ಅಥ ವಾರಿಣಿ ಘೋರತರಂ ಫಣಿನಂ
ಪ್ರತಿವಾರಯಿತುಂ ಕೃತಧೀರ್ಭಗವನ್ ।
ದ್ರುತಮಾರಿಥ ತೀರಗನೀಪತರುಂ
ವಿಷಮಾರುತಶೋಷಿತಪರ್ಣಚಯಮ್ ॥1॥
ಅಧಿರುಹ್ಯ ಪದಾಂಬುರುಹೇಣ ಚ ತಂ
ನವಪಲ್ಲವತುಲ್ಯಮನೋಜ್ಞರುಚಾ ।
ಹ್ರದವಾರಿಣಿ ದೂರತರಂ ನ್ಯಪತಃ
ಪರಿಘೂರ್ಣಿತಘೋರತರಂಗ್ಗಣೇ ॥2॥
ಭುವನತ್ರಯಭಾರಭೃತೋ ಭವತೋ
ಗುರುಭಾರವಿಕಂಪಿವಿಜೃಂಭಿಜಲಾ ।
ಪರಿಮಜ್ಜಯತಿ ಸ್ಮ ಧನುಶ್ಶತಕಂ
ತಟಿನೀ ಝಟಿತಿ ಸ್ಫುಟಘೋಷವತೀ ॥3॥
ಅಥ ದಿಕ್ಷು ವಿದಿಕ್ಷು ಪರಿಕ್ಷುಭಿತ-
ಭ್ರಮಿತೋದರವಾರಿನಿನಾದಭರೈಃ ।
ಉದಕಾದುದಗಾದುರಗಾಧಿಪತಿ-
ಸ್ತ್ವದುಪಾಂತಮಶಾಂತರುಷಾಽಂಧಮನಾಃ ॥4॥
ಫಣಶೃಂಗಸಹಸ್ರವಿನಿಸ್ಸೃಮರ-
ಜ್ವಲದಗ್ನಿಕಣೋಗ್ರವಿಷಾಂಬುಧರಮ್ ।
ಪುರತಃ ಫಣಿನಂ ಸಮಲೋಕಯಥಾ
ಬಹುಶೃಂಗಿಣಮಂಜನಶೈಲಮಿವ ॥5॥
ಜ್ವಲದಕ್ಷಿ ಪರಿಕ್ಷರದುಗ್ರವಿಷ-
ಶ್ವಸನೋಷ್ಮಭರಃ ಸ ಮಹಾಭುಜಗಃ ।
ಪರಿದಶ್ಯ ಭವಂತಮನಂತಬಲಂ
ಸಮವೇಷ್ಟಯದಸ್ಫುಟಚೇಷ್ಟಮಹೋ ॥6॥
ಅವಿಲೋಕ್ಯ ಭವಂತಮಥಾಕುಲಿತೇ
ತಟಗಾಮಿನಿ ಬಾಲಕಧೇನುಗಣೇ ।
ವ್ರಜಗೇಹತಲೇಽಪ್ಯನಿಮಿತ್ತಶತಂ
ಸಮುದೀಕ್ಷ್ಯ ಗತಾ ಯಮುನಾಂ ಪಶುಪಾಃ ॥7॥
ಅಖಿಲೇಷು ವಿಭೋ ಭವದೀಯ ದಶಾ-
ಮವಲೋಕ್ಯ ಜಿಹಾಸುಷು ಜೀವಭರಮ್ ।
ಫಣಿಬಂಧನಮಾಶು ವಿಮುಚ್ಯ ಜವಾ-
ದುದಗಮ್ಯತ ಹಾಸಜುಷಾ ಭವತಾ ॥8॥
ಅಧಿರುಹ್ಯ ತತಃ ಫಣಿರಾಜಫಣಾನ್
ನನೃತೇ ಭವತಾ ಮೃದುಪಾದರುಚಾ ।
ಕಲಶಿಂಜಿತನೂಪುರಮಂಜುಮಿಲ-
ತ್ಕರಕಂಕಣಸಂಕುಲಸಂಕ್ವಣಿತಮ್ ॥9॥
ಜಹೃಷುಃ ಪಶುಪಾಸ್ತುತುಷುರ್ಮುನಯೋ
ವವೃಷುಃ ಕುಸುಮಾನಿ ಸುರೇಂದ್ರಗಣಾಃ ।
ತ್ವಯಿ ನೃತ್ಯತಿ ಮಾರುತಗೇಹಪತೇ
ಪರಿಪಾಹಿ ಸ ಮಾಂ ತ್ವಮದಾಂತಗದಾತ್ ॥10॥