ત્વત્સેવોત્કસ્સૌભરિર્નામ પૂર્વં
કાલિંદ્યંતર્દ્વાદશાબ્દં તપસ્યન્ ।
મીનવ્રાતે સ્નેહવાન્ ભોગલોલે
તાર્ક્ષ્યં સાક્ષાદૈક્ષતાગ્રે કદાચિત્ ॥1॥
ત્વદ્વાહં તં સક્ષુધં તૃક્ષસૂનું
મીનં કંચિજ્જક્ષતં લક્ષયન્ સઃ ।
તપ્તશ્ચિત્તે શપ્તવાનત્ર ચેત્ત્વં
જંતૂન્ ભોક્તા જીવિતં ચાપિ મોક્તા ॥2॥
તસ્મિન્ કાલે કાલિયઃ ક્ષ્વેલદર્પાત્
સર્પારાતેઃ કલ્પિતં ભાગમશ્નન્ ।
તેન ક્રોધાત્ત્વત્પદાંભોજભાજા
પક્ષક્ષિપ્તસ્તદ્દુરાપં પયોઽગાત્ ॥3॥
ઘોરે તસ્મિન્ સૂરજાનીરવાસે
તીરે વૃક્ષા વિક્ષતાઃ ક્ષ્વેલવેગાત્ ।
પક્ષિવ્રાતાઃ પેતુરભ્રે પતંતઃ
કારુણ્યાર્દ્રં ત્વન્મનસ્તેન જાતમ્ ॥4॥
કાલે તસ્મિન્નેકદા સીરપાણિં
મુક્ત્વા યાતે યામુનં કાનનાંતમ્ ।
ત્વય્યુદ્દામગ્રીષ્મભીષ્મોષ્મતપ્તા
ગોગોપાલા વ્યાપિબન્ ક્ષ્વેલતોયમ્ ॥5॥
નશ્યજ્જીવાન્ વિચ્યુતાન્ ક્ષ્માતલે તાન્
વિશ્વાન્ પશ્યન્નચ્યુત ત્વં દયાર્દ્રઃ ।
પ્રાપ્યોપાંતં જીવયામાસિથ દ્રાક્
પીયૂષાંભોવર્ષિભિઃ શ્રીકટક્ષૈઃ ॥6॥
કિં કિં જાતો હર્ષવર્ષાતિરેકઃ
સર્વાંગેષ્વિત્યુત્થિતા ગોપસંઘાઃ ।
દૃષ્ટ્વાઽગ્રે ત્વાં ત્વત્કૃતં તદ્વિદંત-
સ્ત્વામાલિંગન્ દૃષ્ટનાનાપ્રભાવાઃ ॥7॥
ગાવશ્ચૈવં લબ્ધજીવાઃ ક્ષણેન
સ્ફીતાનંદાસ્ત્વાં ચ દૃષ્ટ્વા પુરસ્તાત્ ।
દ્રાગાવવ્રુઃ સર્વતો હર્ષબાષ્પં
વ્યામુંચંત્યો મંદમુદ્યન્નિનાદાઃ ॥8॥
રોમાંચોઽયં સર્વતો નઃ શરીરે
ભૂયસ્યંતઃ કાચિદાનંદમૂર્છા ।
આશ્ચર્યોઽયં ક્ષ્વેલવેગો મુકુંદે-
ત્યુક્તો ગોપૈર્નંદિતો વંદિતોઽભૂઃ ॥9॥
એવં ભક્તાન્ મુક્તજીવાનપિ ત્વં
મુગ્ધાપાંગૈરસ્તરોગાંસ્તનોષિ ।
તાદૃગ્ભૂતસ્ફીતકારુણ્યભૂમા
રોગાત્ પાયા વાયુગેહાધિવાસ ॥10॥