସ୍ଥଃ ॥6॥
ଵିନିଘ୍ନତି ତ୍ଵୟ୍ୟଥ ଜଂବୁକୌଘଂ ସନାମକତ୍ଵାଦ୍ଵରୁଣସ୍ତଦାନୀମ୍ ।
ଭୟାକୁଲୋ ଜଂବୁକନାମଧେୟଂ ଶ୍ରୁତିପ୍ରସିଦ୍ଧଂ ଵ୍ୟଧିତେତି ମନ୍ୟେ ॥7॥
ତଵାଵତାରସ୍ୟ ଫଲଂ ମୁରାରେ ସଂଜାତମଦ୍ୟେତି ସୁରୈର୍ନୁତସ୍ତ୍ଵମ୍ ।
ସତ୍ୟଂ ଫଲଂ ଜାତମିହେତି ହାସୀ ବାଲୈଃ ସମଂ ତାଲଫଲାନ୍ୟଭୁଂକ୍ଥାଃ ॥8॥
ମଧୁଦ୍ରଵସ୍ରୁଂତି ବୃହଂତି ତାନି ଫଲାନି ମେଦୋଭରଭୃଂତି ଭୁକ୍ତ୍ଵା ।
ତୃପ୍ତୈଶ୍ଚ ଦୃପ୍ତୈର୍ଭଵନଂ ଫଲୌଘଂ ଵହଦ୍ଭିରାଗାଃ ଖଲୁ ବାଲକୈସ୍ତ୍ଵମ୍ ॥9॥
ହତୋ ହତୋ ଧେନୁକ ଇତ୍ୟୁପେତ୍ୟ ଫଲାନ୍ୟଦଦ୍ଭିର୍ମଧୁରାଣି ଲୋକୈଃ ।
ଜୟେତି ଜୀଵେତି ନୁତୋ ଵିଭୋ ତ୍ଵଂ ମରୁତ୍ପୁରାଧୀଶ୍ଵର ପାହି ରୋଗାତ୍ ॥10॥