ଅଥ ଵାରିଣି ଘୋରତରଂ ଫଣିନଂ
ପ୍ରତିଵାରୟିତୁଂ କୃତଧୀର୍ଭଗଵନ୍ ।
ଦ୍ରୁତମାରିଥ ତୀରଗନୀପତରୁଂ
ଵିଷମାରୁତଶୋଷିତପର୍ଣଚୟମ୍ ॥1॥
ଅଧିରୁହ୍ୟ ପଦାଂବୁରୁହେଣ ଚ ତଂ
ନଵପଲ୍ଲଵତୁଲ୍ୟମନୋଜ୍ଞରୁଚା ।
ହ୍ରଦଵାରିଣି ଦୂରତରଂ ନ୍ୟପତଃ
ପରିଘୂର୍ଣିତଘୋରତରଂଗ୍ଗଣେ ॥2॥
ଭୁଵନତ୍ରୟଭାରଭୃତୋ ଭଵତୋ
ଗୁରୁଭାରଵିକଂପିଵିଜୃଂଭିଜଲା ।
ପରିମଜ୍ଜୟତି ସ୍ମ ଧନୁଶ୍ଶତକଂ
ତଟିନୀ ଝଟିତି ସ୍ଫୁଟଘୋଷଵତୀ ॥3॥
ଅଥ ଦିକ୍ଷୁ ଵିଦିକ୍ଷୁ ପରିକ୍ଷୁଭିତ-
ଭ୍ରମିତୋଦରଵାରିନିନାଦଭରୈଃ ।
ଉଦକାଦୁଦଗାଦୁରଗାଧିପତି-
ସ୍ତ୍ଵଦୁପାଂତମଶାଂତରୁଷାଽଂଧମନାଃ ॥4॥
ଫଣଶୃଂଗସହସ୍ରଵିନିସ୍ସୃମର-
ଜ୍ଵଲଦଗ୍ନିକଣୋଗ୍ରଵିଷାଂବୁଧରମ୍ ।
ପୁରତଃ ଫଣିନଂ ସମଲୋକୟଥା
ବହୁଶୃଂଗିଣମଂଜନଶୈଲମିଵ ॥5॥
ଜ୍ଵଲଦକ୍ଷି ପରିକ୍ଷରଦୁଗ୍ରଵିଷ-
ଶ୍ଵସନୋଷ୍ମଭରଃ ସ ମହାଭୁଜଗଃ ।
ପରିଦଶ୍ୟ ଭଵଂତମନଂତବଲଂ
ସମଵେଷ୍ଟୟଦସ୍ଫୁଟଚେଷ୍ଟମହୋ ॥6॥
ଅଵିଲୋକ୍ୟ ଭଵଂତମଥାକୁଲିତେ
ତଟଗାମିନି ବାଲକଧେନୁଗଣେ ।
ଵ୍ରଜଗେହତଲେଽପ୍ୟନିମିତ୍ତଶତଂ
ସମୁଦୀକ୍ଷ୍ୟ ଗତା ୟମୁନାଂ ପଶୁପାଃ ॥7॥
ଅଖିଲେଷୁ ଵିଭୋ ଭଵଦୀୟ ଦଶା-
ମଵଲୋକ୍ୟ ଜିହାସୁଷୁ ଜୀଵଭରମ୍ ।
ଫଣିବଂଧନମାଶୁ ଵିମୁଚ୍ୟ ଜଵା-
ଦୁଦଗମ୍ୟତ ହାସଜୁଷା ଭଵତା ॥8॥
ଅଧିରୁହ୍ୟ ତତଃ ଫଣିରାଜଫଣାନ୍
ନନୃତେ ଭଵତା ମୃଦୁପାଦରୁଚା ।
କଲଶିଂଜିତନୂପୁରମଂଜୁମିଲ-
ତ୍କରକଂକଣସଂକୁଲସଂକ୍ଵଣିତମ୍ ॥9॥
ଜହୃଷୁଃ ପଶୁପାସ୍ତୁତୁଷୁର୍ମୁନୟୋ
ଵଵୃଷୁଃ କୁସୁମାନି ସୁରେଂଦ୍ରଗଣାଃ ।
ତ୍ଵୟି ନୃତ୍ୟତି ମାରୁତଗେହପତେ
ପରିପାହି ସ ମାଂ ତ୍ଵମଦାଂତଗଦାତ୍ ॥10॥